اسلام آباد: الیکشن کمیشن آف پاکستان نے کمشنر راولپنڈی لیاقت چٹھہ کے انتخابات میں دھاندلی کے الزامات پر اعلیٰ سطح کمپنی تشکیل دینے کا فیصلہ کر لیا۔
چیف الیکشن کمشنر سکندر سلطان راجہ کی زیرِ صدارت الیکشن کمیشن کا اہم اجلاس ختم ہوگیا جس میں اعلیٰ سطح کمیٹی تشکیل دینے کا فیصلہ کیا۔ کمیٹی کی صدارت الیکشن کمیشن کے سینئر ممبر کریں گے۔
کمیٹی میں سیکریٹری، اسپیشل سیکرٹری اور ایڈیشنل ڈائریکٹر جنرل قانون شامل ہوں گے۔ اجلاس میں فیصلہ ہوا کہ کمیٹی راولپنڈی کے ڈی آر اوز اور متعلقہ آر او کے بیانات قلمبند کرے گی۔
اجلاس میں کہا گیا کہ کمیٹی 3 روز میں رپورٹ الیکشن کمیشن کو پیش کرے گی جس کے آنے کے بعد کمشنر راولپنڈی لیاقت چٹھہ کے خلاف کارروائی کا فیصلہ کیا جائے گا۔
اجلاس کے بعد اعلامیہ جاری کیا گیا جس کے طابق چیف الیکشن کمشنر کی زیرِ صدارت اجلاس میں تمام ممبران شریک ہوئے تھے۔
”انتخابی دھاندلی کی ذمہ داری قبول کرتا ہوں“
کمشنر راولپنڈی لیاقت چھٹہ نے تہلکہ خیز انکشاف کیا ہے کہ انتخابی نتائج میں بد ترین دھاندلی ہوئی ہے۔ انہوں نے اعتراف کیا کہ ”میں راولپنڈی ڈویژن میں انتخابی دھاندلی کی ذمہ داری قبول کرتا ہوں اور اپنے آپ کو پولیس کے حوالے کرتا ہوں۔“
لیاقات چھٹہ نے کہا کہ ”میں الیکشن ٹھیک نہیں کروا سکا لہٰذا عہدے سے استعفیٰ دیتا ہوں۔ ہم نے جعلی مہریں لگا کر 70، 70 ہزار کی لیڈ کو شکست میں بدلا۔ اس کام میں چیف الیکشن کمشنر بھی ملوث ہیں۔ میں ماتحت افسران سے معذرت چاہتا ہوں کہ انہیں میں نے غلط کام کیلیے کہا۔“
کمشنر راولپنڈی نے انتخابی بے ضابطگیوں پر مستعفی ہونے کا اعلان کرتے ہوئے کہا ”راولپنڈی ڈویژن میں ہارے ہوئے امیدواروں کو جتوایا گیا، مجھ پر کوئی دباؤ نہیں ہے، اپنے ماتحتوں کو غلط کام کیلیے کہہ رہا تھا تو وہ رو رہے تھے، میں اپنے ماتحتوں کو غلط کام کا کہنے پر معافی مانگتا ہوں۔“
”میں نے ملک کی پیٹ پر چھرا گھونپا جو مجھے چین سے رہنے نہیں دے رہا تھا۔ میں نے جو ظلم کیا اس کی سزا مجھے ملنی چاہیے، اس عمل میں ملوث لوگوں کو بھی سخت سزا ملنی چاہیے، چیف الیکشن کمشنر بھی اس کام میں پوری طرح شریک ہیں۔‘‘
”فجر کی نماز کے بعد دھاندلی پر پہلے خود کشی کا سوچا پھر سوچا حرام کی موت کیوں مروں، پھر میں نے سوچا کیوں نہ ساری چیزیں عوام کے سامنے لاؤں۔‘‘
