کراچی : وفاقی وزیر آبی وسائل فیصل واوڈا نے کہا ہے کہ ماضی حکومتوں نے پی آئی اے کو تباہ کیا، ادارے کو اس کا کھویا ہوا مقام واپس دلائیں گے۔
یہ بات انہوں نے پی آئی اے کے سی ای او ایئر مارشل ارشد ملک سے ملاقات کے بعد میڈیا سے گفتگو کرتے ہوئے کہی، ملاقات میں پی آئی اے سمیت دیگر امور پر تبادلہ خیال کیا گیا۔
بعدازاں میڈیا سے گفتگو کرتے ہوئے فیصل واوڈا کا کہنا تھا کہ سی ای او پی آئی اے بہترین انسان ہیں، پی آئی اے کی بحران کا مسئلہ اضافی ملازمین ہیں تاہم اس کی ڈاون سائزنگ کا کوئی ارادہ نہیں ہے، انہوں نے کہا کہ 8آدمیوں کی گاڑی پر800 لوگ چڑھائے جائیں تو گاڑی تباہ ہوگی، انہی وسائل میں رہتے ہوئے حل نکالیں گے۔
فیصل واوڈا نے کہا کہ ابھی تک ایوی ایشن کا مشیر یو وزیر کیوں نہیں رکھا گیا، اس حوالے سے تمام معاملات وزیر اعظم خود دیکھتے ہیں، پی آئی اے کے مالی بحران کو دور کرنے کیلئے ہوسکا تو پیکچ کی سفارش کریں گے۔
فیصل واوڈا کا کہنا تھا کہ ماضی حکومتوں نے پی آئی اے کو تباہ کیا، پی آئی اے کا کھویا ہوا مقام واپس لے کر آئیں گے، وزیراعظم عمران خان پی آئی اے کی بحالی اور ترقی چاہتے ہیں۔
پی آئی اے نے دنیا بھر کی ایئرلائنز کو بنایا آج خود زوال کا شکار ہے، پی آئی اے نیشنل کیریئر ہے، یہ ہمارا اثاثہ ہے، اس اثاثے کو بچانا ہم سب کا فرض ہے۔
