Tag: faisalabad

  • پی ٹی آئی کے پلان سی پر آج سے عمل درآمد شروع

    پی ٹی آئی کے پلان سی پر آج سے عمل درآمد شروع

    فیصل آباد: پاکستان تحریک انصاف کے پلان سی پر آج سے عملدرآمد شروع ہورہا ہے، جس میں سب سے پہلے فیصل آباد کو بند کیا جائے گا تو انتظامیہ نے بھی احتجاج کو ناکام بنانے کے لیے کارروائیاں تیز کردی ہیں۔

    کپتان کی جانب سے پلان سی کے اعلان پر پی ٹی آئی کے کارکن آج فیصل آباد بند کرنے کے لیے پرعزم ہیں، جو ایک روز قبل ہی گھنٹہ گھر چوک پہنچ گئے تھے۔ تحریک انصاف کے احتجاج کو ناکام بنانے کی کوششوں میں ن لیگ کے کارکن بھی مصروف ہیں۔

    فیصل آباد میں پاکستان تحریک انصاف کے پلان ڈی کے مطابق شہر بھر کو بند کیا جائیگا، شہر کی خاص شاہراہیں بلاک کردی جائیں گی، تجارتی مزاکزاور دیگر اسکول و دفاتر کو بھی بند کرنے کی کوشش کی جائیگی۔ جس کا سلسلہ شروع ہو گیا ہے۔

    سی پی او سہیل تاجک کے مطابق مختلف مقامات پر چار ہزار سے زائد پولیس افسر اور اہلکار سیکیورٹی ڈیوٹی پر تعینات کیے گئے۔ ان کا کہنا ہے کہ توڑ پھوڑ یا تشدد کرنے والوں کے خلاف کارروائی کی جائے گی۔

    انتظامیہ نے سرکاری اسپتالوں میں ہائی الرٹ جاری کردیا ہے اور عملے کی چھٹیاں منسوخ کرکے سو فیصد حاضری کو یقینی بنانے کی ہدایت کی ہے۔

    گزشتہ روز فیصل آباد میں تحریک انصاف اور مسلم لیگ نون کے کارکنوں میں تصادم سے گھنٹہ گھر چوک میدان جنگ بن گیا، دونوں جماعتوں کے کارکنوں نے ڈنڈوں اورپتھروں کا آزادانہ استعمال کیا اور ایک دوسرے پر انڈے اور ٹماٹر بھی پھینکے۔

    ادھر ڈی سی او نے گھنٹہ گھر چوک پر جلسے کی اجازت دینے سے انکار کردیا ہے تو پی ٹی آئی کو پی ایم سی چوک سرگودھا روڈ پر دھرنا سے بھی روک دیا ہے۔ ان تمام اقدامات کے باوجود پی ٹی آئی کے قیادت اور کارکنان شہر بند کرکے احتجاج کرنے کے لیے پرعزم ہیں۔

    دوسری جانب تحریک انصاف کے آج فیصل آباد بند کرنے کے اعلان کے پیش نظر تحریک انصاف کے کارکن قافلوں کی شکل میں روانہ ہو رہے ہیں اور پولیس نے کریک ڈاون شروع کر دیا ہے۔ ذرائع کے مطابق پولیس رات بھر کارکنوں کے گھروں میں چھاپے مارتی رہی۔ اس صوتحال کے بیش نظر زیادہ تر کارکنوں نے صبح نکلنے کے بجائے رات سے ہی فیصل آباد کے قریبی علاقوں میں پناہ لے لی تھی تا کہ با آسانی فیصل آباد پہنچا جا سکے۔

    سنی اتحاد کونسل نےفیصل آباد میں تحریک انصاف کی ہڑتال کی حمایت کا اعلان کردیا، حامد رضا کہتے نواز حکومت نے تاجربرادری سے زبردستی دکانیں کھلوائیں تو پھر حالات کی ذمے دار بھی وہی ہوگی۔

    فیصل آباد کے وکلا، تاجر، صنعتکار اور اساتذہ نے تحریک انصاف کے احتجاج کی مکمل حمایت کا اعلان کیا ہے۔ ٹرانسپورٹرز ایسوسی ایشنز، پاور لوم ایسوسی ایشن، ڈسٹرکٹ بار ایسوسی ایشن اور مختلف تاجر تنظیموں نے عمران خان کے پلان سی کے تحت فیصل آباد بند کرنے کی حمایت کردی ہے۔

    تاجر رہنما ٹرانسپورٹرز کی جانب سے ہڑتال کے اعلان کے بعد انتظامیہ نےجنرل بس اسٹینڈ میں قائم تین ٹرانسپورٹرز کے دفاتر اور پٹرول پمپ سیل کر دیئے۔ ٹرانسپورٹرز کے احتجاج پر دفاتر اور پٹرول پمپس کو کھولنا پڑا، پرائیویٹ اسکولز ایسوسی ایشنز نے بھی فیصل آباد کے تمام نجی اسکول بند کرنے کا اعلان کیا ہے۔

  • فیصل آباد: پی ٹی آئی کی ہڑتال ناکام بنانے کیلئے حکومت سرگرم

    فیصل آباد: پی ٹی آئی کی ہڑتال ناکام بنانے کیلئے حکومت سرگرم

    فیصل آباد : حکومت نے پیر کو فیصل آباد میں پی ٹی آئی کا شٹر ڈائون ناکام بنانے کیلئے اہم فیصلے کرلئے۔ آٹھ دسمبر کو بجلی کی لوڈ شیڈنگ نہیں ہوگی،تاجروں اور صنعت کاروں کو بھی رام کرنے کیلئے حکومت سرگرم ہوگئی ۔

    حکومت پنجاب نے تحریک انصاف کاآٹھ دسمبر کو فیصل آباد میں احتجاج روکنے کے لیے حکومتی حکمت عملی تیارکرلی، ذرائع کے مطابق فیصل آباد سے جھنگ، چنیوٹ، لاہور، جڑانوالہ، سمندری اور ستیانہ جانے والی سڑکوں پر پولیس کی بھاری نفری تعینات کی جائے گی۔

    آٹھ دسمبر کو فیصل آباد ٹیکسٹائل انڈسٹری کو پیر کے روز بجلی کی لوڈشیڈنگ نہ کرنے کا فیصلہ کیا گیا ہے ، اس اقدام کامقصد ٹیکسٹائل ملز سے مزدوروں کو تحریک انصاف کے احتجاج میں شامل ہونے سے روکنے کے لیے کیا گیا۔

    فیصل آباد میں دیگر اضلاع سے پولیس کی بھاری نفری طلب کر لی گئی، جبکہ تاجروں اور فیکٹری مالکان کو احتجاج سے روکنے کے لیے صنعتی تنظمیوں کے صدور سے حکومتی ارکان نے رابطے شروع کر دئے ہیں۔

    سابق صوبائی وزیرقانون رانا ثنااللہ ور عابد شیر علی تحریک انصاف کا احتجاج ناکام بنانے کے لیے متحرک ہوگئے ہیں۔

  • پیرمحل: بس کی موٹرسائیکل کو ٹکر،2کمسن بھائی جان سے گئے

    پیرمحل: بس کی موٹرسائیکل کو ٹکر،2کمسن بھائی جان سے گئے

     فیصل آباد : پیر محل کے علاقے میں ٹریفک حادثے نے دو کمسن بھائیوں کی جان لے لی۔

    فیصل آباد کے علاقے پیر محل میں صبح ہی صبح ٹوبہ گجرا روڈ پر موٹر سائیکل اور بس کے درمیان تصادم ہوا، حادثے کے نتیجے میں دو بھائی جاں بحق ہوگئے جبکہ دو بھائیوں کو  شدید زخمی حالت میں اسپتال پہنچایا، جائے حادثہ پر لواحقین پہنچے تو انہیں اپنے پیاروں کی موت کی خبر ملی،  غم وغصے میں لواحقین نے لاشیں سڑک پر رکھ کر احتجاج کیا اور فیصل آباد ملتان روڈ بلاک کردی۔

  • بچی اغوا کرنے کوشش ، شہریوں نے ملزم پکڑلیا

    بچی اغوا کرنے کوشش ، شہریوں نے ملزم پکڑلیا

    فیصل آباد : صنعتی شہر کے وسطی علاقے سمن آباد میں گیارہ سالہ بچی کو اغوا کرنے والے ملزم کو شہریوں نے قابو کرلیا تشدد کے بعد پولیس کے حوالے کردیا۔

    تھانہ سمن آباد کے علاقہ مدنی چوک کے رہائشی محمد رمضان کی گیارہ سالہ بچی سودا سلف لینے دکان پرجارہی تھی کہ منورنامی شخص اسے یونیفارم دلانے کا جھانسہ دے کر قریبی قبرستان لے گیا بچی کے شور مچانے پر علاقہ مکینوں نے قبرستان میں پہنچ کر ملزم کو پکڑ لیا اور تشدد کا نشانہ بنانے کے بعد پولیس کے حوالے کردیا۔

    شہریوں کا کہنا تھا بار بار اطلاع کرنے کے باوجود سمن آباد پولیس دو گھنٹے بعد پہنچی ۔

  • لوڈشیڈنگ کیخلاف احتجاج، مظاہرین نے پولیس اہلکارکی پٹائی کردی

    لوڈشیڈنگ کیخلاف احتجاج، مظاہرین نے پولیس اہلکارکی پٹائی کردی

    فیصل آباد : نشاط آباد کے مکینوں کا گیس لوڈ شیڈنگ کے خلاف احتجاج، مظاہرین نے روڈ بلاک کرکے گو نواز گو کے نعرے بھی لگائے پولیس کے گلوبٹ کو پکڑ کر خوب دھلائی کر دی۔

    تفصیلات کے مطابق نشاط آباد اور اس سے ملحقہ علاقوں کے مکینوں کو گزشتہ دو سال سے گیس لوڈشیڈنگ کا سامنا ہے۔ بندش کے خلاف مظاہرین نے احتجاجا ٹائروں کا آگ لگا کر روڈ بلاک کردی۔ برتن اٹھائے خواتین اور بچوں کی بڑی تعداد بھی احتجاج میں شریک تھی۔

    مظاہرین نے حکومت کے خلاف شدید نعرے بازی بھی کی۔ اس موقع پر زبردستی سڑک کھولنے کی کوشش میں ناکامی کے بعد مبینہ پویس کانسٹیبل الیاس نے مظاہرین پر پستول تان لیا۔

    جس پر مظاہرین مشتعل ہوگئے اور انہوں نے پیستول چھین کر اس کی خوب دھلائی کی اور بعد میں اسے پولیس کے حوالے کر دیا۔گیس بحال ہونے پرمظاہرین نے احتجاج ختم کر دیا۔

  • غریبوں کےپیسوں سےانقلاب لائیں گے، ڈاکٹرطاہرالقادری

    غریبوں کےپیسوں سےانقلاب لائیں گے، ڈاکٹرطاہرالقادری

    فیصل آباد: ڈاکٹر طاہرالقادری کاکہناہےجس سیاسی جماعت میں جاگیرداروں کاپیسہ لگتا ہےان کا منشور بک جاتا ہے،عوامی تحریک غریبوں کی جنگ غریبوں کےپیسوں سےلڑےگی۔

    فیصل آباد میں میڈیا سے گفتگومیں عوامی تحریک کے سربراہ طاہرالقادری کا کہنا تھا کہ وڈیرے اور جاگیردار پیسےکےبل بوتےپر سیاسی جماعتوں پراثرانداز ہوتےہیں،لیکن عوامی تحریک غریبوں کےپیسوں سےانقلاب لےکر آئےگی۔

    اس سے پہلےفیصل آبادمیں ڈاکٹر طاہر القادری کی صدارت میں پی اے ٹی کاتنظیمی اجلاس ہوا۔ اجلاس میں فیصلہ کیا گیا کہ ڈاکٹر طاہرالقادری تئیس نومبر کو بھکر، تیس نومبرکوسرگودھا اور سات دسمبر کو میانوالی میں جلسہ کریں گے۔ اجلاس میں سردار آصف احمد علی اور رحیق عباسی بھی شریک تھے۔

  • عوام سپورٹ،نوٹ اور ووٹ دیں انقلاب دوں گا،طاہرالقادری

    عوام سپورٹ،نوٹ اور ووٹ دیں انقلاب دوں گا،طاہرالقادری

    فیصل آباد: پاکستان عوامی تحریک نے فیصل آباد میں بھرپور عوامی قوت کا مظاہرہ کیا، علامہ طاہر القادری  کا کہنا ہے کہ عوام سپورٹ ،نوٹ اور ووٹ دیں، انقلاب دہلیز تک پہنچا دوں گا۔

    پاکستان عوامی تحریک کے سربراہ طاہرالقادری نے فیصل آباد میں جلسے سے خطاب میں کہا کہ تین چیزیں دینے کا وعدہ کریں انقلاب دہلیز پر پہنچادوں گا، جلد پورے پاکستان میں دھرنوں کا اعلان کروں گا۔

    طاہرالقادری کا کہنا تھا کہ کسی بھی روز ملک بھرمیں دھرنے کا اعلان کردوں گا، 60روزہ دھرنے سے حکومت تو نہ گئی بڑا انقلاب برپا ہوگا انتخاب کا وقت قریب ہے، ووٹ سے ظلم کا نظام بدل دیں گے ۔

    انھوں نے کہا کہ غریبوں کے نوٹوں نے لوٹوں اور لٹیروں کا مقابلہ کرنا ہے۔

    علامہ طاہرالقادری نے ملک میں متعدد صوبے بنانے کا اعلان کیا، ان کا کہنا تھا کہ جہاں ضروت ہوگی صوبہ بنے گا، علامہ طاہر القادری نے مزید کہا کہ فیصل آباد پنجاب کا دل ہے، فیصل آباد کا فیصلہ پورے پنجاب کا فیصلہ ہے۔

    پاکستان عوامی تحریک کے جلسے میں اتحادی جماعتوں کے رہنماؤں کا کہنا تھا کہ شہداء خون رائیگاں نہیں جائے گا، لاکھوں کا مجمع ملک میں تبدیلی کا واضح ثبوت ہے۔

    فیصل آباد دھوبی گھاٹ میں پاکستان عوامی تحریک کے جلسے خطاب کرتے ہوئے سنی اتحاد کونسل کے سربراہ صاحبزادہ حامد رضا کا کہنا تھا کہ ایسی جمہوریت پر لعنت ہے،جہاں غریبوں کا استحصال کیا جائے، مجلس وحدت مسلمین کے سربراہ ناصر عباس کا کہنا تھا کہ ساٹھ دن کے دھرنے نے سب کچھ بدل دیا ہے، سانحہ ماڈل ٹاؤن کے شہداء کا خون رائیگا نہیں جائے گا۔

    فیصل آباد کا جلسہ لوگوں کی حاضری کے حوالے ایک کامیاب جلسہ تھا مگر عوامی تحریک کا اصل امتحان اُنیس اکتوبر کو لاہور میں ہوگا جہاں مینارِ پاکستان پر جلسے کا اعلان کیا گیا ہے۔

  • پی اے ٹی کوفیصل آباد میں جلسہ کرنے کی اجازت مل گئی

    پی اے ٹی کوفیصل آباد میں جلسہ کرنے کی اجازت مل گئی

    فیصل آباد: پاکستان عوامی تحریک کوبارہ اکتوبرکو دھوبی گھاٹ پرجلسے کی اجازت مل گئی ہے، حالیہ جلسہ عوامی تحریک کے قائد کی جانب سے موجودہ حکومت کے خلاف دھرنوں کے ساتھ سیاسی سرگرمیاں شروع کرنے کے اعلان کے بعد منعقد کیا جارہا ہے۔

    ڈاکٹرطاہرالقادری نے اسلام آباد میں جاری دھرنے کے ساتھ کراچی، لاہور، گوجرانوالا، فیصل آباد سمیت شہرشہرجلسوں کا اعلان کیا تھا اور اُنھوں نے جلسوں کی تیاری کے لئےمتعلقہ شہروں سے تعلق رکھنے والےکارکنوں کو دھرنے سے جانے کی ہدایت کی تھی۔

    پاکستان عوامی تحریک کی جانب سے تاریخی دھوبی گھاٹ پرجلسے کے لئے درخواست دی گئی جس کو منظور کرتے ہوئےضلعی انتظامیہ نے جلسہ منعقد کرنے کی اجازت دے دی ہے۔

  • عمران خان جھوٹے، گورنرپنجاب سرمایہ ہیں،عابد شیرعلی

    عمران خان جھوٹے، گورنرپنجاب سرمایہ ہیں،عابد شیرعلی

    فیصل آباد : وزیر مملکت پانی و بجلی عابد شیر علی کا کہنا ہے کہ بھارت مریخ پرپہنچ گیا اورہم دھرنوں میں پھنسے ہوئے ہیں ۔ عید سے پہلے قربانی کی باتیں کرنے والوں کی اپنی قربانی ہو گئی ۔

    فیصل آباد میں فیسکو ہیڈ کوارٹرز میں میڈیا سے گفتگو کر تے ہوئے عابد شیرعلی نے کہا کہ دھرنے والے بتائیں ان کے پاس اربوں روپے کہاں سے آرہے ہیں ۔

    عابد شیر علی کا کہنا تھا کہ چند افراد کو ہمارے پروگرام خراب کرنے کے لئے بھیج دیا جاتا ہے ۔ اس طرح خون خرابے کو دعوت دی جا رہی ہے ۔ اس طرح کی حرکات سے ہمارے کارکنان کے صبر کا پیمانہ لبریز ہوجائے گا ۔

    وزیرِمملکت کا کہنا تھاکہ لانگ مارچ اوردھرنے دینے والوں کا مقصد ملکی معیشت اورکلچرکو تباہ کر نا ہے۔ عمران خان کو جھوٹ بولنے میں پی ایچ ڈی کی ڈگری دینی چاہئے ۔

    عمران جھوٹو ں کے بے تاج بادشاہ ہیں ۔ گورنر پنجاب کی تبدیلی کے حوالے سے ایک سوال پرعابد شیرعلی کا کہنا تھا گورنر پنجاب ہمارا سرمایہ ہیں ان کی تبدیلی کی باتیں بے بنیاد ہیں۔

  • ایم پی اے رانا شعیب تین روزہ ریمانڈ پر پولیس کے حوالے

    ایم پی اے رانا شعیب تین روزہ ریمانڈ پر پولیس کے حوالے

     فیصل آباد: پولیس تھانے پر حملہ کرکے اپنے ساتھیوں کو چھڑانے والے ایم پی اے رانا شعیب ادریس کو تین روزہ جسمانی ریمانڈ پر پولیس کے حوالے کردیا گیا۔

    پولیس تھانہ پر حملہ کرکے پولیس اہلکاروں کو زخمی کرنے کے مقدمے کی سماعت انسداد دہشتگردی کی عدالت میں ہوئی۔

    پولیس نے عدالت کو درخواست دی کہ ملزمان سے تھانے پر حملے میں استعمال ہونے والا اسلحہ برآمد کرنا ہے جس کیلئے ملزمان کو ریمانڈ پر دیا جائے، انسداد دہشتگردی کی عدالت نے درخواست منظور کرتے ہوئے حملے کے مرکزی کردار رکن صوبائی اسمبلی اور مسلم لیگ ن کے رہنما شعیب اردیس کو تین روزہ جسمانی ریمانڈ پر پولیس کے حوالے کردیا گیا۔

    عدالت نے مرکزی ملزم شعیب ادریس کے ساتھ دیگر سات ملزمان کا بھی جسمانی ریمانڈ دیدیا ۔