کراچی : پی آئی اے سی بی اے پیپلز یونٹی دیگر نمائندہ تنظیموں کی جانب سے قومی ایرلائن کی نجکاری کے خلاف کراچی ایرپورٹ سے احتجاجی ریلی نکالی گئی۔
ریلی میں پی آئی اے کی نجکاری اور ایرلائن کی دو حصوں میں تقسیم کے خلاف نعرے لگائے گئے، ریلی سے پیپلز یونٹی کے صدر ہدایت اللہ خان، ساسا کے جنرل سیکریٹری صفدر انجم سمیت دیگر نے خطاب کیا
ریلی سے خطاب میں رہنماؤں نے کہا کہ قومی ایرلائن کا خسارہ 80 ارب روہے سے بڑھ کر 120روپے ہوگیا۔ صدر سی بی اے کا کہنا تھا کہ خسارے کو ختم کرنے کے بجائے ایرلائن کی نجکاری کی جارہی ہے یہ ہمیں کسی صورت منظور نہیں ہے۔
ہدایت اللہ خان نے کہا کہ پی آئی اے کی نجکاری روکنے کے لئے ملازمین کا معاشی قتل عام روکنے کے لیے کسی حد تک جانے سے گریز نہیں کرینگے، ایرلائن کی نجکاری کا بل فوری واپس لیا جائے ورنہ پی آئی اے کی تمام نمائندہ تنظیمیں 15 اگست کو پریس کانفرنس کے ذریعے آئندہ کا لائحہ عمل کا اعلان کرینگے۔
جنرل سیکریٹری ساسا صفدر انجم کا کہنا تھا کہ پی آئی اے کا مسلسل بڑھتا ہوا خسارہ انتظامیہ کی نااہلی ہے، تجربہ کار انتظامیہ کو لاکر ایرلائن کو منافع بخش بنایا جاسکتا ہے۔
عقیل صدیقی صدر ساسا پی آئی اے نے کہا کہ پی آئی اے کو بیچنے کے بجائے بجٹ میں ایرلائن کی بحالی کے لئے 100 ارب روہے مختص کیے جائیں۔،
انہوں نے کہا کہ انتظامی نااہلی کی سزا ملازمین کے بجائے ذمہ دار افراد کو دی جائے اور ادارے کی نجکاری کا بل فوری واپس لیا جائے۔
پیاسی کے صدر نجیب الرحمان کا کہنا تھا کہ پی آئی اے کے ریٹائرڈ ملازمین کی پینشن میں کئی سالوں سے اضافہ نہیں کیا گیا،لہٰذا اس جانب بھی توجہ دی جائے۔
