گھنی بھویں چہرے کی خوبصورتی میں اضافہ کردیتی ہیں، بعض اوقات بھوؤں کے بال کم ہوتے ہیں یا جھڑنے لگتے ہیں جس سے چہرے کا تاثر خراب ہوجاتا ہے۔
کچھ طریقوں اور قدرتی اجزا سے بھوؤں کو گھنا بنایا جاسکتا ہے۔
ایلو ویرا
ایلو ویرا میں ایلوینن نامی مرکب ہوتا ہے جو بالوں کی نشوونما کو فروغ دیتا ہے، اس میں کیراٹین کی طرح کیمیکل بھی پایا جاتا ہے، جو بالوں کو وہ غذائی اجزا فراہم کرتا ہے جو ان کی بڑھوتری میں اہم کردار ادا کرتا ہے۔
ایلو ویرا جیل غیر چپچپا ہونے کی وجہ سے تیزی سے جذب ہونے کی صلاحیت رکھتا ہے یہی وجہ ہے اسے دن میں کئی بار لگایا جا سکتا ہے۔
اس مقصد کے لیے تازہ ایلو ویرا جیل کا استعمال کیا جاسکتا ہے، اس جیل کو بھوؤں پر لگا کر اس وقت تک مساج کریں جب تک یہ اچھی طرح جذب نہ ہوجائے۔
کیسٹر آئل
بالوں کی نشوونما میں اس کا استعمال کئی دہائیوں سے کیا جارہا ہے، یہ ایک پرانا اور نہایت آزمودہ طریقہ ہے۔
کیسٹر آئل فیٹی ایسڈ، پروٹین، وٹامنز اور اینٹی آکسیڈنٹس سے بھرپور ہوتا ہے، اس لیے یہ آپ کے بالوں کی جڑوں کی پرورش میں مدد کرتا ہے۔
اس بات کو یقینی بنائیں کہ آپ اپنی بھوؤں کی جڑوں پر روزانہ کیسٹر آئل لگائیں، کیونکہ اس سے بالوں کی نشوونما کو فروغ دینے میں مدد ملتی ہے۔
دودھ
دودھ کا استعمال بھوؤں کے گھنا کرنے کا سب سے آسان طریقہ ہے، دودھ میں پروٹین اور دیگر غذائی اجزا ہوتے ہیں جو بالوں کی صحت مند نشوونما میں مدد کر سکتے ہیں۔
ایک صاف پیالے میں تھوڑا سا دودھ لیں، اس میں روئی ڈبو کر بھوؤں پر نرمی سے لگائیں۔
خشک ہونے تک لگا رہنے دیں اس کے بعد نیم گرم پانی سے دھولیں، اسے دن میں کئی بار استعمال کیا جاسکتا ہے۔
پیاز کا رس
پیاز کے رس میں کافی مقدار میں سیلینیئم، سلفر، بی وٹامنز، منرلز اور سی وٹامنز ہوتے ہیں جو بالوں کی نشوونما کے لیے مفید تصور کیے جاتے ہیں، اس سے آئی برو کے بال بھی تیزی سے بڑھتے ہیں۔
چونکہ پیاز میں تیز بو ہوتی ہے، اس لیے بہتر ہے کہ اس میں لیموں کا رس ملا کراستعمال کیا جائے تاکہ بو محسوس نہ ہو۔
ایک بلینڈر میں پیاز کو چھیل کر ڈال دیں اور اچھی طرح بلینڈ کریں، پھر اسے کسی چھلنی یا کپڑے سے چھان کر اس کا عرق نکال لیں۔
اب اسے بھوؤں پر لگائیں، ایک گھنٹے تک لگا رہنے پھر لیموں کے رس میں روئی ڈبو کر صاف کرلیں۔