ARYNews.tv | Urdu – Har Lamha Bakhabar

Tag: EU

  • بریگزٹ ڈیل، برطانوی پارلیمنٹ آج حتمی فیصلہ کرے گی

    بریگزٹ ڈیل، برطانوی پارلیمنٹ آج حتمی فیصلہ کرے گی

    لندن: یورپ سے انخلا سے متعلق برطانوی پارلیمنٹ آج حتمی فیصلہ سنائے گی، وزیراعظم بورس جانسن کو پارلیمنٹ میں بڑی شکست کا سامنا کرنا پڑا۔

    تفصیلات کے مطابق برطانیہ یورپ سے انخلا ڈیل یا بغیر ڈیل کے کرے گا اس کا فیصلہ آج برطانوی پارلیمنٹ کرے گی، یورپی یونین کو برطانوی فیصلے کا انتظار ہے۔

    برطانوی وزیراعظم بورس جانسن کو پارلیمنٹ میں بڑی شکست ہوئی، پارلیمنٹ نے بریگزٹ ڈیل پر فیصلے کا حق حاصل کرلیا۔

    پارلیمنٹ نے 301کے مقابلے میں 328ووٹس سے ڈیل پر فیصلے کا حق حاصل کیا۔ اس موقع پر برطانوی وزیراعظم بورس جانسن کا کہنا تھا کہ نوڈیل بریگزٹ روکنے پر ووٹ دیا گیا تو نئے الیکشن کا اعلان کروں گا۔

    برطانیہ کے بریگزٹ وزیرکا یورپی یونین پرعدم تعاون کا الزام

    ادھر بریگزٹ امور کے برطانوی وزیر اسٹیفن بارکلے نے اپنے ایک اخباری انٹرویو میں یورپی یونین پر عدم تعاون کا الزام لگاتے ہوئے کہا کہ برسلز میں یورپی حکام لندن حکومت کے ساتھ کسی مصالحتی حل کے لیے زیادہ رضا مندی کا مظاہرہ نہیں کر رہے۔

    وزارت عظمیٰ کا منصب سنبھالنے کے بعد برطانوی وزیراعظم بورس جانسن نے برطانوی پارلیمان سے اپنے پہلے خطاب میں کہا کہ یورپی یونین بریگزٹ ڈیل پر نظر ثانی کرے۔

    تین سال قبل 2016 میں 43سال بعد تاریخی ریفرنڈم کے نتائج کے مطابق 52 فیصد برطانوی عوام نے یورپی یونین سے علیحدگی ہونے کے حق میں جبکہ 48 فیصد نے یونین کا حصہ رہنے کے حق میں ووٹ دیا تھا۔

  • کشمیر پر یورپی پارلیمنٹ کی خارجہ کمیٹی کا اجلاس بڑی پیشرفت ہے: فاروق حیدر

    کشمیر پر یورپی پارلیمنٹ کی خارجہ کمیٹی کا اجلاس بڑی پیشرفت ہے: فاروق حیدر

    برسلز: وزیراعظم آزاد کشمیر راجہ فاروق حیدر کا کہنا ہے کہ کشمیر پر یورپی پارلیمنٹ کی خارجہ کمیٹی کا اجلاس بڑی پیشرفت ہے، یہ اجلاس مسئلہ کشمیر کو عالمی سطح پر مزید اجاگر کرے گا۔

    ان خیالات کا اظہار وزیراعظم آزاد کشمیر نے بیلجیم کے دارالحکومت برسلز میں اے آر وائی نیوز سے خصوصی گفتگو کرتے ہوئے کیا، راجہ فاروق حیدر یورپین پارلیمنٹیرینز سے ملاقاتیں کریں گے۔

    انہوں نے کہا کہ مسئلہ کشمیر اقوام متحدہ کی قراردادوں کے مطابق حل ہونا چاہیے، کشمیری قوم آزادی پر کبھی سمجھوتہ نہیں کرے گی۔

    راجہ فاروق حیدر کا کہنا تھا کہ بھارتی مظالم بھی کشمیریوں کا جذبہ آزادی نہیں دبا سکے، :سیاسی نظریات سے بالاتر ہوکر کشمیر کے لیے اکٹھے ہوں۔

    ان کا مزید کہنا تھا کہ کشمیر پر یورپی پارلیمنٹ کی خارجہ کمیٹی کا اجلاس بہت اہم ہوگا، جس سے عالمی سطح پر بھارتی جارحیت بے نقاب ہوگی۔

    بھارت غلط فہمی میں نہ رہے، اپنے دفاع کی بھرپور صلاحیت رکھتے ہیں، شاہ محمود قریشی

    ادھر وزیرخارجہ شاہ محمود قریشی کا کہنا ہے کہ امید ہے یورپین پارلیمنٹ انسانی حقوق کیلئے اپنا کردار ادا کرے گی، اس کے علاوہ 3ستمبر کو لندن میں بھارتی ہائی کمیشن کے باہر تاریخی احتجاج ہوگا۔

    ان کا مزید کہنا تھا کہ 27ستمبر کو عمران خان جنرل اسمبلی میں کشمیریوں کا مقدمہ پیش کریں گے، عالمی عدالت کے فیصلے کے مطابق دہشت گرد کلبھوشن کو قونصلررسائی دی جائے گی۔

  • کشمیر کونسل ای یو کا آج یورپی وزارت خارجہ کے سامنے بھارت کیخلاف دھرنے کا اعلان

    کشمیر کونسل ای یو کا آج یورپی وزارت خارجہ کے سامنے بھارت کیخلاف دھرنے کا اعلان

    برسلز: چیئرمین کشمیر کونسل ای یو علی رضا سید نے اعلان کیا ہے کہ آج یورپی وزارت خارجہ کے سامنے بھارت کے خلاف دھرنا ہوگا۔

    اپنے ایک بیان میں کشمیر کونسل یورپی یونین کے چیئرمین کا کہنا تھا کہ بھارت بڑے پیمانے پر کشمیریوں پر مظالم میں ملوث ہے۔

    انہوں نے کہا کہ مقبوضہ کشمیر کی صورت حال تمام امن پسند اقوام عالم کے لیے لمحہ فکریہ ہے، اقوام عالم کو بھارتی مظالم سے آگاہ کرنے کا سلسلہ شروع کردیا۔

    علی رضاسید کا کہنا تھا کہ عالمی اداروں اور انسانی حقوق کی تنظیموں کو خطوط اور ای میلز کی جارہی ہیں۔

    ان کا مزید کہنا تھا کہ مقبوضہ کشمیر میں بھارتی جارحیت کھل کر سامنے آچکی ہے، حالیہ اقدامات کے بعد مودی کے عزائم دنیا دیکھ رہی ہے۔

    بھارت زیادہ دیر تک مقبوضہ کشمیرپراپنا ناجائز تسلط برقرار نہیں رکھ سکتا، میاں اسلم اقبال

    خیال رہے کہ مقبوضہ کشمیر کے حوالے سے پاک بھارت کشیدگی میں مزید اضافہ ہوگیا ہے، پاک فوج نے بھارتی جارحیت کے جواب میں دشمن کے چھ اہلکاروں کو ہلاک کردیا۔

    دوسری جانب امریکی صدر ڈونلڈ ٹرمپ نے پاک بھارت کشیدگی کے خاتمے کے لیے ایک بار پھر ثالثی کی پیش کش کی ہے۔

  • یورپی حکومتوں نے عالمی بینک کی چیف کو آئی ایم ایف کی سربراہی کیلئے نامزد کرلیا

    یورپی حکومتوں نے عالمی بینک کی چیف کو آئی ایم ایف کی سربراہی کیلئے نامزد کرلیا

    برسلز : بلغاریہ سے تعلق رکھنے والی کرسٹالینا جیورجیوا بین الااقوامی مالیاتی فنڈ کی سربراہی کےلیےسوپنے کےلیے منظوری دے دی۔

    تفصیلات کے مطابق یورپی حکومتوں نے فیصلہ کیا ہے کہ عالمی بینک سے وابستہ کرِسٹالینا جیورجیوا کو بین الاقوامی مالیاتی فنڈ کی سربراہی کے لیے امیدوار کے طور پر سامنے لایا جائے،جیورجیوا کا تعلق بلغاریہ سے ہے اور وہ بین الاقوامی مالیاتی فنڈ کی موجودہ سربراہ کرسٹین لاگارڈ کی جگہ لینے کی امیدوار ہوں گی۔

    یورپی کمیشن کے صدر ڑاں کلود ینکر اور فرانسیسی وزیرخزایہ برونو لے ماری نے اپنے ٹوئٹر پیغامات میں لکھا کہ اس حوالے سے ہالینڈ کے سابق وزیرخارجہ جیرون ڈائسیل بلوم اور جیورجیوا کے نام زیربحث تھے، تاہم یورپی یونین کے رہنماؤں نے ووٹنگ کے ذریعے جیورجیوا کے نام کی منظوری دی۔

    یہ بات اہم ہے کہ روایتی طور پر بین الاقوامی مالیاتی فنڈ کے سربراہ کی نامزدگی یورپ اور عالمی بینک کے سربراہ کی نام زدگی امریکا کی جانب سے ہوتی ہے۔

    لاگارڈ کو یورپی مرکزی بینک کی سربراہی کے لیے نام زد کیا گیا ہے، وہ بین الاقوامی مالیاتی فنڈ کی سربراہی سے مستعفی ہو چکی ہیں اور بارہ ستمبر کو وہ یہ عہدہ چھوڑ دیں گی۔

    بین الاقوامی مالیاتی فنڈ جو دنیا کے اہم ترین مالیاتی اداروں میں شمار کیا جاتا ہے اپنے 189 رکن ممالک کو مالیاتی مشاورت فراہم کرتا ہے۔

    عالمی بینک کے صدر ڈیوڈ مالپاس کی جانب جاری کردہ ایک بیان میں کہا گیا کہ نام زدگی کے عمل کے دوران عالمی بینک میں چیف ایگزیکٹیو آفیسر کے بہ طور کام کرنے والی جیورجیوا چھٹیاں لیں گے۔

    انہوں نے اپنے بیان میں جیورجیوا کو بین الاقوامی مالیاتی بینک کی سربراہی کے لیے نام زدگی پر مبارک باد بھی دی۔

    اپنے بیان میں مالپاس نے کہاکہ اس سے واضح ہوتا ہے کہ وہ اقتصادیات ، معیشت اور ترقی کے حوالے سے بین الاقوامی سطح پر قائدانہ کردار کی حامل ہیں۔

  • یورپی یونین کی امریکی اشیا پراضافی ٹیرف لگانے کی دھمکی

    یورپی یونین کی امریکی اشیا پراضافی ٹیرف لگانے کی دھمکی

    برسلز: یورپی یونین کے تجارتی سربراہ نے کہاہے کہ اگر امریکا ان کی گاڑیوں پر ڈیوٹیز میں اضافہ کرے گا تو امریکی اشیا پر بھی 35 ارب یورو کے اضافی ٹیرف لگائے جائیں گے۔

    غیرملکی خبررساں ادارے کے مطابق یورپی یونین کی کمشنر تجارت سیسیلیا مالمسٹروم کا کہنا تھا کہ یورپ اور امریکا کے درمیان محدود تجارتی معاہدے کا منصوبہ اب بھی برقرار ہے۔نو منتخب رکن یورپی پارلیمنٹ کے لیے بیان میں ان کا کہنا تھا کہ واشنگٹن کی چین سے تجارتی جنگ توجہ کا مرکز ہے مگر بحراوقیانوس کے پار بھی کشیدگی موجود ہے۔

    انہوں نے یورپی پارلیمنٹ کے کمیٹی اجلاس سے خطاب کرتے ہوئے کہا کہ ہم منضبط تجارت، کوٹہ یا بر آمدی رکاوٹیں برداشت نہیں کریں گے اور اگر ٹیرف لگائے گئے تو ہمارے پاس بھی حساب برابر کرنے کا اختیار ہے۔

    ان کا کہنا تھا کہ ہم نے اسے پہلے ہی تیار کرلیا ہے جس کی لاگت 35 ارب یورو (39 ارب ڈالر) ہے، امید کرتا ہوں کہ اسے استعمال کرنے کی ہمیں ضرورت نہیں پڑے گی۔

    واضح رہے کہ امریکی صدر ڈونلڈ ٹرمپ نے یورپی گاڑیوں کو قومی سلامتی کے لیے خطرہ قرار دیا ہے اور وہ آٹو موبائل کی درآمدات پر ڈیوٹیز عائد کرنے پر غور کر رہے ہیں۔

    کمشنر تجارت کا کہنا تھا کہ ہم گاڑیوں اور گاڑیوں کے پرزوں پر اب تک ڈیوٹی عائد نہ کرنے کے امریکی فیصلے کو خوش آئند سمجھتے ہیں تاہم یورپی گاڑیوں کو قومی سلامتی کے لیے خطرہ قرار دینے کا بیان بے تکا ہے۔

  • وزیراعظم آزاد کشمیر کی برسلز میں اعلیٰ یورپی حکام سے ملاقاتیں، مسئلہ کشمیر پر گفتگو

    وزیراعظم آزاد کشمیر کی برسلز میں اعلیٰ یورپی حکام سے ملاقاتیں، مسئلہ کشمیر پر گفتگو

    برسلز: آزاد کشمیر کے وزیراعظم راجہ فاروق حیدر خان نے بلجیم کے دارالحکومت برسلز میں یورپی یونین کے اعلیٰ عہدیداروں سے ملاقاتیں کی اور انہیں مسئلہ کشمیر اور مقبوضہ کشمیر میں نہتے کشمیریوں پر ڈھائے جانے والے بھارتی مظالم کے بارے میں آگاہ کیا۔

    تفصیلات کے مطابق راجہ فاروق حیدر نے برسلز میں اقوام متحدہ کے دفتر کا بھی دورہ کیا اور وہاں موجود اعلیٰ حکام سے ملاقات کی اور مقبوضہ کشمیر میں بھارتی فورسز کی طرف سے انسانی حقوق کی خلاف ورزیوں کے بارے میں عالمی ادارے کی حالیہ رپورٹ کا خیرمقدم کیا۔

    انہوں نے کہا کہ اقوام متحدہ کی حالیہ اور گزشتہ سال کی رپورٹوں کی روشنی میں مقبوضہ کشمیرمیں جاری انسانی حقوق کی پامالیوں کی بین الاقوامی اعلیٰ سطح کی تحقیقات کرائی جانی چاہئیں اور اس مقصد کے لیے حقائق معلوم کرنے والے مشنز مقبوضہ کشمیر روانہ کئے جائیں۔

    راجہ فاروق حیدر نے برسلز میں قیام کے دوران کشمیر کونسل ای یو کے سیکرٹریٹ کا بھی دورہ کیا اور کشمیرکونسل ای یو کی طرف سے مسئلہ کشمیر کو اجاگر کرنے اور مقبوضہ کشمیر میں انسانی حقوق کی خلاف ورزیوں کے بارے میں حقائق کو یورپی حکام اور عوام تک پہنچانے کے لیے جاری کوششوں کی تعریف کی۔

    پاک بھارت ایٹمی جنگ کا خطرہ مسئلہ کشمیر کے حل تک رہے گا، وزیراعظم آزاد کشمیر

    انھوں نے کہا کہ کشمیرکونسل ای یو کے چیئرمین علی رضا سید اور ان کی پوری ٹیم جس جانفشانی سے یورپ میں مسئلہ کشمیر کو اجاگر کررہی ہے وہ قابل تعریف ہے۔

    اس موقع پر کشمیر کونسل کے چیئرمین علی رضا سید، سینئر عہدیدار ایمبسڈر انتھونی کرزنر، اندرے بارسس اور رومونا بنزر اور وزیراعظم کے پرنسپل سیکرٹری راجہ امجد خان بھی موجود تھے۔

  • یورپی ممالک کو اپنی سرزمین پر ایرانی جوہری میزائل گرنے کا انتظار ہے: نیتن یاہو

    یورپی ممالک کو اپنی سرزمین پر ایرانی جوہری میزائل گرنے کا انتظار ہے: نیتن یاہو

    تل ابیب: اسرائیلی وزیراعظم بینجمن نیتن یاہو نے خبردار کیا ہے کہ جب تک ایران کے جوہری میزائل یورپی ممالک کی سرزمین پر نہیں گریں گے تب تک وہ نیند سے بیدار نہیں ہوں گے۔

    تفصیلات کے مطابق برسلز میں یورپی ممالک کے وزرا خارجہ نے ایرانی جوہری معاہدے سے متعلق تبادلہ خیال کیا، بعدازاں یورپی ممالک کے خارجہ پالیسی چیف فریڈیکا موگیرنی نے کہا کہ وزرا خارجہ کے نزدیک ایران نے جوہری معاہدے کے خلاف سنگین ورزی نہیں کی۔

    انہوں نے کہا کہ وزرا خارجہ جوہری معاہدے کے آرٹیکل 36 کو نافذالعمل نہیں سمجھتے۔ وزرا خارجہ کے بیان پر اسرائیلی وزیراعظم بینجمن نیتن یاہو سیخ پا ہوگئے اور انہوں نے ایک ویڈیو پیغام میں کہا کہ یہ بالکل ایسا ہے کہ ایک شخص اپنا سر ریت میں چھپا لے اور خطرے کو نظر انداز کردے۔

    انہوں نے مزید کہا کہ ایسا لگتا ہے کہ چند لوگ یورپ میں ایسے ہیں جو یورپی سرزمین پر ایرانی جوہری میزائل گرنے پر اپنی آنکھ کھولیں گے اور تب تک بہت دیر ہو چکی ہوگی۔

    اسرائیلی وزیراعظم نیتن یاہو نے اپنی بے بسی کا اعتراف کرلیا

    بینجمن نیتن یاہو کا مزید کہنا تھا کہ ہم ہر صورت میں ایران کو جوہری ہتھیار بنانے سے روکیں گے۔ خیال رہے کہ گذشتہ دنوں اسرائیلی وزیراعظم نے اپنی بے بسی کا اظہار کرتے ہوئے کہا تھا کہ وہ ایران کو جوہری پروگرام سے روکنے میں ناکام ہیں، ان کا کہنا تھا کہ یہ کام ان کے بس میں نہیں ہے۔

  • ایران کو دوبارہ جوہری ڈیل پر قائم رکھا جاسکتا ہے: یورپی یونین

    ایران کو دوبارہ جوہری ڈیل پر قائم رکھا جاسکتا ہے: یورپی یونین

    برسلز: چیئرمین یورپی یونین برائے خارجہ امور فیڈریکا موروگینی نے کہا ہے کہ ایران کی جانب سے جوہری ڈیل کی کوئی بڑی خلاف ورزی نہیں کی گئی۔

    تفصیلات کے مطابق برسلز میں یورپی یونین کے ہونے والے اجلاس میں ایران کے ساتھ طے پائے جوہری معاہدے کو بچانے پر غور کیا گیا جبکہ خلیجی پانیوں میں عالمی تیل بردار جہازوں پر حملوں سمیت امریکا اور ایران کے درمیان جاری کشیدگی پر بھی تبادلہ خیال ہوا۔

    یورپی یونین کے وزرائے خارجہ کے اجلاس سے گفتگو کرتے ہوئے فیڈریکا کا کہنا تھا کہ پراثر مذاکرات کے ذریعے ایران کو دوبارہ جوہری ڈیل پر قائم رکھا جاسکتا ہے۔

    انہوں نے کہا کہ ایران کی جانب سے جوہری ڈیل 2015 کی حالیہ خلاف ورزیاں اتنی بڑی نہیں کہ اس پر بات ہی نہ کی جائے بلکہ فریقین مذاکرات کے ذریعے تنازع حل کرسکتے ہیں۔

    چیئرمین یورپی یونین برائے خارجہ امور نے ایران کو مذاکرات کی دعوت دیتے ہوئے کہا کہ ہمیں تلخیوں کو بھلا کر بہتر مستقبل کا سوچنا ہوگا، سمجھوتے کے منافی تمام سرگرمیوں کو ترک کرکے آگے بڑھنا چاہیئے۔

    ایران امریکی پابندیوں کے مقابلے میں پختہ عزم کے ساتھ کھڑا ہے،حسن روحانی

    دریں اثنا تین اہم یورپی طاقتوں نے اس بات پر زور دیا ہے کہ علاقے میں تناؤ میں کمی لانے اور ایران کے جوہری پروگرام پر بات چیت بحال کرنے کی راہ تلاش کی جائے۔

    برطانیہ، جرمنی اور فرانس کے رہنماؤں نے اپنے مشترکہ بیان میں کہا ہے کہ اب وقت آ گیا ہے کہ ایران کے ساتھ جوہری معاہدے کے خاتمے کو روکنے کے لیے ذمہ داری سے کام کیا جائے۔

  • مقبوضہ وادی میں بھارتی جارحیت سے متعلق یو این کی رپورٹ، کشمیر کونسل ای یو کا خیرمقدم

    مقبوضہ وادی میں بھارتی جارحیت سے متعلق یو این کی رپورٹ، کشمیر کونسل ای یو کا خیرمقدم

    برسلز: چیئرمین کشمیر کونسل یورپی یونین علی رضا سید نے مقبوضہ وادی میں بھارتی جارحیت سے متعلق اقوام متحدہ کی رپورٹ کا خیرمقدم کیا۔

    تفصیلات کے مطابق کشمیرکونسل ای یو کے چیئرمین علی رضا سید نے اقوام متحدہ کے ہائی کمشنر کے دفترکی طرف سے مقبوضہ کشمیرمیں انسانی حقوق کی خلاف ورزیوں کے بارے میں جاری ہونے والی حالیہ رپورٹ کا خیرمقدم کیا ہے۔

    علی رضا سید نے برسلز سے جاری ایک بیان میں رپورٹ کا خیرمقدم کرتے ہوئے کہا کہ مقبوضہ کشمیر میں بھارتی فوجیوں کی طرف سے بڑے پیمانے پر جاری انسانی حقوق کی سنگین پامالیاں ایک حقیقت ہے، اور عالمی برادری کو اس رپورٹ کی روشنی میں حقائق جاننے کے لئے ایک بین الاقوامی تحقیقاتی کمیشن مقبوضہ کشمیر روانہ کرنا چاہیے۔

    انہوں نے کہا کہ عالمی برادری کو نہتے کشمیریوں پر بھارتی مظالم رکوانے اور تنازعہ کشمیر کا منصفانہ اور پرامن حل تلاش کے لئے اپنا کردار ادا کرنا ہوگا۔

    واضح رہے کہ اقوام متحدہ کے انسانی حقوق کے ادارے نے پیر کو گزشتہ ایک سال کے دوران مقبوضہ کشمیر میں بھارتی فورسز کی طرف سے جاری انسانی حقوق کی پامالیوں کے بارے میں اپنی رپورٹ میں جموں کشمیر کولیشن آف سول سوسائٹی کا حوالہ دیتے ہوئے کہا ہے کہ اس عرصے کے دوران مقبوضہ کشمیر میں 160 شہریوں کو شہید کیاگیا۔

    علی رضا سید نے کہا کہ اقوام متحدہ کی یہ رپورٹ انسانی حقوق کی خلاف ورزیوں کا مسلمہ بین الاقوامی ثبوت ہے کہ بھارتی فورسز ان سنگین پامالیوں میں براہ راست ملوث ہیں۔

    ان کا مزید کہنا تھا کہ عالمی ادارے کی رپوررٹ میں پیلٹ گن کوایک خطرناک ہتھیار قرار دیتے ہوئے تصدیق کی گئی ہے کہ بھارتی فورسز نہتے شہریوں پر فولادی چھروں والی پیلٹ گنزکا مسلسل استعمال جاری رکھے ہوئے ہیں۔

  • ایرانی اقدامات کے بعد جوہری ڈیل خطرے میں پڑ گیا، یورپی یونین کو شدید تشویش

    ایرانی اقدامات کے بعد جوہری ڈیل خطرے میں پڑ گیا، یورپی یونین کو شدید تشویش

    برسلز: یورپی یونین نے ایرانی اقدامات کے ردعمل میں شدید تشویش کا اظہار کرتے ہوئے ایران کو ضرر رساں حکمت عملی سے گریز رہنے کی اپیل کی ہے۔

    تفصیلات کے مطابق یورپی یونین نے ایران کو خبردار کیا ہے کہ وہ جوہری ڈیل سے متعلق ضرر رساں اقدامات سے گریز کرے، بصورت دیگر سنگین نتائج کا سامنا کرنا پڑ سکتا ہے۔

    غیر ملکی خبر رساں ادارے کے مطابق ایران کی جانب سے یورینیم کی طے شدید حد سے تجاوز کرنے پر یورپی یونین مشترکہ کمیشن بنانے پر غور کررہی ہے جو معاملے کا بغور جائزہ لے گی۔

    یورپی یونین کا کہنا ہے کہ ہمیں ایران کے یورینیم کو 3.67 فی صد سے بالائی سطح تک افزودہ کرنے کے اعلان پر گہری تشویش لاحق ہے۔

    ای یو نے ایران سے مطالبہ کیا ہے کہ وہ عالمی طاقتوں کے درمیان طے پانے والے جوہری معاہدے کی پاسداری کرے، اور سمجھوتے کے تقاضو کے منافی تمام اقدامات روک دے اور اس ضمن میں حالیہ اعلانات بھی واپس لے۔

    دوسری جانب فرانسیسی صدر نے جوہری معاہدے سے متعلق گفتگو کرتے ہوئے کہا کہ ایران 15 جولائی کو جوہری معاہدے میں شامل تمام فریقین کے درمیان مذاکرات کے لیے حالات سازگار بنانے کے لئے اقدامات کرے۔

    ایران کا یورینیم افزودگی میں اضافہ خطرناک ہوگا‘فرانسیسی صدر

    خیال رہے کہ ایران اور عالمی طاقتوں میں طے پائے معاہدے کے تحت ایران کو بھاری پانی کا ذخیرہ محدود کرنے کا پابند بنایا گیا تھا مگر ایران بھاری پانی کا ذخیرہ بھی 5 فی صد سے بڑھا چکا ہے۔

    یورینیم افزودگی کی مقدار 5 فی صد تک لے جانے کا ایرانی فیصلہ سلامتی کونسل کی قرارداد 2231 کی بھی کھلی خلاف ورزی ہے۔