ARYNews.tv | Urdu – Har Lamha Bakhabar

Tag: elections

  • قبل از وقت انتخابات: عمران خان اور نواز شریف میں بیک ڈور رابطے

    قبل از وقت انتخابات: عمران خان اور نواز شریف میں بیک ڈور رابطے

    اسلام آباد: ملک میں قبل از وقت انتخابات کے لیے سیاسی جماعتوں سے بیک ڈور رابطوں کا آغاز ہو گیا ہے۔

    ذرائع کے مطابق ملک کے دو بڑے سیاسی رہنماؤں عمران خان اور نواز شریف نے بیک ڈور رابطوں کا آغاز کر دیا ہے۔

    تحریک انصاف کے چیئرمین عمران خان کی سیاسی پوزیشن اس وقت مستحکم ہے، اس لیے وہ چاہتے ہیں کہ فوری الیکشن ہوں، اور وہ نومبر سے زیادہ تاخیر نہیں چاہتے۔

    دوسری جانب نواز شریف یہ دیکھ رہے ہیں کہ سیاسی ماحول ان کے لیے اس وقت سازگار نہیں ہے، اس لیے وہ چاہتے ہیں کہ اگلے برس مارچ، اپریل میں الیکشن ہوں۔

    ذرائع کا کہنا ہے کہ اس سلسلے میں نواز شریف سے اسحاق ڈار کے ذریعے پیغام رسانی ہو رہی ہے، ان کو یہ پیغام دو تین مرتبہ دیا جا چکا ہے کہ میاں صاحب سے کہیں کہ وہ مان جائیں کہ اس وقت ملک کے جو معاشی حالات ہیں، ان میں انتخابات کی تاخیر مناسب نہیں، چاہیں تو وہ اس کی جگہ کوئی اور شرط منوالیں۔

    عمران خان کی جانب سے الیکشن اکتوبر نومبر میں کروانے کے پیغام کا نواز شریف کی جانب سے اب تک کوئی جواب نہیں دیا گیا ہے، ذرائع کا کہنا ہے کہ اس سلسلے میں جواب کے لیے پندرہ بیس روز انتظار کیا جائے گا، دوسری صورت میں حکومت کے اتحادیوں کو توڑنے کی کوشش کی جائے گی، جیسا کہ فواد چوہدری نے بھی کہا ہے کہ ٹیلی فون پر اس حوالے سے رابطے ہو چکے ہیں۔

    ذرائع کے مطابق دونوں جماعتوں میں دوسرا ڈیڈ لاک الیکشن کمیشن پر ہے، عمران خان کہتے ہیں کہ وہ اس الیکشن کمیشن کے تحت انتخابات نہیں چاہتے، وہ یہ بھی چاہتے ہیں کہ چیف الیکشن کمشنر تبدیل ہو۔

    ادھر پنجاب میں پرویز الہٰی کی بھی خواہش ہے کہ کچھ عرصہ حکومت ابھی چلے اور کچھ منصوبے مکمل کیے جائیں لیکن وہ اس کے لیے پابند ہیں کہ عمران خان جب کہیں گے انھیں اسمبلی توڑنا ہوگی۔

    تاہم دوسری طرف ن لیگ اور پی ٹی آئی میں اس بات پر اتفاق ہے کہ مرکز اور صوبائی اسمبلیوں کے انتخابات ایک ساتھ کرائے جائیں، اس سلسلے میں آصف علی زرداری کو منانا ہوگا، تاکہ سندھ میں بھی اسمبلی توڑی جا سکے۔

  • مغربی بنگال میں انتخابات پر تشدد شکل اختیار کرگئے، 5 ہلاکتیں رپورٹ

    مغربی بنگال میں انتخابات پر تشدد شکل اختیار کرگئے، 5 ہلاکتیں رپورٹ

    نئی دہلی: بھارتی ریاست مغربی بنگال میں انتخابات کے چوتھے مرحلے کے دوران پرتشدد واقعات میں پانچ افراد ہلاک جبکہ چار زخمی ہوگئے ہیں۔

    بھارتی میڈیا کے مطابق مغربی بنگال میں چوتھے مرحلے کے لئے ووٹنگ کا عمل جاری ہے، ووٹنگ کے موقع پر کئی مقامات پر پرتشدد واقعات رونما ہوئے، جس کے نتیجے میں پانچ افراد ہلاک جبکہ چار زخمی ہوگئے ہیں۔

    بھارتی میڈیا کے مطابق شمالی بنگال کے ضلع کوچ وہار میں یہ واقعات رونما ہوئے، جس میں چار افراد کی ہلاکت ہوئی۔

    دوسری جانب مغربی بنگال کی وزیراعلیٰ ممتا بنر جی نے الزام عائد کیا ہے کہ پولنگ کے دوران سکیورٹی فورسز کی فائرنگ کے باعث چار افراد ہلاک ہوئے، وزیر داخلہ امیت شاہ کی ایما پر یہ کارروائی کی گئی ہے۔

    مارے گئے افراد میں حمید الحق، منیر الحق، سمیع الحق اور امجد حسین شامل ہے، یہ تمام لوگ ترنمول کانگریس کے کارکن تھے۔واضح رہے کہ مغربی بنگال کے پانچ اضلاع کی 44 نسشتوں پر چوتھے مرحلے کے لئے ووٹنگ کا عمل جاری ہے، بڑی تعداد میں عوام اپنا حق رائے دہی استعمال کررہے ہیں، پولنگ مراکز کے باہر لمبی قطاریں لگی ہوئی ہیں۔

    اب تک بنگال میں تین مراحل میں اکانوے نشستوں کے لئے ووٹنگ ہوچکی ہے۔ مغربی بنگال میں کل 294 اسمبلی نشستیں ہیں جن پر 8 مراحل میں ووٹنگ مکمل ہوگی اور دو مئی کو ووٹوں کی حتمی گنتی ہوگی۔

  • وزیراعظم مودی کا مقبوضہ کشمیر میں جلد انتخابات کرانے کا اعلان

    وزیراعظم مودی کا مقبوضہ کشمیر میں جلد انتخابات کرانے کا اعلان

    نئی دہلی : بھارتی وزیراعظم  نریندر  مودی نے مقبوضہ کشمیر میں جلد انتخابات کرانے کا اعلان کردیا اور کہا وادی کا اپنا وزیراعلیٰ اور وزرا ہونے چاہییں۔

    تفصیلات کے مطابق بھارتی وزیراعظم نریندر مودی نے بھارت کے 73 ویں یوم آزادی کے موقع پر نئی دہلی ميں لال قلعے کے تاريخی مقام پر اپنے خطاب میں کہا کہ مقبوضہ جموں وکشمیرمیں حلقہ بندیاں کی جارہی ہیں ، حلقہ بندیوں کا کام مکمل ہونے کے بعد مقبوضہ کشمیرمیں انتخابات کرائے جائیں گے، وادی کا اپنا وزیراعلیٰ اور وزرا ہونے چاہییں۔

    خیال رہے بھارت کے یوم آزادی پر آج مقبوضہ وادی میں یوم سیاہ منایا جا رہا ہے، یوم سیاہ پر بھارتی غیر قانونی مقبوضہ جموں و کشمیر میں مکمل ہڑتال ہیں، قابض انتظامیہ نے مظاہرے روکنے کے لیے مقبوضہ علاقے میں پابندیوں کو مزید سخت کر دیا ہے۔

    واضح رہے کہ مودی سرکار کی جانب سے جموں و کشمیر کی قانونی جداگانہ حیثیت ختم کرنے کا رواں ماہ ایک سال پورا ہو گیا ہے، وادی میں اس عرصہ بدترین لاک ڈاؤن رہا، ہزاروں کشمیری بھارتی فورسز کے تشدد اور فائرنگ سے زخمی ہوئے اور سینکڑوں لاپتا کیے گئے۔

  • قبائلی اضلاع کےانتخابی نتائج: تحریک انصاف اور آزاد امیدواروں نے میدان مار لیا

    قبائلی اضلاع کےانتخابی نتائج: تحریک انصاف اور آزاد امیدواروں نے میدان مار لیا

    پشاور: خیبرپختونخواہ میں ضم ہونے والے قبائلی اضلاع کی 16 صوبائی نشستوں پر ہونے والے انتخابات میں 12 حلقوں کے غیرحتمی غیرسرکاری نتائج کے مطابق تحریک انصاف نے 4 نشتوں پر میدان مار لیا، تاریخی انتخابات میں 5 آزاد امیدوار کامیاب ہوئے۔

    تفصیلات کے مطابق خیبرپختونخواہ میں ضم کیے گئے قبائلی اضلاع کی 16 نشستوں پر پولنگ کا عمل مکمل ہونے کے بعد نتائج آنے کا سلسلہ جاری ہے۔

    اٹھائیس لاکھ سے زائد ووٹرز  نے حق رائے دہی استعمال کیا، دو خواتین سمیت دوسو پچاسی امیدوار میدان سیاست میں‌ مدمقابل تھے۔

    قبائلی اضلاع میں 1 ہزار 897 پولنگ اسٹیشنز قائم کیے گئے تھے، جس میں 554 کو انتہائی حساس اور 461 کو حساس قرار دیا گیا تھا، شمالی اور جنوبی وزیرستان کے پولنگ اسٹیشن اس فہرست میں شامل تھے۔

     الیکشن کا عمل پرامن تھا، عوام کی بڑی تعداد نے شرکت کی۔  بزرگوں کے علاوہ خواتین نے بھی بڑھ چڑھ کر حصہ لیا۔ انہوں نے پاکستان زندہ باد کے نعرے لگائے اور پاک فوج کو خراج تحسین پیش کیا۔

    الیکشن کمیشن آف پاکستان کے غیر حتمی نتائج کے مطابق پاکستان تحریک انصاف نے 4 اور آزاد امیدواروں نے 5 نشستیں اپنے نام کی ہیں۔ جماعت اسلامی، عوامی نیشنل پارٹی، اے این اپی اور جمیعت علمائے اسلام ف کے ایک ایک امیدوار بھی صوبائی اسمبلی کی نشست جیتنے میں کامیاب رہے۔

    انتخابات کے غیر حتمی، غیر سرکاری نتائج

    پی کے 100 باجوڑ ون:

    غیر حتمی وغیرسرکاری نتیجے کے مطابق تحریک انصاف کے انورزیب خان 12،951 ووٹ لے کر فاتح قرار پائے جبکہ جماعت اسلامی کے مولانا وحید گل 11،775 ووٹ لے کر دوسرے نمبر پر رہے۔

    پی کے 101باجوڑ 2:

    غیر حتمی وغیرسرکاری نتیجے کے مطابق تحریک انصاف کے اجمل خان 12،194 ووٹ لے کر فاتح قرار پائے جبکہ جماعت اسلامی کے صاحبزادہ ہارون رشید 10،468 ووٹ لے کر دوسرے نمبر پر رہے۔

    پی کے 102 باجوڑ 3:

    اس حلقے کے غیرسرکاری غیرحتمی نتیجے کے مطابق میں جماعت اسلامی کے سراج الدین 19،088 ووٹ لے کر فاتح قرار پائے، پی ٹی آئی کے امیدوار حمید الرحمان 13،436 ووٹ لے کر دوسرے جبکہ آزاد امیدوار خالد خان 12،639 ووٹ لے کر تیسرے نمبر پررہے۔

    پی کے 103مہمند ون:

    اس حلقے کے غیر حتمی، غیر سرکاری نتیجے کے مطابق عوامی نیشنل پارٹی کے نثار احمد 11،247 ووٹ لے کر کامیاب قرار پائے۔ تحریک انصاف کے رحیم شاہ 9،669 ووٹ لے کر دوسرے نمبر پر رہے۔

    پی کے  104:

    غیر حتمی وغیرسرکاری نتیجے کے مطابق آزاد امیدوار ملک عباس الرحمان 11،751 ووٹ کر فاتح قرار پائے جبکہ تحریک انصاف کے سجاد خان 9،801 ووٹ لے کر دوسرے نمبر پر رہے۔

    پی کے105خیبر ون:

    اس حلقے کے غیرسرکاری نتائج کے مطابق آزاد امیدوار شفیق آفریدی 19،733 ووٹ لے کر کامیاب قرار پائے جبکہ دوسرے آزاد امیدوار شرمت خان 10،745 ووٹ لے کے دوسرے نمبر پر رہے۔

    پی کے  106:

     پی کے106 کے غیرسرکاری غیر حتمی نتیجہ کے مطابق آزاد امیدوار بلاول آفریدی 12،814 ووٹ لے کر فاتح قرار پائے، تحریک انصاف کے حاجی امیر محمد 6،297 ووٹ لے کر دوسرے نمبر پر رہے۔

    پی کے  107:

    پی کے107 کے غیرسرکاری نتیجے کے مطابق آزاد امیدوار محمد شفیق 9،796 ووٹ لے کر کامیاب قرار پائے جبکہ آزاد امیدوار حمیداللہ جان آفریدی 8،428 ووٹ لے کر دوسرے نمبر پر رہے۔

    پی کے 108 کرم ون:

    اس حلقے کے غیرحتمی نتائج کے مطابق جےیوآئی (ف) کے محمد ریاض 11،948 ووٹ لے کر فاتح قرار پائے جبکہ آزاد امیدوار جمیل خان 11،517 ووٹ لے کر دوسرے نمبرپر رہے۔

    پی کے109کرم 2:

    تحریک انصاف کے اقبال سیدمیاں 9229 ووٹ لے کر پہلے نمبرپر ہیں، آزاد امیدوار عنایت حسین نے اب تک 3944 ووٹ حاصل کیے ہیں.

    پی کے 110 اورکزئی:

    اس حلقے کے 41 پولنگ اسٹیشنز کے غیرسرکاری غیرحتمی نتیجہ میں‌آزاد امیدوار غازی غزن جمال کو دیگر پر برتری حاصل ہے، دوسرا نمبر آزاد امیدوار جوہرعباس کا ہے

    پی کے111 شمالی وزیرستان ون:

    آزاد امیدوار اسد اللہ شاہ اور تحریک انصاف کے محمد اقبال خان میں کانٹے دار مقابلہ متوقع ہے.

    پی کے 112 شمالی وزیرستان 2 :

    اس حلقے میں 17 پولنگ اسٹیشنز کے نتائج کو دیکھا جائے، تو آزاد امیدوار میرکلام خان 2478 آگے ہیں، جے یوآئی(ف) کے صدیق اللہ دوسرے نمبر پر ہیں.

    پی کے113جنوبی وزیرستان ون: 

    جے یو آئی (ف) کے حافظ عصام الدین کو آزاد امیدواربریگیڈیئر(ر) قیوم شیخ پر برتری حاصل ہے. 

    پی کے114جنوبی وزیرستان 2:

    25 پولنگ اسٹیشنز کے غیرسرکاری غیرحتمی نتیجے میں‌ آزاد امیدوارعارف خان وزیر کو فوقیت حاصل ہے، جے یوآئی (ف) کے صالح محمد دوسرےنمبرپر ہیں.

    پی کے  115:

    پی ٹی آئی کے عابد الرحمان 3784 ووٹ کے ساتھ پہلے نمبر پر، جب کہ جے یو آئی (ف) کے محمد شعیب دوسرے نمبر پر ہیں.

    مزید پڑھیں: قبائلی علاقوں کا کے پی کے سے انضمام آج مکمل ہو گیا: شاہ فرمان

    قبائلی علاقوں میں صوبائی اسمبلی کی نشستوں پر انتخابات سے متعلق اے آر وائی نیوز  نے خصوصی ٹرانسمیشن پیش کی، جس میں ناظرین کو لمحہ بہ لمحہ بہ خبر رکھا جارہا ہے۔

    خیال رہے کہ فاٹا کا صوبہ خیبر پختونخواہ میں انضمام گزشتہ برس عمل میں آیا، وزیر اعظم عمران خان نے جلد سے جلد فاٹا میں صوبائی اور بلدیاتی انتخابات کروانے کا اعلان کیا تھا۔

  • قبائلی اضلاع میں صوبائی اسمبلی کے انتخابات کے لیے پولنگ کل ہوگی

    قبائلی اضلاع میں صوبائی اسمبلی کے انتخابات کے لیے پولنگ کل ہوگی

    پشاور: قبائلی اضلاع میں صوبائی اسمبلی کی 16 نشستوں پر انتخابات کے لیے پولنگ کل (20 جولائی کو) ہوگی۔ 28 لاکھ 1 ہزار 837 ووٹرز اپنا حق رائے دہی استعمال کریں گے۔

    تفصیلات کے مطابق سابق فاٹا (وفاق کے زیر انتظام قبائلی علاقے) کے صوبہ خیبر پختونخواہ میں انضمام کے بعد قبائلی اضلاع کے عوام کل پہلی بار اپنے صوبائی ارکان اسمبلی کا انتخاب کریں گے۔

    الیکشن کمیشن کے مطابق مجموعی طور پر 16 صوبائی نشستوں پر 285 امیدوار میدان میں ہیں،جن میں 2 خواتین بھی شامل ہیں۔ 28 لاکھ 1 ہزار 837 ووٹرز اپنا حق رائے دہی استعمال کریں گے۔

    الیکشن کمیشن نے قبائلی اضلاع میں 1 ہزار 897 پولنگ اسٹیشنز قائم کیے ہیں جس میں 554 کو انتہائی حساس اور 461 کو حساس قرار دیا گیا ہے۔

    شمالی اور جنوبی وزیرستان کے تمام پولنگ اسٹیشنز انتہائی حساس اور حساس کیٹگریزمیں شامل ہیں جن پر فوج تعینات ہوگی۔ پولنگ صبح 8 بجے شروع ہو کر شام پانچ بجے تک بغیر وقفے کے جاری رہے گی۔

    خیال رہے کہ فاٹا کا صوبہ خیبر پختونخواہ میں انضمام گزشتہ برس کیا گیا تھا، وزیر اعظم عمران خان نے جلد سے جلد فاٹا میں صوبائی اور بلدیاتی انتخابات کروانے کا اعلان کیا تھا۔

    وزیراعظم نے کہا تھا کہ تمام صوبے این ایف سی میں 3 فیصد فاٹا کو دیں گے، فاٹا میں دہشت گردی کے خلاف جنگ کے باعث بہت نقصان ہوا۔ رواں مال سال کے بجٹ میں فاٹا کے لیے 73 ارب روپے کا ترقیاتی بجٹ بھی رکھا گیا ہے۔

  • ٹرمپ کی انتخابی مہم، ایف بی آئی کی جانب سے خاتون مخبر کا استعمال

    ٹرمپ کی انتخابی مہم، ایف بی آئی کی جانب سے خاتون مخبر کا استعمال

    واشنگٹن: 2016 میں امریکی صدر ڈونلڈ ٹرمپ کی انتخابی مہم کے مشیر کے بھید جاننے کے لیے ایف بی آئی کی جانب سے ایک خاتون مخبر کو استعمال کیے جانے کا انکشاف ہوا ہے۔

    تفصیلات کے مطابق امریکی صدر ڈونلڈ ٹرمپ کی انتخابی مہم کے دوران خارجہ پالیسی سے متعلق امور کے مشیر جارج پاپندوپولوس کے بھید جاننے کے لیے خاتون مخبر کو لندن بار میں بھیجا گیا تھا، تاکہ یہ پتہ لگایا جاسکے کہ روس اور ٹرمپ کی انتخابی مہم کے درمیان کوئی تعلق تھایا نہیں۔

    غیر ملکی خبر رساں ادارے کے مطابق ری پبلیکنز کا کہنا تھا کہ ٹرمپ پر روس سے تعلق کا الزام لگانے والے ڈیموکریٹس دراصل اس اسکینڈل کو چھپاتے رہے ہیں کہ اوباما انتظامیہ اپنے سیاسی حریف کی جاسوسی میں ملوث تھی۔

    جارج پاپندوپولوس کا کہنا تھا کہ انہیں یقین نہیں کہ عزرا ترک نامی خاتون کا تعلق ایف بی آئی سے تھا یا نہیں تاہم خاتون کا نام، اس کی پرکشش شخصیت اور انگریزی اچھی نہ ہونے سے وہ سمجھ گئے تھے کہ خاتون خود کو ریسرچ معاون ہونے کا جو دعویٰ کررہی ہے وہ جھوٹا ہے۔

    امریکی صدر ڈونلڈ ٹرمپ کی انتخابی مہم کے خلاف دو سال سے جاری رابٹ ملر کی خصوصی تحقیقات گذشتہ ماہ اختتام پذیر ہوئی تھی، ابتدائی طور پر تحقیقاتی رپورٹ میں صدر ٹرمپ پر کوئی جرم ثابت نہیں ہوا تھا۔

    امریکی انتخابات میں مداخلت کا معاملہ، روس اور امریکا نے رپورٹ مسترد کردی

    خیال رہے کہ رپورٹ کے خلاصے میں کہا گیا تھا کہ صدر ٹرمپ کی انتخابی مہم کے دوران روس کے ساتھ کسی ملی بھگت کوئی ثبوت ملا۔

  • بھارت میں جاری انتخابات کا چوتھا مرحلہ مکمل

    بھارت میں جاری انتخابات کا چوتھا مرحلہ مکمل

    نئی دہلی: بھارت میں جاری پارلیمانی انتخابات کا چوتھا مرحلہ بھی مکمل ہوگیا، مقبوضہ وادی میں کشمیریوں نے الیکشن کا مکمل طور پر بائیکاٹ کیا۔

    تفصیلات کے مطابق مقبوضہ کشمیر میں بھارت کے نام نہاد پارلیمانی انتخابات کے چوتھے مرحلے کے موقع پر ضلع کو لگام میں گذشتہ روز تمام ترسرگرمیاں معطل رہیں۔

    غیر ملکی خبر رساں ادارے کا کہنا ہے کہ بھارت میں آٹھ ریاستوں او مقبوضہ جموں و کشمیر کے ضلع اننت ناگ سمیت 71 حلقوں میں ووٹنگ ہوئی، جس میں مظلوم کشمیریوں نے ووٹ کاسٹ نہیں کیے۔

    چوتھے مرحلے میں کل 943 امیدوار تھے اور 12 کروڑ 79 لاکھ ووٹرز اپنا حق رائے دہی استعمال کیا، اس دوران کئی پولنگ اسٹیشن پر بدنظمی نظر آئی، مختلف علاقوں میں پرتشدد واقعات بھی رونما ہوئے۔

    بھارت میں انتخابات 7 مرحلوں میں ہو رہے ہیں پانچویں مرحلے کے لیے پولنگ چھ مئی، چھٹے مرحلے کے لیے بارہ جبکہ ساتویں اور آخری مرحلے کے لیے پولنگ انیس مئی کو ہوگی۔

    بھارت کے پارلیمانی انتخابات کے ووٹوں کی گنتی 23 مئی کو جبکہ نتائج کا اعلان بھی اسی روز کیا جائے گا۔

    دوسری جانب تحریک حریت جموں وکشمیر کے چیئرمین محمد اشرف صحرائی نے الیکشن کا بائیکاٹ کرتے ہوئے اپنے بیان میں کہا تھا کہ وہ مقبوضہ کشمیر اور بھارت کی جیلوں میں اپنی ٹیمیں بھیجیں تاکہ وہاں قید کشمیر کے سیاسی قیدیوں کی حالت زار کا اندازاہ لگایا جاسکے۔

    مقبوضہ کشمیرمیں بھارتی انتخابات کا مکمل بائیکاٹ

    یاد رہے کہ بھارتی الیکشن کے پہلے مرحلے بالشمول مقبوضہ کشمیر سمیت مختلف ریاستوں میں پرتشدد واقعات میں چار افراد ہلاک اور متعدد زخمی ہوئے تھے۔

  • انتخابات کے لئے لاشیں گرانا ضروی ہے: بھارتی رہنماؤں کی مبینہ آڈیو کال نے کھلبلی مچا دی

    انتخابات کے لئے لاشیں گرانا ضروی ہے: بھارتی رہنماؤں کی مبینہ آڈیو کال نے کھلبلی مچا دی

    نئی دہلی : پلوامہ حملہ انتخابات کےلیے نریندر مودی کا پائلٹ پروجیکٹ تھا، بی جے پی نے پیسے دے کر بھارتی فوجیوں کا سودا کیا۔

    تفصیلات کے مطابق سابق بھارتی فوجی افسر کے بیٹے اور شدت پسند بھارتیہ جنتا پارٹی کے سابق رکن اوی ڈانڈیہ نے مودی سرکار کے پلواما حملے کا پول کھول دیا۔

    اوی ڈانڈیہ نے بی جے پی رہنما اور امیت شاہ کی مبینہ آڈیو کال سماجی رابطے کی ویب سائٹس پر شیئر کردی، آڈیو میں راج ناتھ سنگھ کی گفتگو واضح طور پر سنی جاسکتی ہے جس میں کہہ رہے ہیں الیکشن کےلیے لاشیں گرانا ضروری ہے۔

    [bs-quote quote=”اڑی حملہ بھی مودی سرکار کے کہنے پر ہوا ہے، بھارتی سیاست دانوں کی مبینہ آڈیو میں انکشاف” style=”style-8″ align=”left”][/bs-quote]

    راج ناتھ سنگھ اور امیت شاہ کی مبینہ آڈیو گفتگو میں سنسنی خیز انکشافات ہوئے ہیں، انتخابات میں کامیابی کےلیے لاشیں چاہئیں، چناؤ کو جنگ قرار دے کر پلواما میں بھارتی فوجیوں کو مارنے کےلیے بی جے پی نے جان بوجھ کر دھماکا کروایا ہے۔

    مبینہ آڈیو کال میں راج ناتھ سنگھ اور امیت شاہ کو ’اڑی حملہ بھی مودی سرکار کے کہنے پر ہوا ہے‘ کہتے ہوئے سنا جاسکتا ہے۔

    عرصہ درازسےجنوبی کشمیر ہمارےکنٹرول میں نہیں، سابق بھارتی را چیف کے تہلکہ خیز انشافات

    یاد رہے کہ اس سے قبل بھارتی خفیہ ایجنسی ’را‘ کے سابق سربراہ ایس اے دُلت نے ایک انٹر ویو میں تہلکہ خیز انشافات کرتے ہوئے کہا عرصہ درازسے جنوبی کشمیر ہمارےکنٹرول میں نہیں جوکچھ ہورہاہےوہ ہمارے قابومیں نہیں اور زمینی حقائق ہماری گرفت میں نہیں، اس کا اعتراف بہت سینئرآرمی افسراوراپنےوقت کے آرمی کمانڈرجنرل ہڈانے بھی کیاتھا۔

    سابق بھارتی را چیف نے پلوامہ حملے کو انٹیلی جنس کی ناکامی قرار دیتے ہوئے کہا اس قدر بڑی شورش اورحریت پسندی کو فوج کنٹرول نہیں کرسکتی، پاکستان سےبات کئےبغیر کوئی چارہ نہیں۔

    پلوامہ حملہ: پیشگی اطلاع کے باوجود مودی حکومت نے فوجی مروائے، بھارتی سماجی کارکن

    واضح رہے 19 فروری کو مقبوضہ کشمیر کے ضلع پلوامہ میں کار بم حملے میں42 بھارتی فوجی ہلاک اور متعدد زخمی ہوئے تھے، حملے کے فوری بعد بھارت نے پاکستان پر الزام تراشی کا سلسلہ شروع کردیا تھا۔

    بھارتی فوجیوں نے پلواما حملے کا بدلہ لینے کےلیے  کنٹرول لائن کی خلاف ورزی کرتے ہوئے دراندازی کی تھی تاہم پاک فضائیہ نے بروقت کارروائی کی اور بھارتی طیاروں کو بھاگنے پر مجبور کردیا۔ بھارتی طیارے جاتے ہوئے اپنا پے لوڈ جنگل میں گرا کر چلے گئے۔

  • ضمنی انتخابات: الیکشن کمیشن کی ووٹرز کے لیے ہدایات جاری

    ضمنی انتخابات: الیکشن کمیشن کی ووٹرز کے لیے ہدایات جاری

    اسلام آباد: ضمنی انتخابات کے لیے الیکشن کمیشن نے ووٹرز کے لیے ہدایات جاری کردی ہیں۔ ضمنی انتخابات کا میدان کل سجنے جارہا ہے۔

    تفصیلات کے مطابق الیکشن کمیشن نے ضمنی انتخابات میں ووٹرز کے لیے ہدایات جاری کرتے ہوئے کہا ہے کہ ووٹرز ووٹ، پولنگ اسٹیشن اور حلقہ کی معلومات 8300 پر میسج کر کے حاصل کریں۔

    الیکشن کمیشن کے مطابق پولنگ اسٹیشن پر بزرگ شہری، حاملہ خواتین، معذور افراد اور خواجہ سراؤں کو ترجیح دی جائے گی۔

    ووٹ ڈالنے کے لیے اصل شناختی کارڈ ہمراہ لانا ضروری ہے، زائد المیعاد کارڈ پر ووٹ ڈالا جاسکتا ہے، ووٹرز کیمرہ یا موبائل فون پولنگ اسٹیشن میں نہیں لے جاسکیں گے۔

    الیکشن کمیشن کے مطابق پولنگ کا عمل صبح 8 بجے سے شام 5 بجے تک بلا تعطل جاری رہے گا، ’ووٹرز سے درخواست ہے سیکیورٹی اور پولنگ عملے سے تعاون کریں‘۔

    خیال رہے کہ ملک بھر کے 35 حلقوں میں ضمنی انتخابات کل ہونے جارہا ہے۔ ریٹرننگ افسران کو بیلٹ پیپرز پہنچا دیے گئے۔ ضمنی انتخابات کے لیے 641 امیدوار میدان میں ہیں۔

    اس سلسلے میں الیکشن کمیشن نے بھی تیاریاں مکمل کرلی ہیں۔ 1 ہزار 7 سو 27 پولنگ اسٹیشنز کو حساس قرار دیا گیا ہے۔ کسی بھی ناخوشگوار واقعے سے نمٹنے کے لیے پولنگ اسٹیشنز پر فوج تعینات ہوگی۔

  • پشاور سے الیکشن لڑنےکا اعلان، کزن نے کنگ خان کے لیے بڑی مشکل کھڑی کردی

    پشاور سے الیکشن لڑنےکا اعلان، کزن نے کنگ خان کے لیے بڑی مشکل کھڑی کردی

    پشاور: خیبرپختونخواہ سے تعلق رکھنے والی معروف بالی ووڈ اداکار کنگ خان کی کزن نے الیکشن لڑنے کا اعلان کرنے کے ساتھ ہی شاہ خان کے لیے بھارت میں مشکلات کھڑی کردیں۔

    تفصیلات کے مطابق  شاہ رخ خان کے آبائی علاقے پشاور قصہ خوانی بازار کے محلے شاہ ولی قتال سے تعلق رکھنے والی کنگ خان کی چچا زاد بہن نور جہاں نے عام انتخابات میں جنرل نشست سے الیکشن لڑنے کا اعلان کیا۔

    نور جہاں کا کہنا تھا کہ میں شاہ رخ کی چچا زاد بہن ہوں اور آج بھی ہم رابطے میں ہیں مگر یہ تعلقات سیاست یا میری حب الوطنی پر اثر انداز نہیں ہوسکتے، اُن کا کہنا تھا کہ پشاور کے صوبائی حلقے پی کے 77 سے آزاد امیدوار کے طور پر الیکشن لڑوں گی تاکہ خواتین کے حق میں اسمبلی فارم سے آواز بلند کروں۔

    کنگ خان کی کزن نے الیکشن لڑنے کا اعلان کیا تو پڑوسی ملک بھارت میں یہ خبر جنگل میں آگ کی طرح پھیل گئی، کئی میڈیا چینلز نے اسے سنسنی کے طور پر پیش کیا تاکہ انتہا پسندوں کے مسلمان اداکار کے خلاف جزبات کو بھڑکایا جاسکے۔

    ایک صارف نے سوشل میڈیا پر شاہ رخ خان سے سوال کیا کہ ’کیا یہ سچ ہے آپ کی کزن پاکستان میں الیکشن لڑ رہی ہیں؟ آپ بھارت سے پیسہ کماتے ہیں جبکہ آپ کی بہن ہمارے دشمن ملک میں الیکشن لڑ رہی ہیں، آخر یہ کون سا ایجنڈا ہے؟‘ْ

    میانک مانی نامی صارف کا کہنا تھا کہ ’اب سمجھ آیا شاہ رخ خان پاکستان کو کیوں پسند کرتے ہیں‘۔

    ایک اور صارف نے لکھا کہ ’شاہ رخ خان کی پاکستان سے محبت کی یہی وجہ ہے، میرے خیال سے انہیں بھی پاکستان کے انتخابات میں حصہ لینا چاہیے‘۔

    گجریتی نامی صارف نے کنگ خان کو مبارک باد دیتے ہوئے کہا کہ ’ایک کام کرو کہ پاکستان چلے جاؤ اور بھارت واپس کبھی نہیں آنا‘۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔