کراچی : سابق صدر آصف زرداری نے کہا ہے کہ اس بارعام انتخابات میں کوئی دھاندلی نہیں ہونے دیں گے، بلاول بھٹو اور آصفہ بھٹوخود انتخابی مہم چلائیں گے۔
ان خیالات کا اظہارانہوں نے بلاول ہاؤس کراچی میں فری ایند فیئر الیکشن نیٹ ورک (فافن) کے وفد سے ملاقات کے موقع پر گفتگو کرتے ہوئے کیا۔
فافن کے وفد نے سابق صدر کو انتخابی عمل اور ووٹر رجسٹریشن سے متعلق رپورٹ پیش کی، آصف زرداری نے کہا کہ2013کے عام انتخابات میں ہمارے ہاتھ پاؤں باندھ دیئے گئےتھے، مجھےایوان صدر سے نکلنےنہیں دیا گیا، بلاول تعلیم حاصل کر رہے تھے، یوسف رضاگیلانی کابیٹا انتخابات سے پہلے ہی اغواکر لیا گیاتھا۔
انہوں نے بتایا کہ ہماری قیادت کو دہشت گردوں کے ذریعےانتخابی مہم سے روکا گیا، اب حالات مختلف ہیں ہم سب انتخابی میدان میں ہوں گے، بلاول بھٹو اور آصفہ بھٹو اس بار انتخابی مہم چلائیں گے۔
اپنی گفتگو میں حکومت کو شدید تنقید کا نشانہ بناتے ہوئے آصف زرداری کا کہنا تھا کہ ن لیگی حکومت نے ملک کو کہیں کا نہیں چھوڑا۔
نوازشریف نے ہمیشہ دھاندلی کےذریعے مینڈیٹ چوری کیا، یہ کیسےممکن ہے کہ نوازشریف ہر انتخاب میں دوتہائی اکثریت لیں۔
آصف زرداری کا کہنا تھا کہ آئندہ انتخابات میں منشور کے ساتھ میدان میں اتریں گے، اس بارمینڈیٹ چوری نہیں ہوگا۔
انہوں نے کہا کہ فافن کی رپورٹس تشویشناک ہیں، ادارےتوجہ دیں، ایک کروڑ20لاکھ خواتین ووٹرز کاا ندراج نہ ہونا ناقابل قبول ہے، بلوچستان کی کل آبادی کاصرف 30فیصد ووٹر رجسٹرڈ ہے۔
بلوچستان کا70 فیصد ووٹرز کااندراج نہ ہونا بھی تشویشناک عمل ہے، انہوں نے مطالبہ کیا کہ الیکشن کمیشن اور دیگر متعلقہ ادارے ووٹوں کا اندراج یقینی بنائیں۔
