فیصل آباد: 50 سے زائد سرکاری ادارے بجلی بلوں کی ادائیگی میں ایک ارب 52 کروڑ 8 لاکھ کے نادہندہ نکلے ہیں۔
تفصیلات کے مطابق اے آر وائی نیوز نے فیسکو کے نادہندہ اداروں کی فہرست حاصل کر لی ہے، جس میں انکشاف ہوا ہے کہ پچاس سے زائد ایسے سرکاری ادارے ہیں جنھوں نے بجلی بل ادا نہیں کیے، اور واجبات ایک ارب 52 کروڑ 8 لاکھ تک پہنچ گئے۔
واسا فیسکو کا ایک ارب 39 کروڑ 58 لاکھ 55 ہزار روپے کا نادہندہ ہے، پنجاب پولیس 2 کروڑ 10 لاکھ ، جیل خانہ جات ایک کروڑ 85 لاکھ روپے اور خود فیسکو دفاتر نے 14 لاکھ 11 ہزار روپے کے واجبات ادا نہیں کیے۔
ڈسٹرکٹ گورنمنٹ نے ایک کروڑ سے زائد، ٹی ایم اے چنیوٹ نے ایک کروڑ 59 لاکھ روپے، ریلوے نے 68 لاکھ 43 ہزار، ریونیو ڈیپارٹمنٹ نے 68 لاکھ 22 ہزار روپے کے بل نہیں دیے، ایف آئی اے 19 لاکھ 41 ہزار روپے کی نادہندہ ہے۔
پاسپورٹ آفس نے 11 لاکھ 66 ہزار روپے ادا کرنے ہیں، ضلعی حکومت جھنگ نے ایک کروڑ 35 لاکھ روپے کے بجلی بلز ادا نہیں کیے، ضلعی محکمہ تعلیم 19 لاکھ 25 ہزار، اور محکمہ صحت 7 لاکھ 92 ہزار روپے کا نادہندہ ہے۔
