اسلام آباد: ایون فیلڈ ریفرنس اپیل میں مریم نواز کی جانب سے اسلام آباد ہائی کورٹ میں جواب جمع کرا دیا گیا۔
تفصیلات کے مطابق احتساب عدالت میں جمع جواب میں مریم نواز نے کہا ہے کہ ان کے خلاف جو ٹرائل چلایا گیا وہ پاکستان کی تاریخ میں قانون شکنی اور سیاسی انجنیئرنگ کی زندہ مثال ہے.
جواب میںکہا گیا ہے کہ احتساب عدالت نے برطانیہ میں واقع ایون فیلڈ ریفرنس میں 16 جولائی 2018 کو سزا سنائی، احتساب عدالت نے درخواست گزار کو 7 سال قید جب کہ 2 ملین پاؤنڈز کا جرمانہ عائد کیا تھا۔
جواب میں سابق جج اسلام آباد ہائی کورٹ جسٹس شوکت عزیز صدیقی کے پنڈی بار کی تقریر کا بھی حوالہ دیا گیا ہے، کہا گیا ہے کہ سابق جج، جسٹس شوکت عزیز صدیقی کو اسی بیان پر سپریم جوڈیشل کونسل کے عہدے سے ہٹایا گیا۔
جسٹس شوکت عزیز صدیقی کا سپریم کورٹ میں جمع شدہ جواب بھی مریم نواز کی جواب کا حصہ بنایا گیا ہے، ایون فیلڈ ریفرنس میں خفیہ ادارے کی اہم شخصیت کے بارے میں سابق جج نے سپریم کورٹ کو بتایا، سابق جج نے خفیہ اداروں سے متعلق جس کیس میں جواب جمع کرایا وہ ابھی بھی سپریم کورٹ میں زیر سماعت ہے۔
جواب کے مطابق خفیہ ادارے کی اہم شخصیت نے سابق جج کو شریف خاندان کو سزائیں دینے کا کہا تھا، جج ارشد ملک ویڈیو نواز شریف اور ان کے خاندان کے خلاف کیس میں اہم ثبوت ہے، جو اب پاکستان کی تاریخ میں اقتدار کی تبدیلی سیاسی انجنیئرنگ کے ذریعے کی جاتی ہے۔
جواب میں مزید کہا گیا ہے کہ نیب کے ذریعے نواز شریف کو وزارت عظمیٰ سے ہٹانے کے لیے ایک غیر قانونی ریفرنس دائر کیا گیا، 28 جولائی 2017 کو سپریم کورٹ کے حکم پر وزیر اعظم اور پوری وفاقی کابینہ کو گھر بھیج دیا گیا، اور بعد میں نا اہل قرار دیا گیا۔
مریم نواز کی جانب سے جج ارشد ملک ویڈیو اور سابق جج اسلام آباد ہائی کورٹ کا بیان بھی جواب کے ساتھ جمع کر دیا گیا ہے، مریم نواز نے جواب میں اپنے خلاف چارجز ختم کرنے کی استدعا کی ہے۔
