Tag: Elections 2024

کراچی: امیر جماعت اسلامی کراچی حافظ نعیم الرحمان کا کہنا ہے کہ بلاول کہتے ہیں بدین کے فیصلے کراچی کے بابو نہیں کریں گے تو وہ بھی سن لیں کہ کراچی کا فیصلہ سندھ کے جاگیردار نہیں کریں گے۔

سوک سینٹر پر گیس قلت کے خلاف جماعت اسلامی کے مظاہرے سے خطاب کرتے ہوئے حافظ نعیم الرحمان نے کہا کہ آئین کے مطابق گیس پر پہلا حق اس صوبے کا ہے جہاں پیداوار ہوتی ہے، سندھ 70 فیصد گیس پیدا کرتا اور یہاں کی انڈسٹری کو گیس نہیں ملتی۔

حافظ نعیم الرحمان نے کہا کہ تندور والوں کا بل بھی لاکھوں روپے میں آ رہا ہے، کراچی میں صرف تنخواہ دار طبقے نے پورے پنجاب کے برابر ٹیکس دیا، پورے ملک کے جاگیرداروں نے صرف 4 ارب کا ٹیکس دیا، یہ سب جاگیردار آپ کو (ن) لیگ اور پیپلز پارٹی میں ملیں گے۔

متعلقہ: بلاول بھٹو اب وزیر اعظم نہیں بن سکتے، حافظ نعیم الرحمان

انہوں نے کہا کہ کراچی کا معیشت میں اہم کردار ہے لیکن یہاں گیس کا شدید بحران ہے، کراچی کے صنعتی ادارے گیس بحران کی وجہ سے پریشان حال ہیں، شہریوں کو گیس نہیں ملتی لیکن بل ہزاروں میں آ رہے ہیں، عوام ٹیکس کی مد میں سالانہ اربوں روپے ادا کر رہے ہیں، اربوں روپے ٹیکس کے باوجود کراچی پانی، گیس اور بجلی سے محروم ہے۔

امیر جماعت اسلامی کراچی نے کہا کہ انڈسٹریز پر ٹیکس لگایا جاتا ہے لیکن جاگیرداروں پر ٹیکس نہیں لگایا جاتا، آئی ایم ایف کے کہنے پر عوام پر ٹیکس لگایا جاتا ہے، آئی ایم ایف اور جاگیردار مل کر عوام کی قسمت کا فیصلہ کرتے ہیں، پیپلز پارٹی، ایم کیو ایم اور مسلم لیگ (ن) کہاں ہے؟

حافظ نعیم الرحمان نے کہا کہ 66 فیصد طلبہ و طالبات کو سازش کے تحت فیل کیا گیا، ہم طلبہ و طالبات کے حق سے دستبردار نہیں ہو سکتے، کراچی کی سودا گری کرنے والوں کو عوم مسترد کر دیں گے۔

دادو: چیئرمین پاکستان پیپلز پارٹی بلاول بھٹو زرداری کا کہنا ہے کہ عوام مجھے چار نہیں ایک بار وزیر اعظم بننے کا موقع دیں میں ملک کی قسمت بدل دوں گا۔

جلسے سے خطاب کرتے ہوئے بلاول بھٹو زرداری نے کہا کہ پارٹی نے مجھے وزیر اعظم کیلیے نامزد کیا ہے لہٰذا 8 فروری کو تیر پر ٹھپہ لگا کر پیپلز پارٹی کے امیدواروں کو کامیاب کریں، عوام میرے ساتھ ہوں تو دنیا کی کوئی طاقت میرا راستہ نہیں روک سکتی۔

نواز شریف پر تنقید کرتے ہوئے بلاول بھٹو زرداری نے کہا کہ اب الیکشن تیر اور شیر کے درمیان ہو رہا ہے، شیر کسانوں، مزدوروں اور غریبوں کا خون چوستا ہے، یہ کیسا شیر ہے جو خود گھر میں چھپ جاتا ہے اور شکار نہیں کرتا۔

بلاول بھٹو زرداری نے کہا کہ یہ شیر گھر میں چھپ کر دوسروں کو کہتا ہے میرا بندوبست آپ کریں، جب بندوبست کیا جاتا ہے تو پھر گھر سے نکلتا ہے، کل میں شیر کے شکار کیلیے پنجاب جا رہا ہوں، جیالے اچھی طرح جانتے ہیں کہ شیر کا شکار کیسے کیا جاتا ہے؟

سابق وزیر خارجہ نے کہا کہ ہم یہ بات نہیں مانتے کہ کسی شخص کو چوتھی بار وزیر اعظم بنایا جائے، وہ شخص پہلی، دوسری اور تیسری بار ناکام رہا تو چوتھی بار کس خوشی میں لا رہے ہو؟

انہوں نے کہا کہ شیر اور کسی جماعت کے پاس کوئی منشور اور نظریہ نہیں ہے، ان کو چوتھی بار بھی حکومت ملی تو غربت سے مقابلے کا کوئی پلان نہیں، ان لوگوں نے ابھی تک عوام کے سامنے منشور بھی نہیں رکھا۔

ان کا کہنا تھا کہ کہتے تھے یہ بچہ کیا کر لے گا لیکن کراچی اور حیدر آباد کا میئر جیالہ بنا کر دکھایا، اب میں پیپلز پارٹی کی حکومت وفاق میں بنا کر دکھاؤں گا۔

ظفروال: سیکریٹری جنرل مسلم لیگ (ن) احسن اقبال کا کہنا ہے کہ پاکستان کے دشمن پی ٹی آئی کے ذریعے مہم چلا رہے ہیں۔

جلسے سے خطاب کرتے ہوئے احسن اقبال نے کہا کہ پاکستان کے خلاف جو کبھی بھارتی ایجنسی را نے بھی ہمت نہیں تھی وہ پی ٹی آئی نے کیا، پی ٹی آئی کی کامیابی کا مطلب اس ملک میں انتشار ہے۔

احسن اقبال نے کہا کہ (ن) لیگ کی قیادت نے کبھی سیاست میں بلیک میلنگ نہیں کی، دشمن پاکستان کو کھوکھلا کرنے کی سازش کر رہے ہیں، ایٹمی طاقت کو جنگ سے جھکایا نہیں جا سکتا اس لیے سازش کی جا رہی ہے، ایٹمی طاقت کو کمزور کرنا ہو تو اس کا راستہ ہے معیشت پنکچر کر دیں۔

متعلقہ: بانی پی ٹی آئی اپنا اور قوم کا سر پھوڑ کر اب جیل میں بیٹھا ہے، احسن اقبال

سابق وفاقی وزیر نے کہا کہ دشمن داخلی اتحاد کو کمزور اور ملک کو اندر سے کھوکھلا کرنا چاہتے ہیں، ایک لیڈر کو 2018 میں ملک پر مسلط کیا گیا اس نے معیشت تباہ کر دی، سی پیک منصوبہ بند اور انتشار پھیلانے کی کوشش کی گئی، نوجوانوں کے ذہن میں نفرت کے بیج بوئے گئے۔

انہوں نے کہا کہ اس نے پاکستان کے اداروں میں تقسیم کرنے کوشش کی، اس نے اپنے ہم خیال ججوں کے ذریعے تقسیم کی کوشش کی، سپریم کورٹ پنجایت بن کر بانی پی ٹی آئی کے حق میں فیصلے کرتی تھی لیکن اللہ کا شکر ہے وہ جج ایک ایک کر کے رخصت ہو گئے۔

(ن) لیگی رہنما نے کہا کہ آج پھر سپریم کورٹ آزادی کی طرف سفر کر رہی ہے، بانی پی ٹی آئی نے سلامتی اداروں میں دراڑ ڈالنے کی سازش کی، 9 مئی کو ادارے میں بغاوت پیدا کرنے کی کوشش کی، فوجی تنصیبات پر حملہ کیا اور شہدا کی یادگاروں کو مسمار کیا۔

چیف آرگنائزر و نائب صدر مسلم لیگ (ن) مریم نواز کا کہنا ہے کہ آج کل نواز شریف کا زیادہ تر وقت یہ سوچنے میں گزرتا ہے کہ مہنگائی کیسے ختم کرنی ہے اور نوجوانوں کے ہاتھوں میں لیپ ٹاپ کیسے دینے ہیں؟

حافظ آباد میں جلسے سے خطاب کرتے ہوئے مریم نواز نے کہا کہ مجھے پورا یقین ہے 8 فروری کو حافظ آباد میں شیر دھاڑے گا، جو بات نواز شریف نے آج آپ سے کہی امید ہے آپ سب اس پر سوچیں گے، امید ہے آپ سب نواز شریف کا پیغام گھر گھر پہنچائیں گے۔

مریم نواز نے کہا کہ میں نے عوام سے وعدہ کیا تھا جو بھی ہو جائے نواز شریف کو واپس لے کر آؤں گی، آج میں الحمدللہ نواز شریف کو آپ کے پاس لے آئی ہوں، اس جدوجہد میں اگر آپ میرا ساتھ نہ دیتے تو یہ ممکن نہیں ہوتا، نواز شریف نے لندن سے پاکستان آنے سے پہلے ایک بات کہی تھی، نواز شریف نے کہا تھا ہم 28 مئی والے لوگ ہیں ہم 9 مئی والے لوگ نہیں۔

انہوں نے کہا کہ 28 مئی 1999 کو ایٹمی دھماکے ہوئے تھے جس شخص نے ملک کو ایٹمی قوت بنایا وہ یہاں کرسی پر بیٹھا ہے، 9 مئی والے ریاست پاکستان پر حملہ کرنے والے لوگ ہیں، ایک تاریخ پاکستان کو سنوارنے والوں کی ہے اور ایک تاریخ پاکستان کو اجاڑنے والوں کی ہے۔

ان کا کہنا تھا کہ 28 مئی والے دو روپے کی روٹی اور مہنگائی کم کرنے والے ہیں، 9 مئی والے لوگ 4 سال رہنے کے باوجود مہنگائی کا طوفان لانے والے لوگ ہیں، 28 مئی والے سڑکوں کا جال بچھانے والے ہیں، 9 مئی والے انہیں سڑکوں کا استعمال کر کے آگ لگانے والے ہیں، نواز شریف کے دور میں کسی کو فکر نہیں تھی کہ بجلی کا لمبا بل آئے گا، نواز شریف نے 3 سال میں پاکستان سے لوڈشیڈنگ ختم کر دی۔

چیف آرگنائزر (ن) لیگ نے کہا کہ جو شخص آپ کے ہاتھ میں پیٹرول بم اور ڈنڈے دیتا ہے وہ آپ کا ہمدرد اور خیر خواہ نہیں، جو شخص ترغیب دیتا ہے کہ شہدا کی یادگاروں پر حملہ کرو وہ ہمدرد نہیں ہو سکتا، جو شخص ترغیب دیتا ہے گریبانوں میں ہاتھ ڈالو وہ ہمدرد نہیں ہو سکتا۔

مریم نواز نے کہا کہ جو لوگ 9 مئی کے سلسلے میں جیلوں میں بند ہیں کیا انہیں کسی نے پوچھا؟ اس کے اپنے بچے لندن کی محفوظ فضاؤں میں بیٹھے ہیں، 8 فروری کو سوچ سمجھ کر پاکستان کے مستقبل کا فیصلہ کرنا۔

اسلام آباد: چیف الیکشن کمشنر سکندر سلطان راجہ کے نام پر جعلی واٹس ایپ اکاؤنٹس کا انکشاف ہوا ہے جس پر الیکشن کمیشن نے وضاحت جاری کر دی۔

سماجی رابطوں کی ویب سائٹ ایکس پر ترجمان الیکشن کمیشن نے بیان جاری کیا جس میں کہا گیا کہ جعلی واٹس ایپ اکاؤنٹس چیف الیکشن کمشنر کے نام اور تصویر کے ساتھ بنائے گئے۔

ترجمان نے اپیل کی کہ عوام ان جعلی پیغامات اور پروپیگنڈے سے ہوشیار رہیں، اس طرح کے جعلی پیغامات کو نظر انداز کیا جائے۔

#ECP pic.twitter.com/9NvPMsK7xb

— Spokesperson ECP (@SpokespersonECP) January 17, 2024

8 فروری کو ہونے والے عام انتخابات سے چند ہفتے قبل گزشتہ روز سیکریٹری الیکشن کمیشن آف پاکستان عمر حمید کا استعفیٰ منظور کیا گیا تھا۔

ذرائع نے اے آر وائی نیوز کو بتایا تھا کہ سیکریٹری الیکشن کمیشن عمر حمید نے خرابی صحت کے باعث استعفیٰ دیا تھا جسے اب منظور کر لیا گیا ہے۔

عمر حمید نے 7 جنوری کو خراب صحت کے باعث عہدے سے استعفیٰ دیا تھا۔ انہوں نے اپنے استعفے میں مؤقف اختیار کیا تھا کہ ان صحت کام کرنے کی اجازت نہیں دیتی۔