ماسکو: یورپ کو دی گئی روسی مہلت آج ختم ہو جائے گی، اگر گیس کی خریداری کے لیے ادائیگی روسی کرنسی روبل میں نہ گئی تو سپلائی بند کر دی جائے گی۔
تفصیلات کے مطابق روس کی جانب سے یورپ کی دی گئی مہلت کا آج آخری روز ہے، جس کے بعد ادائیگی صرف روبل میں ہوگی ورنہ گیس بند کر دی جائے گی۔
دوسری طرف مذاکرات کی بحالی کے باوجود یوکرین میں جنگ جاری ہے، روسی وزارت خارجہ کے سینیئر عہدے دار نیکولائی کوبرینائٹس نے کہا ہے کہ یورپی یونین کو روس پر عائد کی جانے والی پابندیوں کا جواب دیا جائے گا۔
نیکولائی کوبرینائٹس کا کہنا تھا کہ برسلز کی جانب سے غیر ذمہ دارانہ طور سے عائد ہونے والی پابندیاں عام یورپیوں کی زندگی پر اثر انداز ہو رہی ہیں۔
امریکا نے بھارت کو بھی دھمکی دے دی
یاد رہے کہ روسی صدر ولادیمیر پیوٹن نے جمعرات کو ایک فرمان پر دست خط کیے ہیں، جس میں کہا گیا ہے کہ روسی گیس کے غیر ملکی خریداروں کو یکم اپریل سے صرف روبل میں ادائیگی کرنا ہوگی، نہ صورت دیگر معاہدے معطل کر دیے جائیں گے۔
صدر پیوٹن نے ٹی وی خطاب میں کہا کہ روس سے قدرتی گیس کے خریداروں کو اب روسی بینکوں میں روبل کرنسی میں اپنے کھاتے کھولنا ہوں گے، انھی اکاؤنٹس سے گیس کی ترسیل کے لیے رقوم ادا کی جائیں گی، ایسا نہ کیا گیا تو ہم خریداروں کو ڈیفالٹ سمجھیں گے۔
روسی صدر نے واضح کر دیا تھا کہ کوئی بھی ہمیں مفت میں کچھ فروخت نہیں کرتا اور ہم بھی خیرات نہیں کریں گے۔
