کراچی: وزیر اطلاعات سندھ ناصر حسین شاہ کا کہنا ہے کہ ایم کیو ایم پاکستان کو کہتا ہوں سیاست کریں صوبے کی بات نہ کریں، ایم کیو ایم پاکستان کے رہنما فیصل سبزواری نے جواب دیتے ہوئے کہا کہ آئین کے تحت مطالبہ کرنا کوئی غلط بات نہیں۔
اے آر وائی نیوز کے پروگرام ’الیونتھ آور’ میں گفتگو کرتے ہوئے وزیر اطلاعات سندھ ناصر حسین شاہ نے کہا کہ سندھ سے متعلق جب بھی بات آتی ہے ہم جذباتی ہوجاتے ہیں، ایم کیو ایم پاکستان کی جانب سے صوبے کی بات ہی کیوں کی جاتی ہے، ایم کیو ایم پاکستان کو کہتا ہوں سیاست کریں صوبے کی بات چھوڑ دیں۔
ناصر حسین شاہ نے کہا کہ یہ کہتے ہیں پی پی نے پورے سندھ میں کام نہیں کیا، تو ہم نے تعصب یا لسانیت کہاں کی ہے، نوکریوں سے متعلق کسی کے ساتھ ناانصافی نہیں کی۔
انہوں نے کہا کہ بانی ایم کیو ایم کو تو چھوڑا ہے ان کی سوچ بھی چھوڑ دیں، صوبے کی بات کریں گے تو اس سے نفرتیں بڑھیں گی، سندھ میں الگ صوبہ ہمیشہ کے لیے ناممکن ہے۔
سندھ کا 90 فیصد بجٹ اندرون سندھ پر لگایا جاتا ہے، فیصل سبزواری
ایم کیو ایم کے رہنما فیصل سبزواری کا کہنا ہے کہ سندھ کا 90 فیصد بجٹ اندرون سندھ پر لگایا جاتا ہے، کراچی کی ٹیکس کلیکشن 100 فیصد ہے، وزیراعلیٰ کہتے ہیں زراعت پر انہوں نے زیادہ پیسہ لگایا، زیادہ پیسہ لگانے کے باوجود سندھ میں زراعت سے 58 کروڑ جمع ہوا۔
انہوں نے کہا کہ انتظامی اختیارات کی تقسیم سے صوبے کے مسائل حل کیے جاسکتے ہیں، آج لاڑکانہ کا نوجوان بھی اپنا کام کرانے کراچی آتا ہے، کراچی کے ڈومیسائل والے کو سرکاری نوکری نہیں ملتی۔
فیصل سبزواری نے کہا کہ کراچی کے مسائل ایگزیکٹو اتھارٹی کے ذریعے ہی حل ہوں گے، آٗئین پاکستان میں رہتے ہوئے ایک مطالبہ کررہے ہیں، آئین کے تحت مطالبہ کرنا کوئی غلط بات ہے۔
