وفاقی حکومت کی جانب سے گزشتہ روز پیش کیے جانے والے وفاقی بجٹ کے اعداد و شمار کے مطابق وفاق کے اخراجات ہدف سے زیادہ اور آمدنی کم ہوگئی۔
پی ڈی ایم حکومت نے انتہائی مشکل حالات میں وفاقی بجٹ گزشتہ روز پیش کردیا، بقول وزیر خزانہ 144کھرب 60 ارب روپے کے بجٹ میں تنخواہوں و پنشن میں اضافہ اور کوئی نیا ٹیکس نہیں لگایا گیا۔
اس حوالے سے بجٹ دستاویز کے مطابق رواں مالی سال وفاق کے اخراجات ہدف سے1543ارب روپے زیادہ ہوگئے، رواں مالی سال مجموعی بجٹ خسارہ ہدف سے بھی2144ارب روپے بڑھ گیا۔
دستاویز کے مطابق رواں مالی سال وفاقی حکومت کی آمدنی ہدف سے584ارب روپے کم ہوگئی، صوبوں کو این ایف سی ایوارڈ کے تحت244ارب روپے کم دیئے گئے۔
اس کے علاوہ رواں مالی سال صوبوں نے وفاق کو ہدف سے244 ارب کم سرپلس بجٹ دیا، وفاق کے اخراجات9579 ارب ہدف کے مقابلے11090ارب روپے پر پہنچ گئے۔
دستاویز میں کہا گیا ہے کہ مجموعی بجٹ خسارہ3797 ارب ہدف کے مقابلے5941ارب روپے ہوگیا، صوبوں نے750 ارب ہدف کے مقابلے وفاق کو459 ارب روپے سرپلس بجٹ دیا۔
پرائمری بجٹ153ارب سرپلس کے مقابلے421 ارب روپے خسارے میں چلا گیا، صوبوں کو4373ارب کے ہدف کے مقابلے4129ارب روپے دیے گئے، وفاق کی مجموعی آمدنی9405ارب ہدف کے مقابلے8818ارب روپے پر آگئی۔