اسلام آباد: آئی ایم ایف کی کنٹری ڈائریکٹر ایستھر پیریز نے کہا ہے کہ پاکستان نے بجٹ میں ٹیکس گزاروں کی تعداد بڑھانے کا موقع گنوا دیا ہے۔
تفصیلات کے مطابق اے آر وائی نیوز سے گفتگو کرتے ہوئے آئی ایم ایف کی کنٹری ڈائریکٹر ایستھر پیریز نے کہا ہے کہ حکومت پاکستان نے ٹیکس آمدن سے ہونے والے اخراجات میں منصفانہ کمی نہیں کی، نئے بجٹ میں ٹیکس گزاروں کی تعداد بڑھانے کا موقع گنوا دیا گیا۔
انھوں نے کہا کہ بجٹ منظوری سے قبل اسے بہتر بنانے کے لیے پاکستان کے ساتھ کام کرنے کو تیار ہیں، پاکستان کے ساتھ پالیسی بات چیت جاری ہے۔
ایستھر پیریز نے کہا خرچہ کم کر کے بے نظیر انکم سپورٹ پروگرام اور ترقیاتی منصوبوں کے لیے بہتر پلاننگ ہو سکتی تھی، توانائی کے شعبے میں سرمائے کی کمی کو دور کرنے کے لیے اقدامات کی ضرورت ہے۔
کنٹری ڈائریکٹر کا کہنا تھا کہ آئی ایم ایف نئی ٹیکس ایمنسٹی اسکیم کے سخت خلاف ہے، ایمنسٹی اسکیم جیسے اقدام معیشت کے لیے سازگار نہیں ہیں۔
ایستھر پیریز کا کہنا تھا کہ پاکستان میں معیشت کی بہتری کے لیے مسلسل کوششیں کر رہے ہیں۔
