لاہور : پنجاب یوتھ فیسٹیول کرپشن اسکینڈل میں ن لیگ کے رہنماء اورسابق وزیر کھیل رانامشہود رانا مشہود نے آج نیب میں پیش ہونے سے معذرت کرلی اور آٹھ اگست کو پیش ہونے کی درخواست نیب کوبھجوا دی ہیں۔
تفصیلات کے مطابق پنجاب یوتھ فیسٹیول کرپشن اسکینڈل سے متعلق تحقیقات میں ن لیگ کے رہنماء رانا مشہود نے آج نیب میں پیش ہونے سے معذرت کر لی۔
نیب لاہور نے رانا مشہود کو آج پنجاب یوتھ فیسٹیول کرپشن کیس میں طلب کر رکھا تھا، رانا مشہود کے وکلاء نے آج پیش ہونے سے معذرت کرتے ہوئے 8 اگست کو پیش ہونے کی درخواست نیب کو بھجوا دی ہے۔
درخواست میں کہا گیا کہ وہ نجی مصروفیت کی وجہ سے آج نیب میں حاضر نہیں ہو سکتے، پنجاب یوتھ فیسٹیول کرپشن کیس میں وہ اپنے وکلاء کے ذریعے پہلے ہی جواب جمع کروا چکے ہیں۔
یاد رہے 22 جولائی کو ن لیگ کے رہنماء رانامشہود نے نیب کانوٹس ہوا میں اڑا دیا اور پیش نہ ہوئے، جس کے بعد نیب کی جانب سے رانا مشہود کو چھ اگست کو دوبارہ طلب کیا گیا تھا۔
مزید پڑھیں : رانا مشہود نے نیب کا نوٹس ہوا میں اڑا دیا
نیب آفس کے باہر میڈیا سے گفتگو کرتے ہوئے وکلاء کا کہنا تھا کہ رانا مشہود احمد ذاتی مصروفیات کے باعث پیش نہیں ہو سکے، سوالات کے جوابات جمع کروا دیئے ہیں، وہ چار سال سے نیب لاہور میں پیش ہو رہے ہیں، 2017 میں نیب نے رانا مشہود کو کلیئر قرار دیا تھا، ان کیخلاف سیاسی انتقامی کارروائی کی جا رہی ہے۔
خیال رہے رانا مشہود کےخلاف پنجاب اسپورٹس فیسٹیول میں غیرقانونی ٹھیکے دلوانے کےالزام میں تحقیقات چل رہی ہے، لاہور ہائی کورٹ نے نیب کو رانا مشہود کے خلاف تادیبی کارروائی سے روک دیا تھا اور نام بلیک لسٹ میں شامل کیے جانے پر وزارت داخلہ سے بھی جواب طلب کیا تھا۔
واضح رہے ایف آئی اے امیگریشن نے سابق صوبائی وزیر رانا مشہود کی بیرون ملک فرار ہونے کی کوشش ناکام بنادی تھی اور امریکہ جانے والی پرواز 621 قطر ایئر ویز سے آف لوڈ کردیا تھا۔
