Tag: Facilities in Jail

لاہور : تحریک انصاف کے صدر اور سابق وزیر اعلیٰ پنجاب چوہدری پرویزالہٰی نے چیئرمین پی ٹی آئی اور شاہ محمود قریشی کی طرح ضمانت کی اپیل کی تو عدالت میں قہقہے لگ گئے۔

تفصیلات کے مطابق لاہور ہائی کورٹ میں چوہدری پرویزالہٰی کو جیل میں بنیادی سہولتیں فراہم کرنے کی درخواست پر سماعت ہوئی، چوہدری پرویز الٰہی نے عدالت سے استدعا کی کہ میرے پاؤں پھول گئے ہیں، مجھے اسپتال میں داخل کرادیں۔

اس سے قبل جیل سپرنٹنڈنٹ کی جانب سے لاہور ہائی کورٹ میں رپورٹ پیش کی گئی، جس میں بتایا گیا کہ جیل میں روم کولر کی سہولت موجود ہے۔

جج نے چوہدری پرویزالہٰی سے استفسار کیا کہ آپ جیل کسٹڈی میں کب سے ہیں؟ جس پر ان کا جواب تھا کہ میں ڈیڑھ ماہ سے ہوں۔

عدالت نے پھر پوچھا کہ وہاں آپ کو کوئی مسئلہ درپیش ہے تو چوہدری پرویزالہٰی نے بتایا کہ وہاں مسائل ہی مسائل ہیں ایک پنکھا تھا وہ بھی اٹھا کر لے گئے۔

سابق وزیر اعلیٰ نے بتایا کہ اس جیل میں بی کلاس ہے ہی نہیں، میرے پاؤں بھی پھول گئے ہیں، مجھے سروسز اسپتال میں داخل کروا دیں تو بہتر ہے۔

عدالت نے ان سے کہا کہ آپ بتائیں کہ آپ کو کیا سہولت دی جائے؟ جس کے جواب میں ان کا کہنا تھا کہ چیئرمین پی ٹی آئی اور شاہ محمود قریشی کی طرح مجھے بھی ضمانت دے دیں تو بہتر ہے، چوہدری پرویزالہٰی کی اس بات سے عدالت میں قہقہے گونج اٹھے۔

پرویزالہٰی کا کہنا تھا کہ مجھے اے سی تو کیا ملتا بلکہ واش روم بھی اسی جگہ پر ہے جہاں میں قید ہوں، مجھے نہ تو ادویات کی سہولت ہے اور نہ ہی کھانے پینے کی، یہ سامان کی تصویریں کھینچ کر سامان واپس لے جاتے ہیں۔

انہوں نے عدالت کو بتایا کہ کیمپ جیل میں بی کلاس سہولیات دی جاتی ہیں جبکہ کوٹ لکھپت میں نہیں،
میرا برا حال ہو گیا ہے، یہ خود وہاں میرے ساتھ رہیں تو پتہ لگ جائے گا۔

پرویزالہٰی نے کہا کہ مجھے کم از کم پرسنل فزیشن کی تو اجازت دی جائے، اس موقع پر ان کے وکیل عامر سعید راں کا کہنا تھا کہ یہ تو ان کو میڈیکل ٹیسٹ کے لیے بھی لے کر نہیں جارہے۔

عدالت نے ایڈیشنل چیف سیکرٹری اور آئی جی جیل خانہ جات کو کل پیش ہونے کا حکم دے دیا، بعد ازاں لاہور ہائیکورٹ کے جسٹس امجد رفیق نے سماعت کل تک کیلئے ملتوی کردی۔