ضلعی انتظامیہ اور پولیس نے راولپنڈی اسلام آباد میں ہونے والی ہنگامہ آرائی میں نقصانات کے اعداد و شمار کی رپورٹ جاری کردی۔
تفصیلات کے مطابق اسلام آباد میں احتجاج اور توڑ پھوڑ کے معاملے پر وفاقی پولیس نے تفصیلات جاری کردی ہیں جس میں بتایا گیا ہے کہ پُرتشدد مظاہروں کے دوران 25کروڑ روپے کی سرکاری املاک کو نقصان پہنچا۔
اسلام آباد پولیس کے مطابق مظاہرین نے ایس پی انڈسٹریل ایریا کے دفتر سمیت 12گاڑیوں اور34موٹر سائیکل جلائیں، ایس پی نوشیر وان ،اے ایس پی عبدالعلیم اور اے ایس پی اسد علی زخمی ہوئے۔
رپورٹ میں کہا گیا ہے کہ تھانہ ترنول، تھانہ سنگجانی اور تھانہ رمنا پر مسلح مظاہرین حملہ آور ہوئے، جس کے نتیجے میں 11ایف سی اہلکار اور 71 پولیس افسران و جوان پر تشدد مظاہروں میں زخمی ہوئے۔
ترجمان کا کہنا ہے کہ ہنگامہ آرائی میں ملوث شرپسند عناصر کے خلاف 26 مقدمات درج کیے گئے ہیں، اسلام آباد پولیس نے پر تشدد کارروائیوں میں ملوث 564 افراد کو حراست لیا۔
اس کے علاوہ ضلعی انتظامیہ راولپنڈی کی جانب سے نقصانات کے اعدادو شمار کی رپورٹ میں بتایا گیا ہے کہ راولپنڈی میں مظاہروں کے دوران سرکاری و نجی املاک کو10کروڑ کا نقصان پہنچا۔
رپورٹ کے مطابق حمزہ کیمپ کی عمارت پر پتھراؤ ، جلاؤ گھیراؤ سے6 لاکھ روپے کا نقصان ہوا، سکستھ روڈ میٹرو بس اسٹیشن کے نقصان کا تخمینہ 6کروڑ روپے مالیت لگایا گیا ہے، فیض آباد میٹرو بس اسٹیشن کے نقصان کا تخمینہ5 لاکھ ورپے ہے۔
ضلعی انتظامیہ کے مطابق ریس کورس ٹریفک پولیس عمارت کے نقصان کا تخمینہ6لاکھ60ہزار ہے، لیاقت باغ میں پولیس کے 15 خدمت مرکز کے نقصان کا تخمینہ1 لاکھ روپے ہے، سگنلز اور پی ایچ اے کی املاک کے نقصان کا تخمینہ 5 لاکھ ہے، پولیس کی 20 گاڑیوں کو نقصان پہنچایا گیا جس کا تخمینہ لگانا باقی ہے۔
