ARYNews.tv | Urdu – Har Lamha Bakhabar

Tag: England

  • پاکستان اور انگلینڈ کی ویمنز ٹیمیں آج پہلے ٹی20 میں ٹکرائیں گی

    پاکستان اور انگلینڈ کی ویمنز ٹیمیں آج پہلے ٹی20 میں ٹکرائیں گی

    کوالالمپور: پاکستان اور انگلینڈ کی ویمنز ٹیموں کے درمیان ٹی 20 سیزیر کا پہلا میچ آج کھیلا جائے گا، ٹرافی کی رونمائی کردی گئی۔

    تفصیلات کے مطابق پاکستان اور انگلینڈ کی ویمنز ٹیموں کے درمیان ٹی ٹوئنٹی سیریز کی ٹرافی کی رونمائی کردی گئی، سیریز کا پہلا میچ آج کوالالمپور میں کھیلا جائے گا، انگلش ٹیم ون ڈے سیریز 2-0 سے اپنے نام کرچکی ہے۔

    ایک روزہ سیریز میں کامیابی کے باعث ٹی ٹوئنٹی سیریز میں انگلش ٹیم کو پاکستان پر نفسیاتی برتری بھی حاصل ہے، جبکہ قومی ٹیم کے لیے ٹی 20 سیریز اپنے نام کرنا ایک چیلنج بن چکا ہے، پاکستان ٹیم رواں سال 10 میں سے 8 ٹی ٹوئنٹی میچز اپنے نام کرچکی ہے جس کے باعثٖ ٹیم کا مورال بلند ہوگا۔

    اس سے قبل پاکستان اور انگلینڈ کی ویمنز ٹیمیں دس مرتبہ مدمقابل آچکی ہیں، جس میں سے 9 میچز انگلینڈ کے نام رہے، البتہ قومی ٹیم نے جیت کے عزم کا اظہار کیا ہے۔

    امید ہے مستقبل میں سیریز پاکستان میں ہوں گی: کپتان ویمن ٹیم

    واضح رہے کہ قومی خواتین کرکٹ ٹیم کی سابق کپتان ثناء میر انٹرنیشنل کرکٹ سے بریک لینے کا اعلان کرچکی ہیں، ان کا کہنا تھا کہ میری نیک خواہشات پاکستان ویمنز کرکٹ ٹیم کے ساتھ ہیں، انگلینڈ کے خلاف ہونے والی سیریز میں شرکت نہیں کروں گی۔

  • انگلینڈ کے خلاف سیریز کے لیے قومی خواتین کرکٹ اسکواڈ کا اعلان

    انگلینڈ کے خلاف سیریز کے لیے قومی خواتین کرکٹ اسکواڈ کا اعلان

    لاہور: انگلینڈ کے خلاف سیریز کے لیے قومی خواتین کرکٹ ٹیم کا اعلان کردیا گیا، 3 ایک روزہ اور 3 ٹی ٹوئنٹی میچوں پر مشتمل سیریز کے لیے علیحدہ علیحدہ اسکواڈ ہے۔

    تفصیلات کے مطابق ایک روزہ اور ٹی ٹوئنٹی سیریز میں شریک قومی اسکواڈز میں 4،4 تبدیلیاں کی گئی ہیں، ایک روزہ اور ٹی ٹوئنٹی خواتین کرکٹ ٹیم کی قیادت بسمہ معروف کریں گی۔

    جبکہ دیگر کھلاڑیوں میں عالیہ ریاض، انعم امین، عروب شاہ، ڈیانابیگ اور فاطمہ ثنا شامل ہیں۔ جویریہ خان، کائنات حفیظ، ناہیدہ خان، نشرہ سندھو، نداڈار اور عمیمہ سہیل کو بھی ٹیم کا حصہ بنایا گیا ہے۔ جبکہ کائنات حفیظ اور رامین شمیم پہلی بار قومی خواتین ایک روزہ کرکٹ ٹیم کا حصہ ہیں۔

    پاکستان ویمنز بمقابلہ انگلینڈ: 20 ممکنہ کھلاڑیوں کی تربیت شروع

    رامین شمیم، سدرہ امین اور سدرہ نواز کو بھی ایک روزہ اسکواڈ میں شامل کیا گیا ہے۔

    ٹی ٹوئنٹی اسکواڈ میں بسمہ معروف (کپتان)، عالیہ ریاض، انعم امین، عروب شاہ، ڈیانا بیگ، فاطمہ ثنا، ارم جاوید، جویریہ خان، ناہیدہ خان اور نداڈار شامل ہیں۔ 15 سالہ لیگ اسپنر عروب شاہ پہلی بار ٹی ٹوئنٹی ٹیم میں شامل ہوئی ہیں، جبکہ آل راؤنڈر نداڈار کی دونوں اسکواڈز میں واپسی ہوئی۔

    خیال رہے کہ انگلینڈ کے خلاف 3ایک روزہ اور3 ٹی 20 انٹرنیشنل میچوں پر مشتمل سیریز ہوگی، سیریز 9تا 20 دسمبر تک ملائیشیا میں شیڈول ہے، پاکستان ویمنز کرکٹ ٹیم 30 نومبر کو ملائیشیا روانہ ہوگی۔

    واضح رہے کہ قومی خواتین کرکٹ ٹیم کی سابق کپتان ثناء میر انٹرنیشنل کرکٹ سے بریک لینے کا اعلان کرچکی ہیں، ان کا کہنا تھا کہ میری نیک خواہشات پاکستان ویمنز کرکٹ ٹیم کے ساتھ ہیں، آئندہ ماہ انگلینڈ کے خلاف ہونے والی سیریز میں شرکت نہیں کروں گی۔

  • انگلینڈ اور نیوزی لینڈ کے درمیان ٹور میچ بلانتیجہ ختم

    انگلینڈ اور نیوزی لینڈ کے درمیان ٹور میچ بلانتیجہ ختم

    ولنگٹن: انگلینڈ الیون اور نیوزی لینڈ الیون کے درمیان کھیلا گیا دو روزہ ٹور میچ بغیر ہار جیت کے ختم ہوگیا۔

    تفصیلات کے مطابق انگلینڈ الیون اور نیوزی لینڈ الیون کے درمیان ولنگٹن میں دو روزہ ٹور میچ کھیلا گیا جو بلانتیجہ رہا، انگلینڈ نے اپنی پہلی اننگز 376 رنز 2 کھلاڑی آﺅٹ پر ڈیکلیئر کی، زیک کراولے اور ڈومینک سیبلے حریف بولرز کے سامنے ڈٹے رہے۔

    دونوں بلے بازوں نے مشکل وقت میں انتہائی شاندار اور ذمہ دارانہ بیٹنگ کا مظاہرہ کرتے ہوئے دوسری وکٹ پر 212 رنز کی ناقابل شکست شراکت داری قائم کرکے ٹیم کی پوزیشن مستحکم کی، زیک کراولے اور ڈومینک سیبلے سنچریاں اسکور کرنے کے بعد ریٹائرڈ ہرٹ ہوگئے، بٹلر 38 اور اسٹوکس 30 رنز کے ساتھ ناٹ آﺅٹ رہے۔

    جواب میں دوسرے روز کھیل ختم ہونے تک نیوزی لینڈ الیون نے 4 وکٹوں کے نقصان پر 266 رنز بنائے اور میچ ہار جیت کے فیصلے کے بغیر ختم ہوگیا، فن ایلن 104 رنز بناکر ریٹائرڈ ہوگئے، جیکب بھولا 61 رنز کے ساتھ دوسرے نمایاں بلے باز رہے، سندیپ پٹیل 48 اور شیپلے 23 رنز کے ساتھ ناٹ آﺅٹ رہے۔

    انگلینڈ الیون کے جوفرا آرچر نے دو ثام کیورن اور اسٹورٹ براڈ نے ایک ایک کھلاڑی کو آﺅٹ کیا اور اس طرح میچ بلانتیجہ ختم ہوگیا۔

    پہلا ٹیسٹ میچ: نیوزی لینڈ اور انگلینڈ کا ٹاکرا کب ہوگا؟

    خیال رہے کہ نیوزی لینڈ اور انگلینڈ کے درمیان پہلا ٹیسٹ میچ 21نومبر سے 25نومبر تک مونٹ مونگنوئی میں کھیلا جائے گا۔

    ٹی ٹوئنٹی سیریز اور دو روزہ ٹور میچ کے بعد انگلینڈ کی ٹیم دو ٹیسٹ میچوں کی سیریز سے قبل ایک چار روزہ ٹور میچ بھی کھیلے گی جس کے بعد دونوں ٹیموں کے درمیان پہلا ٹیسٹ میچ 21 سے 25 نومبر تک مونٹ مونگنوئی کھیلا جائے گا۔ جبکہ دوسرا اور آخری ٹیسٹ میچ 29 نومبر سے 3 دسمبر تک ہملٹن میں کھیلا جائے گا۔

  • پہلا ٹیسٹ میچ: نیوزی لینڈ اور انگلینڈ کا ٹاکرا کب ہوگا؟

    پہلا ٹیسٹ میچ: نیوزی لینڈ اور انگلینڈ کا ٹاکرا کب ہوگا؟

    نیپئر: نیوزی لینڈ اور انگلینڈ کے درمیان پہلا ٹیسٹ میچ 21نومبر سے 25نومبر تک مونٹ مونگنوئی میں کھیلا جائے گا۔

    تفصیلات کے مطابق ٹی ٹوئنٹی سیریز کے بعد انگلینڈ کی ٹیم دو ٹیسٹ میچوں کی سیریز سے قبل ایک چار روزہ ٹور میچ کھیلے گی جس کے بعد دونوں ٹیموں کے درمیان پہلا ٹیسٹ میچ 21 سے 25 نومبر تک مونٹ مونگنوئی کھیلا جائے گا۔

    جبکہ دوسرا اور آخری ٹیسٹ میچ 29 نومبر سے 3 دسمبر تک ہملٹن میں کھیلا جائے گا۔

    دوسری جانب انگلینڈ کرکٹ بورڈ نے دورہ سری لنکا کے لیے شیڈول کا اعلان بھی کر دیا ہے جس کے مطابق ٹیسٹ سریز19مارچ سے شروع ہوگی، انگلش ٹیم آئندہ سال مارچ میں سری لنکا کا دورہ کرے گی جہاں وہ دو ٹیسٹ میچز کی سیریز کھیلے گی۔

    دونوں ٹیموں کے درمیان سیریز کا پہلا ٹیسٹ 19 سے 23 مارچ تک گال انٹرنیشنل اسٹیڈیم جبکہ دوسرا ٹیسٹ 27 سے 31 مارچ تک آر پریماداسا اسٹیڈیم، کولمبو میں کھیلا جائے گا۔ ٹیسٹ سیریز سے قبل انگلش ٹیم دو ٹور میچز بھی کھیلے گی۔

    خیال رہے کہ 10 نومبر کو انگلینڈ اور نیوزی لینڈ کے درمیان سیریز کا پانچواں اور آخری ٹی ٹوئنٹی میچ ٹائی ہوگیا تھا، جس کے بعد سپر اوور میں انگلش ٹیم نے کامیابی کے ساتھ سیریز بھی تین دو سے اپنے نام کرلی۔

  • تیسراٹی ٹوئنٹی: نیوزی لینڈ نے انگلینڈ کو شکست دے دی

    تیسراٹی ٹوئنٹی: نیوزی لینڈ نے انگلینڈ کو شکست دے دی

    ولنگٹن: نیوزی لینڈ نے تیسرے ٹی ٹوئنٹی میچ میں انگلینڈ کو چودہ رنز سے شکست دے کر پانچ میچز کی سیریز میں دو ایک کی برتری حاصل کرلی۔

    تفصیلات کے مطابق ولنگٹن میں کھیلے جانے والے تیسرے ٹی ٹوئنٹی میچ میں نیوزی لینڈ نے انگلینڈ کو شکست دے دی، نیوزی لینڈ کے آل راؤنڈر گرینڈہوم شاندار بیٹنگ پر مین آف دی میچ قرار پائے۔

    تیسرے ٹی ٹوئنٹی میں نیوزی لینڈ نے پہلے ٹاس جیتا پھر میچ بھی جیت لیا، پہلے بیٹنگ کرتے ہوئے بلیک کیپس نے ایک سواسی رنز بنائے۔

    ڈی گرینڈ ہوم نے شاندار نصف سنچری جڑی، جواب میں انگلش ٹیم کو اچھا آغاز ملا، اوپنر ڈیوڈ ملان نے پچپن اور جیمز ونس نے انچاس رنز بنائے۔

    ایک سو انتالیس پر کپتان مورگن کی وکٹ گری تو انگلش بیٹنگ لائن سنبھل نہ سکی، لوکی فرگیوسن اور بلیئر ٹکنر کی زبردست بولنگ کی بدولت کیویز نے انگلینڈ کو چودہ رنز سے شکست دی۔

    دوسرا ٹی20: نیوزی لینڈ نے انگلینڈ سے شکست کا بدلہ لے لیا

    یاد رہے کہ نیوزی لینڈ نے دوسرے ٹی 20 انٹرنیشنل میں انگلینڈ کو 21 رنز سے شکست دے کر سیریز ایک ایک سے برابر کی تھی۔

    جبکہ انگلینڈ نے نیوزی لینڈ کو پہلے ٹی 20 میچ میں 7 وکٹوں سے شکست دے کر سیریز میں 1-0 کی برتری حاصل کی تھی۔

  • دوسرا ٹی20: نیوزی لینڈ نے انگلینڈ سے شکست کا بدلہ لے لیا

    دوسرا ٹی20: نیوزی لینڈ نے انگلینڈ سے شکست کا بدلہ لے لیا

    ولنگٹن: نیوزی لینڈ نے دوسرے ٹی 20 انٹرنیشنل میں انگلینڈ کو 21 رنز سے شکست دے کر سیریز ایک ایک سے برابر کرلی۔

    تفصیلات کے مطابق نیوزی لینڈ نے مقررہ بیس اورز میں آٹھ وکٹوں کے نقصان پر 176رنز بنائے، ہدف کے تعاقب میں انگلش ٹیم 155 رنز پر ڈھیر ہوگئی، مچل عمدہ کار کردگی مین آف دی میچ قرار پائے۔

    نیوزی لینڈ نے دوسرے ٹی 20 انٹرنیشنل میں انگلینڈ کو 21 رنز سے شکست دے دی جس کے باعث سیریز 1-1سے برابر ہوگئی، نیوزی لینڈ ٹیم شکست کا بدلہ لینے کے لیے بھرپور تیاری سے میدان میں اتری۔

    اتوار کو ویسٹپیک سٹیڈیم، ولنگٹن میں کھیلے گئے سیریز کے دوسرے ٹی 20 میچ میں نیوزی لینڈ نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 176 رنز بنائے۔

    جمی نیشم نے 42 اور مارٹن گپٹل نے 41 رنز کی عمدہ اننگز کھیلی، کرس جورڈن نے تین اور سام کرن نے دو کھلاڑیوں کو آﺅٹ کیا۔

    انگلینڈ کی ٹیم مطلوبہ ہدف حاصل کرنے میں ناکام رہی اور پوری ٹیم 19.5 اوورز میں 155 رنز بناکر آﺅٹ ہوگئی۔ ڈیوڈ میلان 39، کرس جورڈن 36 اور ایون مورگن 32 رنز کے ساتھ نمایاں رہے۔

    پہلاٹی ٹوئنٹی: انگلینڈ کے ہاتھوں نیوزی لینڈ کو 7 وکٹوں سے شکست

    مچل سینٹنر نے تین جبکہ لوکی فرگوسن، ایش سودی اور ٹم ساﺅدی نے دو، دو کھلاڑیوں کو آﺅٹ کیا ۔ مچل کو مین آف دی میچ قرار دیا گیا۔

    یاد رہے کہ انگلینڈ نے نیوزی لینڈ کو پہلے ٹی 20 میچ میں 7 وکٹوں سے شکست دےکر سیریز میں 1-0 کی برتری حاصل کر لی تھی۔

    خیال رہے کہ کرائسٹ چرچ میں کھیلے جانے والے پہلے ٹی 20 میچ میں مہمان ٹیم نے ٹاس جیت کرپہلے بولنگ کا فیصلہ کیا تھا، پراسر حکمت علمی اور کھلاڑیوں کی بہتر کارکردگی کے باعث پہلا ٹی ٹوئنٹی میچ اپنے نام کرلیا۔

  • دوسرا ٹی20: نیوزی لینڈ اور انگلینڈ آج مدمقابل ہوں گے

    دوسرا ٹی20: نیوزی لینڈ اور انگلینڈ آج مدمقابل ہوں گے

    کرائسٹ چرچ: نیوزی لینڈ اور انگلینڈ کی کرکٹ ٹیموں کے درمیان پانچ ٹی ٹوننٹی میچوں پر مشتمل سیریز کا دوسرا میچ (آج) اتوار کو کھیلا جائے گا۔

    تفصیلات کے مطابق نیوزی لینڈ اور انگلینڈ کے درمیان باضابطہ پانچ ٹی 20 میچوں کی سیریز کا دوسرا ٹی ٹوئنٹی میچ 3 نومبر کو ویلنگٹن، تیسرا ٹی ٹوئنٹی میچ 5 نومبر کو نیلسن، چوتھا ٹی ٹوئنٹی میچ 8 نومبر کو نیپئر جبکہ پانچواں اور آخری ٹی ٹوئنٹی میچ 10 نومبر کو آکلینڈ میں کھیلا جائے گا۔

    اس کے بعد انگلینڈ کی ٹیم دو ٹیسٹ میچوں کی سیریز سے قبل ایک چار روزہ ٹور میچ کھیلے گی جس کے بعد دونوں ٹیموں کے درمیان پہلا ٹیسٹ میچ 21 سے 25 نومبر تک مونٹ مونگنوئی جبکہ دوسرا اور آخری ٹیسٹ میچ 29 نومبر سے 3 دسمبر تک ہملٹن میں کھیلا جائے گا۔

    یاد رہے کہ انگلینڈ نے نیوزی لینڈ کو پہلے ٹی 20 میچ میں 7 وکٹوں سے شکست دےکر سیریز میں 1-0 کی برتری حاصل کر لی تھی۔

    خیال رہے کہ کرائسٹ چرچ میں کھیلے جانے والے پہلے ٹی 20 میچ میں مہمان ٹیم نے ٹاس جیت کرپہلے بولنگ کا فیصلہ کیا تھا، پراسر حکمت علمی اور کھلاڑیوں کی بہتر کارکردگی کے باعث پہلا ٹی ٹوئنٹی میچ اپنے نام کرلیا۔

    پہلاٹی ٹوئنٹی: انگلینڈ کے ہاتھوں نیوزی لینڈ کو 7 وکٹوں سے شکست

    نیوزی لینڈ نے پہلے بیٹنگ کرتے ہوئے مقررہ بیس آووزو میں پانچ وکٹوں کے نقصان پر 153 رنز بنائے تھے۔ جواب میں ہدف کا تعاقب کرتے ہوئے انگلینڈ نے 18.3 اوورز میں ٹارگٹ پورا کرلیا۔

  • پیشکش کے باوجود مجھے پاکستان ٹیم کیلئے کھیلنا ہے انگلینڈ کیلئے نہیں، جنید خان

    پیشکش کے باوجود مجھے پاکستان ٹیم کیلئے کھیلنا ہے انگلینڈ کیلئے نہیں، جنید خان

    کراچی : قومی کرکٹ ٹیم کے فاسٹ بولر جنید خان نے کہا ہے کہ برطانوی شہریت رکھنے کے باوجود میرے لیے پاکستان سب سے پہلے ہے، برطانوی پیشکش کے باوجود مجھے پاکستان ٹیم کیلئے کھیلنا ہے انگلینڈ کیلئے نہیں۔

    ان خیالات کا اظہار انہوں نے اے آر وائی نیوز کے نمائندے علی حسن سے گفتگو کرتے ہوئے کیا، ٹیسٹ کرکٹر جنید خان کا کہنا تھا کہ مجھے کاؤنٹی سے چار سال کے معاہدے کی پیشکش ہوئی تھی اگر معاہدہ کرلیتا تو پاکستان کا سیزن اوورسیز کھلاڑی بن کر کھیلنا پڑتا۔

    انہوں نے کہا کہ کاؤنٹی کھیلنے کا مطلب انگلینڈ ٹیم میں شمولیت کا راستہ بننا ہے، ابھی میرا مقصد ڈومیسٹک کرکٹ کھیل کر پاکستانی ٹیم میں کم بیک کرنا ہے کیونکہ مجھے صرف پاکستان ٹیم کیلئے کھیلنا ہے انگلینڈ کیلئے نہیں۔

    برطانوی شہریت رکھنے کے باوجود میرے لیے پاکستان پہلے ہے، پاکستان میں جو عزت ملتی ہے وہ انگلش کرکٹر بن کر بھی نہیں مل سکتی۔

    جنید خان کا مزید کہنا تھا کہ صوابی کے چھوٹے سے گاؤں سے آیا ہوں، میری پرفارمنس کیا رہی سب لوگ جانتے ہیں، امید یہی ہے کہ میرا ڈومیسٹک سیزن اچھا گزرے گا۔

    ایک سوال کے جواب میں جنید خان کا کہنا تھا کہ ورلڈ کپ2019سے باہر ہونے پر مجھے کافی مایوسی ہوئی تھی، منہ پر ٹیپ لگا کر تصویر پوسٹ کرنا میرا کچھ زیادہ ہی ردعمل تھا تاہم ان دنوں میں بہت اپ سیٹ بھی تھا۔

    جب شائقین نےمجھ سےکہا کہ میری اس پوسٹ سے پاکستان کرکٹ کا نام خراب ہورہا ہے تومیں نے پوسٹ ڈیلیٹ کردی۔

    میں ایسا کام کبھی نہیں کروں گا جس سے ملک کا نام خراب ہو، میں نے ہمیشہ اپنے ذاتی مفاد سے پہلے ملک کو مقدم رکھا ہے۔

  • ٹیم فائنل میں ہار جاتی تو دوبارہ کرکٹ کھیلنا میرے لیے مشکل ہوجاتا، جوز بٹلر

    ٹیم فائنل میں ہار جاتی تو دوبارہ کرکٹ کھیلنا میرے لیے مشکل ہوجاتا، جوز بٹلر

    لندن: کرکٹ ورلڈکپ چیمپئن بننے والی انگلش ٹیم کے وکٹ کیپر اور جارح مزاج بیٹسمین جوز بٹلر نے کہا ہے کہ اگر ان کی ٹیم فائنل میں ہار جاتی تو ان کے لیے دوبارہ کرکٹ کھیلنا مشکل ہوجاتا۔

    ایک انٹرویومیں جوز بٹلر نے ورلڈکپ ٹرافی اٹھانے کے بعد پہلی مرتبہ اس شکست کے خوف سے بھی پردہ اٹھادیا جو ان کے چہرے پر میچ کے اختتامی لمحات میں ان کے چہرے پر دکھائی دے رہا تھا۔

    انگلش وکٹ کیپر کا کہنا تھا کہ انہوں نے اس فائنل سے قبل 8 مرتبہ اپنی ٹیموں کی جانب سے فائنل مقابلوں میں حصہ لیا جس میں 7 مرتبہ ناکامی کا سامنا کرنا پڑا۔ سمرسیٹ کی جانب سے کھیلتے ہوئے انگلینڈ کے ڈومیسٹک ٹورنامنٹس کے ساتھ ساتھ انگلینڈ کی جانب سے 2013 میں چیمپیئنز ٹرافی کا فائنل اور 2016 میں ویسٹ انڈیز کے خلاف ٹی ٹوئنٹی فائنل ایسے میچز ہیں جس میں ان کی ٹیم کو شکست کا سامنا کرنا پڑا۔

    جوز بٹلر کا کہنا تھا کہ اپنے سامنے حریف ٹیم کو ٹرافی اٹھاتے ہوئے دیکھنا بہت تکلیف کا باعث ہوتا ہے اور یہ درد میں ایک مرتبہ پھر برداشت نہیں کرسکتا تھا۔

    انہوں نے کہا کہ مجھے ڈر لگ رہا تھا کہ اگر ہم گئے تو نہیں جانتا کہ دوبارہ کرکٹ کیسے کھیلوں گا، یہ زندگی میں ایک مرتبہ ملنے والا موقع تھا، ایک ورلڈکپ کا فائنل وہ بھی لارڈز میں۔

    بین اسٹوکس کو انگلینڈ کا اعلیٰ ترین اعزاز نائٹ ہُڈ دیا جائے گا

    انہوں نے کہا کہ یہ ایک قسمت کی طرح محسوس ہوا، میں سوچ رہا تھا کہ اگر ایسا (فائنل میں فتح) نہیں ہوتا، تو میرے پاس کافی عرصے تک دوبارہ کرکٹ بیٹ اٹھانے کی خود اعتمادی نہیں ہوگی۔

    جوز بٹلر نے آخری لمحات کے بارے میں بات کرتے ہوئے کہا کہ گراؤنڈ سے باہر بیٹھ کر میچ دیکھنے والوں پر دباؤ ہوتا ہے، تاہم ایسا دباؤ کھلاڑیوں پر نہیں ہوتا، وہ ایسی صورتحال کے لیے ہی تیار ہوتے ہیں۔

  • بین اسٹوکس کو انگلینڈ کا اعلیٰ ترین اعزاز نائٹ ہُڈ دیا جائے گا

    بین اسٹوکس کو انگلینڈ کا اعلیٰ ترین اعزاز نائٹ ہُڈ دیا جائے گا

    لندن: ورلڈ کپ فائنل میں شاندار اننگز کھیل کر انگلینڈ کو ورلڈ چیمپئن بنوانے میں اہم کردار ادا کرنے والے آل راؤنڈر بین اسٹوکس کو انگلینڈ کا اعلیٰ ترین اعزاز نائٹ ہُڈ دیا جائے گا۔

    تفصیلات کے مطابق بین اسٹوکس کو انگلینڈ کے اعلیٰ ترین اعزازات میں سے نائٹ ہڈ سے نوازا جائے گا۔ لارڈز کے تاریخی میدان پر کھیلے گئے ورلڈ کپ فائنل میں اسٹوکس نے ٹیم کو ورلڈ کپ جتوانے میں اہم کردار ادا کیا تھا۔

    فائنل میچ میں بین اسٹوکس نے چار وکٹیں جلد گرنے کے بعد ناقابل شکست 84 رنز کی اننگز کھیلنے کے ساتھ ساتھ جوز بٹلر کے ہمراہ اہم شراکت قائم کی جس کی بدولت انگلینڈ کی ٹیم کی میچ میں واپسی ہوئی تھی۔

    انگلینڈ اور نیوزی لینڈ کے درمیان یہ فائنل میچ ٹائی ہوا اور پھر سپر اوور میں بھی میچ ٹائی ہونے پر انگلینڈ کو میچ میں زیادہ باؤنڈریز مارنے کی بنیاد پر ورلڈ چمپئن قرار دیا گیا۔

    بین اسٹوکس کو ان کی شاندار کارکردگی پر میچ کا بہترین کھلاڑی قرار دیا گیا اور اب انہیں انگلینڈ کے اہم ترین اعزازات میں سے ایک نائٹ ہڈ سے نوازا جائے گا۔

    تھریسامے کی جگہ انگلینڈ کے نئے وزیر اعظم بننے کی ریس میں شامل جانسن اور ہنٹ دونوں سے جب پوچھا گیا کہ کیا اسٹوکس کو نائٹ ہڈ دیا جائےگا تو انہوں نے اس کی تصدیق کی۔

    انگلینڈ پہلی بار کرکٹ ورلڈ کپ کا چیمپئن بن گیا ، نیوزی لینڈ کو شکست

    یہ اعزاز کسی بھی فرد کو اس کی برطانیہ کے لیے شاندار خدمات پر بادشاہ یا ملکہ برطانیہ کی طرف سے دیا جاتا ہے اور جس شخص کو یہ اعزاز دیا جاتا ہے وہ اپنے نام کے ساتھ سر لگا سکتا ہے۔

    اگر بین اسٹوکس کو یہ اعزاز دیا جاتا ہے تو وہ اسے وصول کرنے والے انگلینڈ کے 12ویں اور مجموعی طور پر 23ویں کرکٹر ہوں گے۔ اس سے قبل سابق عظیم انگلش اوپننگ بلے باز ایلسٹر کک وہ آخری کھلاڑی تھے جنہیں یہ اعزاز دیا گیا تھا۔