لاہور: صدر مسلم لیگ (ن) شہباز شریف کا کہنا ہے کہ اللہ کی عدالت میں پوچھا گیا کہ بطور وزیر اعظم کیا کیا تو جواب دوں گا پاکستان کو دیوالیہ ہونے سے بچایا۔
میڈیا کے نمائندوں سے خصوصی گفتگو کرتے ہوئے شہباز شریف نے کہا کہ عوام اپنے ووٹ کے ذریعے فیصلہ کر دیں گے پاکستان کا مستقبل کہاں ہے، کوئی شک نہیں 25 کروڑ عوام ملک کیلیے حق رائے دہی استعمال کریں گے،عوام سوچ بوجھ کے ساتھ ماضی میں جھانک کر مستقبل کا نقشہ کھینچیں گے۔
شہباز شریف نے کہا کہ نواز شریف کی شبانہ روز محنت سے پاکستان ترقی کی طرف گامزن تھا، بجلی کے اندھیروں کو ختم کرنے کیلیے کام ہو رہا تھا، زراعت کو ترقی دینے کیلیے محنت کی جا رہی تھی، 2017 اور 2018 کے اوائل میں بجلی کی لوڈشیڈنگ ختم ہوگئی تھی لیکن 2017 اور اس کے بعد کیا ہوا وہ آپ سب کے سامنے ہے، ثاقب نثار جیسے مہرے کے ذریعے نواز شریف کی حکومت کا تختہ الٹا گیا۔
متعلقہ: کس خوشی میں ایک شخص کو چوتھی بار وزیر اعظم مان لیں؟ بلاول بھٹو
سابق وزیر اعظم نے کہا کہ 2017 میں ڈنڈے اور بلے سے ختم کرنے والے دور کو دوبارہ شروع کریں گے، نواز شریف کی جدوجہد ہے ترقی کے سفر کو دوبارہ شروع کریں گے۔
انہوں نے بتایا کہ 16 ماہ میں اتحادی حکومت تھی دن رات کوشش سے پاکستان کو دیوالیہ ہونے سے بچایا، پاکستان دیوالیہ ہو جاتا تو پیٹرول دور عوام کو ایک وقت کی روٹی نہ مل پاتی، عوام سڑکوں پر ہوتے ہر طرف تباہی ہوتی، ہم نے ملکی مفاد کیلیے سیاسی قیمت ادا کی جس پر کوئی ملال نہیں، ریاست کیلیے سیاست قربان کی جس پر کوئی پشیمانی نہیں کیونکہ ریاست رہے گی تو سیاست بھی دوبارہ آ جائے گی۔
ان کا کہنا تھا کہ کیا پی ٹی آئی سے انتخابی نشان ہم نے لیا ہے؟ پی ٹی آئی کے وکیل نے عدالت میں ٹھوس شواہد پیش کیے، بلا چھن جانے کا سوال وکیل سے پوچھنا چاہیے، پی ٹی آئی سے پوچھیں انہوں نے شفاف انٹرا پارٹی الیکشن کیوں نہیں کروائے؟
