Tag: faisalabad

فیصل آباد : پیپلز پارٹی پنجاب کے صدر قمر زمان کائرہ نے کہا ہے کہ نوازشریف آپ نے پارلیمنٹ کو غیرمعتبر کیا اور سیاسی جماعتوں کو دھوکے دیئے ہیں، اڈیالہ جیل آپ کی منتظر ہے، کہا بھی تھا کہ استعفیٰ دے دیں ورنہ کالر سے پکڑکرنکال دیئےجائیں گے۔

ان خیالات کا اظہار انہوں نے فیصل آباد میں صحافیوں سے گفتگو کرتے ہوئے کیا، قمر زمان کائرہ کا کہنا تھا کہ میاں صاحب تاش کے بکھرنےکا وقت شروع ہوگیاہے، اڈیالہ جیل آپ کی منتظر ہے، اب آپ اڈیالہ جیل کی یاترا کرنے آئیں گے۔

انہوں نے کہا کہ نواز شریف کو میٹرو، موٹروے، اورنج ٹرین، نندی پور منصوبے کا حساب دینا ہوگا، جےآئی ٹی میں جواب نہیں دے سکے، اب میڈیا پربیان بازی کرتے ہیں، ہم سب کا احتساب چاہتے ہیں اور ہرحال میں چاہتے ہیں۔

ان کا کہنا تھا کہ میاں صاحب آپ نہ وہاں جیت سکے ہیں اور نہ ہی یہاں، آ پ نے پارلیمنٹ کا وقار کم کیا، میاں صاحب آپ نےدس سال تک ملک ایک آمر کے نام کیا، میاں صاحب آپ نے پارلیمان کو غیرمعتبر کیا ہے، آپ کو کہا بھی تھا کہ استعفیٰ دے دیں، ورنہ کالر سے پکڑ کر نکال دیئےجائیں گے۔

نوازشریف نے ملک سے جانے کیلئے قوم کو دھوکا دے کر راتوں رات معافی نامہ لکھا، نواز شریف کے ابھی تھوڑے سے کرتوت سامنے آئے اور کہتے ہیں کہ ہم پر ظلم ہوا ہے، آپ کا ابھی بہت کچھ سامنے آنا باقی ہے۔

انہوں نے سابق وزیراعظم پر شدید تنقید کرتے ہوئے کہا کہ نوازشریف آپ نے سیاسی جماعتوں سے ہمیشہ دھوکا کیا ہے، آپ کی موجودگی میں بی بی شہید پر گھٹیا الزامات لگتے رہے، آپ کو اب اندازہ ہوگیا ہوگا کہ کیس اپنے خلاف آجائے تو کتنی تکلیف ہوتی ہے؟

ہمارا ماضی عدالتوں کے ساتھ آرام دہ نہیں تھا، ہم عدلیہ کا احترام کرتے ہیں۔ 40سال سے مقدمے بنتے جارہے ہیں لیکن ہمارے خلاف ایک بھی سول جج کا فیصلہ نہیں ہے۔

ان کا مزید کہنا تھا کہ عائشہ گلالئی کو ایسےعزتیں نہیں اچھالنی چاہئیں، ان کو عدالت میں ثبوت دینے چاہئیں، یہ ملک اور اس کے ادارے اشرافیہ کیلئے نہیں ہیں۔

بلاول بھٹو اپنے نانا اور والدہ کا مشن لیکر نکلے ہیں، وہ ملک بھرمیں دورے کریں گے، کنونشن بھی ہوں گے جلسےبھی ہوں گے، بلاول بھٹو ساہیوال، اٹک، گوجرانوالہ اور چنیوٹ میں جلسوں سے خطاب کرینگے۔