لاہور: چیئرمین پاکستان پیپلز پارٹی بلاول بھٹو زرداری کا کہنا ہے کہ مسلم لیگ (ن) سے دوبارہ اتحاد کریں تو یہ پیپلز پارٹی کیلیے شرمندگی ہوگی۔
رہنما پاکستان عوامی تحریک کے ہمراہ میڈیا سے گفتگو کرتے ہوئے بلاول بھٹو زرداری نے کہا کہ سیاست ذاتی دشمنی تک پہنچ چکی ہے، میاں صاحب وزیر اعظم بنیں گے تو ان کا سیاسی ایجنڈا انتقام لینا ہوگا جس سے عوام کو نقصان پہنچے گا۔
بلاول بھٹو زرداری نے کہا کہ چاہتے ہیں نفرت اور تقسیم کی سیاست کا مقابلہ کریں، ہماری خواہش ہے پاکستان کو جدید ریاست بنائیں اور اسلام کا اصل پُرامن چہرہ دنیا کے سامنے آئے، پُرامن طریقے سے نفرت کی سیاست کا مقابلہ کر کے نئی سوچ اور سیاست متعارف کروانا چاہتے ہیں۔
متعلقہ: کیا آپ چاہتے ہیں بلاول بھٹو وزیر اعظم بنیں؟ آصفہ بھٹو
سابق وزیر خارجہ نے کہا کہ ہمیں چاہیے معاشرے میں جو نفرت پیدا کی گئی اسے ختم کریں، ہم عوام کیلیے ترقی کے راستے کھولیں گے۔
انہوں نے کہا کہ ماڈل ٹاؤن واقعے پر نہ صرف بریف کیا گیا بلکہ مجھے دکھایا بھی گیا، جس جگہ پر حملہ کیا گیا تھا وہاں آج بھی گولیوں کے نشانات موجود ہیں، ایک آزادانہ تحقیقات کی جائیں جو بھی ذمہ داران ہیں انہیں سزا ملنی چاہیے۔
ان کا کہنا تھا کہ میں مسلسل انتخابی مہم میں رہا ہوں، جب مخلوط حکومت میں تھے تب بھی عوام کے درمیان رہے، پیپلز پارٹی واحد جماعت ہے جو صرف عوام کا ساتھ چاہتی ہے جبکہ باقی جماعتیں دوسری طرف دیکھ رہیں لیکن ہم عوام کو دیکھ رہے ہیں۔
بلاول بھٹو زرداری نے کہا کہ میں عوامی معاشی معاہدے پر زور دے رہا ہوں، ہمارے منشور میں سب کے حقوق کی بات ہوگی، میں تو مسلسل مہم چلا رہا ہوں 2018 سے لے کر آج تک، جہاں تک الیکشن مہم کی بات ہے وہ تو کب سے شروع کر رکھی ہے۔
