سورج کو اپنے سائے سے ڈھانپ کر اندھیرا کردینے والے چاند کی حیرت انگیز ویڈیو نے دیکھنے والوں عجیب کشمکش میں مبتلا کردیا، لوگ اس تذبذب میں ہیں کہ آخر یہ کیا ہوا؟
سوشل میڈیا پر بہت زیادہ وائرل ہونے والی ویڈیو میں چاند کی ایک عجیب اور خوفناک نظر آنے والی حرکت کو دکھایا گیا ہے، ویڈیو میں دیکھا جاسکتا ہے کہ چاند نے سورج کو بھی ڈھانپ لیا جس سے چند لمحوں کیلئے پوری دنیا میں اندھیرا چھا گیا۔
مذکورہ کلپ کو سوشل میڈیا پر بڑے پیمانے پر پھیلا دیا گیا تاہم صارفین کی جانب سے مختلف قسم کی آرا سامنے آئیں جس سے ویڈیو کی صداقت پر سوالات کھڑے ہوگئے۔
ایک ٹویٹر اکاؤنٹ پر ویڈیو کو شیئر کرکے کیپشن میں لکھا گیا کہ تصور کریں کہ آپ آرکٹک میں کینیڈا اور روس کے درمیان ایک جگہ پر بیٹھے ہیں اور صبح کا چاند اچانک 30سیکنڈ کے اندر اپنے حقیقی سائز میں طلوع ہوتا ہے اور سورج کے سامنے آکر اپنے سائے سے اس کو مکمل طور پر چھپا دیتا ہے جس سے پانچ سیکنڈ کے لیے اندھیرا ہوجاتا ہے۔
تخيل وأنت قاعد في المكان اللي بين كندا وروسيا في القطب الشمالي يطلع فجأة القمر الصبح بحجمه الحقيقي خلال30 ثانية ويحجب عنك الشمس بشكل تام لفترة 5 ثواني .. مشهد مبهر
— عزيز | Aziz (@3izez_) May 18, 2023
اس ویڈیو کلپ میں نظر آنے والے منظر کو سچا سمجھنے والے اور اس کی صداقت پر سوال اٹھانے والوں کے درمیان بہت سے اختلافی بیانات کا تبادلہ ہوا، تاہم بہت سے صارفین نے اس بات پر اتفاق کیا کہ یہ ڈیجیٹل ٹولز کے ساتھ تبدیل کیا جانے والا ایک غیر حقیقی کلپ ہے۔
جہاں تک اس کلپ کی سچائی کا تعلق ہے "ٹویٹر” پر سعودی عرب میں انسداد افواہ اتھارٹی کے اکاؤنٹ کے مطابق یہ ویڈو کلپ غلط ہے اور اسے درحقیقت ڈیجیٹل طور پر تبدیل کیا گیا ہے۔
واضح رہے کہ یہ ویڈیو یوکرین کے ڈیجیٹل آرٹسٹ الیکسی پیٹریو نے شائع کی تھی۔ 2021 میں اس کے "ٹک ٹاک” اکاؤنٹ پر شائع ہونے والی ویڈیو کو این ایف ٹی علامت کے طور پر فروخت کیا گیا۔
اس بات سے ظاہر ہوتا ہے کہ سوشل میڈیا پر کسی بھی خبر کو آنکھین بند کرکے سچ نہیں مان لینا چاہیے بلکہ حتی الامکان کوشش کرنی چاہیے کہ اس کی صداقت سامنے آنے بعد ہی اسے شیئر کیا جائے۔
