فیصل آباد : ریڑھی بان کے نام پر ایک کروڑ اکیس لاکھ روپے کی گندم فروخت کرنے کا انکشاف ہوا ہے، ایف بی آر کا نوٹس ملنے پر غریب شہری چکرا کر رہ گیا۔
تفصیلات کے مطابق جعلی بینک اکاؤنٹس کے بعد جعلی بیوپاری بھی سامنے آگیا، فیصل آباد کے علاقے چوک اعظم کے ریڑھی بان محمد یاسین کے نام پر ایک کروڑ اکیس لاکھ روپے کی گندم فروخت کا انکشاف ہوا ہے۔
ایف بی آر نے محمد یاسین کو ٹیکس کی ادائیگی کا نوٹس بھیجا توغریب شہری چکرا کر رہ گیا۔ فیصل آباد سے چھ کروڑ سینتالیس لاکھ کی بےنامی ٹرانزیکشنز کا انکشاف ہوا ہے، محمد یاسین نے ٹرانزیکشنز سے لاعلمی کا حلف نامہ داخل کرا دیا ہے۔
یاد رہے کہ منی لانڈرنگ سے متعلق تحقیقات میں روز بروز نئے انکشافات سامنے آرہے ہیں. گزشتہ چند ماہ میں فالودے والے، رکشے والے، سرکاری ملازمین کے ایسے اکاؤئنٹس سامنے آچکے ہیں، جن سے غیر قانونی طور پر اربوں روپے کی منتقلی ہوئی۔
سیالکوٹ کے رہائشی نوجوان مذاکر حسین شاہ کے جعلی اکاؤنٹ میں کروڑوں روپے کی ٹرانزیکشن سامنے آئی تھی، اس کا انکشاف اس وقت ہوا جب وہ اکاؤنٹ کھلوانے بینک گیا، شہری کے اکاؤنٹ سے مجموعی طور پر 7 کروڑ 44 لاکھ 76 ہزار 322 روپے کی ٹرانزیکشن کی گئی تھی۔
یاد رہے چند روز قبل کراچی کے علاقے کورنگی ڈھائی نمبر کی رہائشی ایک خاتون ثروت زہرا کے جعلی بینک اکاؤنٹ کا انکشاف ہوا تھا، جس میں کروڑوں روپے کی ٹرانزیکشن کی گئی تھی۔
مزید پڑھیں: جعلی اکاؤنٹس کیس، مردہ شخص کے بینک سے اربوں روپے کی منتقلی کا انکشاف
اس سے قبل حیدرآباد کے رہائشی پردیپ کمار کے اکاؤنٹ میں چار کروڑ 99 لاکھ 54 ہزار 432 روپے جبکہ شہر قائد کے رہائشی فالودہ فروش عبدالقادر کے اکاؤنٹ میں 2 ارب روپے کی موجودگی کا انکشاف ہوا تھا۔