ARYNews.tv | Urdu – Har Lamha Bakhabar

Tag: Farmers

  • کسانوں نے پولیس ڈرون کیسے گرایا؟ حیرت انگیز ویڈیو

    کسانوں نے پولیس ڈرون کیسے گرایا؟ حیرت انگیز ویڈیو

    نئی دہلی: بھارت میں سراپا احتجاج کسانوں نے پتنگ سے پولیس ڈرون گرانے کا حیرت انگیز کارنامہ انجام دیا ہے۔

    تفصیلات کے مطابق بھارت میں کئی دنوں سے کسانوں کا احتجاج جاری ہے، جسے فی الوقت روک دیا گیا ہے کیوں کہ اتوار کو حکومتی وزرا کے ساتھ مذاکرات کا دوسرا دور چلے گا، تاہم اس احتجاج کے دوران گزشتہ دنوں ایک حیرت انگیز واقعہ رونما ہوا۔

    دہلی میں داخل ہونے کے لیے احتجاج کے دوران پولیس نے کسانوں پر لاٹھی چارج کیا اور کئی مقامات پر ان پر آنسو گیس کے گولے بھی داغے اور ربڑ کی گولیاں چلائیں، پولیس نے آنسو گیس کے گولے چھوڑنے کے لیے ڈرونز کا بھی استعمال کیا۔

    تاہم ایک ویڈیو سامنے آئی ہے جس میں دیکھا جا سکتا ہے کہ کسانوں نے حیرت انگیز طور پر پتنگ اڑا کر اس کے ذریعے ڈرون کو زمین پر گرا دیا، جس سے لگتا ہے کہ کسانوں نے بھی اس صورت حال سے نمٹنے کے لیے پوری تیاری کی ہوئی ہے۔

    رپورٹس کے مطابق مظاہروں کے دوران کسانوں نے پتنگیں اڑا کر اپنے اوپر آسمان پر اڑنے والے ڈرونوں کو نیچے گرانے کی کوششیں کیں، امبالا کے قریب شمبھو بارڈر پر پتنگ کے ذریعے آخر کار ایک ڈرون گرانے میں کسان کامیاب ہو گئے۔

    سوشل میڈیا پر کسانوں کی جانب سے پولیس انتظامیہ کے ڈرون پر اس دیسی ’جگاڑ‘ سے حملے کی ویڈیو وائرل ہو گئی ہے۔ واضح رہے کہ کسان بھارت کی مودی حکومت سے اپنی فصلوں کی زیادہ قیمتوں کا مطالبہ کر رہے ہیں۔

  • آئی ایم ایف کی شرط پر کسانوں کے لیے بجلی مہنگی

    آئی ایم ایف کی شرط پر کسانوں کے لیے بجلی مہنگی

    اسلام آباد: وفاقی حکومت نے زرعی صارفین کے لیے بجلی مہنگی کردی، کسان پیکج کے تحت دی گئی سبسڈی انٹرنیشنل مانیٹری فنڈ (آئی ایم ایف) کی شرائط پر واپس لی گئی ہے۔

    تفصیلات کے مطابق انٹرنیشنل مانیٹری فنڈ (آئی ایم ایف) کی شرط پر کسانوں کے لیے بجلی مہنگی کردی گئی، کسان پیکچ کے تحت زرعی صارفین کو بجلی پر 3.60 روپے فی یونٹ سبسڈی دی گئی تھی جو واپس لے لی گئی۔

    وفاقی حکومت نے کسانوں کے لیے بجلی 3 روپے 60 پیسے فی یونٹ مہنگی کی ہے۔ زرعی صارفین کو آج سے بجلی 13 روپے کے بجائے 16.60 روپے فی یونٹ ملے گی۔

    بجلی مہنگی ہونے کے بعد وفاقی حکومت کو زرعی صارفین سے جون تک 14 ارب روپے حاصل ہوں گے۔

    اس حوالے سے پاور ڈویژن نے فیصلے پر عملدر آمد کے لیے کے الیکٹرک سمیت بجلی تقسیم کار کمپنیوں کو خط لکھ دیا ہے اور خط کی نقول وزارت خزانہ اور وزارت نیشنل فوڈ سیکیورٹی کو بھی بھجوا دی گئی۔

  • کاشت کاروں کے ساتھ ناروا سلوک : شوگرملز مالکان کیخلاف مقدمہ

    کاشت کاروں کے ساتھ ناروا سلوک : شوگرملز مالکان کیخلاف مقدمہ

    لاہور : شوگرملز کی جانب سے گنے کے کاشت کاروں کے ساتھ ناروا سلوک کرنے پر کین کمشنر پنجاب نے شاہ کوٹ میں شوگر مل مالکان کیخلاف مقدمے کا حکم دے دیا۔

    پاکستان میں گنے کی قیمت اور کرشنگ کے حوالے سے شوگر ملز مالکان اور کاشتکاروں کے مابین تنازع گزشتہ کئی برسوں سے جاری ہے، اس سال پنجاب کے کاشتکاروں کی جانب سے کی جانے والی شکایات کا کین کمشنر پنجاب نے نوٹس لے لیا۔

    اس سلسلے میں کین کمشنر پنجاب نے کہا ہے کہ ملز مالکان کیخلاف کاشت کاروں کی جانب سے متعدد شکایات موصول ہوئی ہیں۔

    کین کمشنر کا کہنا ہے کہ شوگرملز کو متعدد نوٹس جاری کیے گئے لیکن جواب نہیں ملا، جس کے بعد ایڈیشنل کین کمشنر پنجاب کی سربراہی میں چھاپہ مار ٹیم تشکیل دی گئی۔

    چھاپوں کے دوران معلوم ہوا کہ کسانوں کو سی پی آر جاری نہیں کیے گئے تھے، کاشت کاروں کے مسائل کے حل کیلئے پنجاب کی دیگرملز کو وارننگ دیدی گئی ہے۔

  • پانی کے کنوئیں موت کا گڑھا بن گئے، تصاویر وائرل

    پانی کے کنوئیں موت کا گڑھا بن گئے، تصاویر وائرل

    الجزائر : مراکش میں پانچ سالہ بچے ریان کی افسوسناک موت کے بعد الجزائر میں سوشل میڈیا کے صارفین نے غیرآباد اور  پرخطر کنوؤں کوبند کرنے کے لیے سوشل میڈیا پرمہم شروع کی ہے جہاں بھی پرخطر کنواں ہو وہ اسے بند کرادے ہیش ٹیگ بن گیا۔

    سعودی ذرائع ابلاغ کے مطابق الجزائر میں کئی علاقوں میں جگہ جگہ کنویں کھلے ہوئے ہیں، مذکورہ کنوئیں کاشتکاروں نے پانی کے بحران سے نمٹنے کے لیے کھودے ہوئے ہیں جو موت کے گڑھے بن گئے۔

    متعلقہ اداروں کی جانب سے کنوؤں کے خطرات سے عوام کو بچانے کے لیے کوئی اص اقدامات نہیں کیا جارہے جس کی وجہ سے اکثر سانحات رونما ہورہے ہیں۔

    مراکشی بچے کے المیے کے تناظر میں الجزائر کے مشرقی صوبے المسیلہ کے حکام نے کاشتکاروں اور کنوؤں سے پانی نکالنے والوں کو ہدایت دی ہے کہ وہ کسی المیے سے بچنے کے لیے کنویں بند کردیں۔

    الجزائرمیں سوشل میڈیا صارفین نے مطالبہ کیا ہے کہ مراکش کے المیے سے بچنے کے لیے غیرمنظم کنوؤں کے خطرات کا سدباب کیا جائے خود الجزائر میں بھی تین برس قبل مراکش جیسا واقعہ پیش آچکا ہے۔

    متعددعرب ملکوں نےغیر محفوظ اورغیر منظم کنوؤں کے خطرات سے بچنے کے لیے کئی اقدامات کیے ہیں۔

    سعودی وزارت ماحولیات و پانی و زراعت اب تک 2450 غیر آباد کنویں بند کراچکی ہے۔ سعودی وزارت ماحولیات و پانی و زراعت نے اس حوالے سے ایک فون نمبر مختص کیا ہے جس پر مقامی شہری غیر آباد کنوؤں کے حوالے سے رپورٹ کرسکتے ہیں۔

    مزید پڑھیں : پانچ دن کا ریسکیو آپریشن مراکشی بچے کی دردناک موت کی خبر پر ختم (ویڈیوز)

    یاد رہے کہ مراکش میں ایک کنویں میں گزشتہ چار روز سے پھنسا ہوا ایک پانچ سالہ بچہ امدادی حکام کی کوششوں کے باوجود ہلاک ہوگیا ہے۔

    ریان نامی اس بچے کو کنویں سے نکالنے کی کوششوں پرسب کی توجہ مرکوز تھی اور سینکڑوں لوگ اس کنویں پر پہنچ گئے تھے اور ہزاروں لوگ انٹرنیٹ پر اس حوالے سے لمحہ بہ لمحہ خبریں پڑھ رہے تھے۔

  • بھارت میں کسانوں نے احتجاج کی نئی حکمت عملی طے کرلی

    بھارت میں کسانوں نے احتجاج کی نئی حکمت عملی طے کرلی

    نئی دہلی: بھارت میں زرعی قوانین کے خلاف 2 ماہ سے احتجاج کرتے کسانوں نے نئی حکمت عملی کا اعلان کردیا جس سے مودی سرکار پریشان دکھائی دے رہی ہے۔

    مقامی میڈیا کے مطابق 26 جنوری کو ٹریکٹر پریڈ کے دوران تشدد کا واقعہ پیش آنے کے بعد ایسا لگ رہا تھا کہ احتجاج ختم ہوجائے گا اور مظاہرین اپنے گھروں کو واپس چلے جائیں گے، لیکن راکیش ٹکیت اور درشن پال نامی کسان لیڈران عزم کے ساتھ دھرنے پر بیٹھے رہے، اور انہوں نے اب ایک بار پھر اپنی تحریک کو تیز کرنے کا اعلان کر دیا ہے۔

    تینوں زرعی قوانین کو منسوخ کرنے کا مطالبہ دہراتے ہوئے سنیوکت کسان مورچہ نے اعلان کیا ہے کہ 18 فروری کو دوپہر 12 بجے سے شام 4 بجے تک ریل روکو مہم چلائی جائے گی۔

    اس سلسلے میں سنیوکت کسان مورچہ کی اہم میٹنگ ہوئی جس میں متفقہ طور پر فیصلہ کیا گیا کہ کسان تحریک کو مزید تیز کیا جائے گا۔ اس فیصلے کے بعد مودی حکومت کی پریشانیاں بڑھتی ہوئی دکھائی دے رہی ہیں۔

    میٹنگ میں ریل روکو مہم چلانے کے علاوہ مزید فیصلے بھی کیے گئے ہیں۔

    ذرائع کے مطابق 12 فروری کو ریاست راجستھان کے تمام ٹول پلازہ کو ٹول فری کروایا جائے گا۔

    اس کے بعد 14 فروری کو پلوامہ حملے میں ہلاک جوانوں کو یاد کیا جائے گا، اس کے لیے ملک بھر میں موم بتی مارچ، مشعل جلوس اور دیگر پروگرامز کا انعقاد ہوگا۔

    بعد ازاں 16 فروری کو کسان رہنما سر چھوٹو رام کی پیدائش کے دن ملک بھر میں موجود کسان اتحاد کا مظاہرہ کریں گے۔

  • سعودی حکام کا کسانوں کے لیے اہم اقدام

    سعودی حکام کا کسانوں کے لیے اہم اقدام

    ریاض: سعودی حکام نے ملک بھر میں کسانوں کی مدد کے لیے اسمارٹ فون ایپ لانچ کردی، فون ایپ کسانوں اور ماہرین زراعت کے درمیان رابطے میں معاون ثابت ہوگی۔

    سعودی ویب سائٹ کے مطابق سعودی عرب کی وزارت ماحولیات، پانی اور زراعت نے کسانوں کے لیے اپنی ای خدمات متعارف کروا دی ہیں۔

    ان میں سے ایک زراعت گائیڈ نامی اسمارٹ فون ایپ بھی ہے جس کے ذریعے مختلف علاقوں میں کسانوں کو زراعت کے حوالے سے رہنمائی فراہم کی جاسکے گی۔

    اس ایپ کی تشکیل وزارت کی ان کوششوں کا حصہ ہے جس کے تحت وزارت کو ڈیجیٹلائز کیا جارہا ہے اور کارکردگی میں اضافہ کیا جارہا ہے۔

    وزارت میں جنرل ایڈمنسٹریشن کے ڈائریکٹر جنرل ڈاکٹر بندر بن محمد کا کہنا ہے کہ ایپ پر موصول ہونے والی 80 فیصد گزارشات زراعت کے بارے میں معلومات اور مشاورت سے متعلق ہیں جس کا کسان جلد جواب چاہتے ہیں۔

    ان کا کہنا ہے کہ ایپ کی بدولت کسان ملک بھر کے 300 ماہرین زراعت سے رابطہ کرسکتے ہیں۔

    مذکورہ ایپ کے ذریعے دونوں پارٹیز (کسان اور ماہرین) وائس کالز اور ویڈیو کالز کے ذریعے ایک دوسرے سے منسلک ہوسکتے ہیں جبکہ دستاویزات کا تبادلہ بھی کیا جاسکتا ہے۔

    ڈاکٹر بندر بن محمد کے مطابق وبا کے ان دنوں میں جب بالمشافہ ملاقات اور مشاورت ناممکن ہے، ایسے میں زراعت گائیڈ ایک اہم ضرورت بن چکی ہے۔

  • کسانوں کو جدید ٹیکنالوجی اور مالی تعاون کیلئے اقدامات کرینگے، وزیراعظم عمران خان

    کسانوں کو جدید ٹیکنالوجی اور مالی تعاون کیلئے اقدامات کرینگے، وزیراعظم عمران خان

    لاہور : وزیراعظم عمران خان نے کہا ہے کہ زرعی شعبے کی ترقی کیلئے کسانوں کو جدید ٹیکنالوجی کی فراہمی اور ان مالی معاونت کیلئے اقدامات کریں گے۔

    یہ بات انہوں نے لاہور کے دورے کے موقع پر اجلاس سے خطاب کرتے ہوئے کیا۔ لاہور میں وزیراعظم عمران خان کی زیرصدارت زراعت سے متعلق اجلاس ہوا، اس موقع پر وزیراعظم کو گندم، چاول اور گنے کی فصلوں کی موجودہ صورتحال پر بریفنگ دی گئی۔

    وزیر اعظم کو دی جانے والی بریفنگ میں بتایا گیا کہ زرعی شعبہ گزشتہ کئی دہائیوں سے جمود کا شکار ہے جس کی وجہ یہ ہے کہ ماضی میں زرعی پیداوار میں اضافے اور ٹیکنالوجی سے استفادے پر کم توجہ دی گئی۔

    اجلاس سے خطاب کرتے ہوئے وزیراعظم عمران خان نے کہا کہ زرعی شعبے میں تحقیق کو یکسر نظرانداز کیا گیا، زرعی شعبے کی ترقی پی ٹی آئی حکومت کا اہم ترین ایجنڈہ ہے، زرعی شعبے کے زوال کو قلیل مدتی اقدامات سے بہتری میں تبدیل کیا جاسکتا ہے۔

    وزیراعظم کا مزید کہنا تھا کہ طویل المدتی اقدامات پر فوری طور پر کام کرنے کی اشد ضرورت ہے، اس کے علاوہ کسانوں کو جدید ٹیکنالوجی اور مالی معاونت کی فراہمی بھی ضروری ہے۔

    عمران خان نے کہا کہ پاکستان زرعی شعبے میں چین کے تجربات سے استفادہ کرسکتا ہے، زرعی شعبے میں تعاون کا فروغ میرے دورہ چین کا اہم ترین ایجنڈا ہوگا۔

  • بھارت: حکومتی عدم توجہ، 2 ماہ میں 69 کسانوں کی خود کشی

    بھارت: حکومتی عدم توجہ، 2 ماہ میں 69 کسانوں کی خود کشی

    نئی دہلی: بھارتی وزیر برائے زراعت این ایچ شیوا سنگر ریڈی نے اعتراف کیا ہے کہ دو ماہ کے دوران 69 سے زائد کسانوں نے خودکشی کر کے اپنی زندگیوں کا خاتمہ کیا۔

    بھارتی میڈیا سے جمعرات کے روز بات کرتے ہوئے بھارتی وزیر کا کہنا تھا کہ رواں مالی سال 2019-2018 کے دوران کسانوں نے حکومتی عدم توجہ اور ناقص پالیسوں سے تنگ آکر خود سوزی کی۔

    اُن کا کہنا تھا کہ حکومتی سطح پر تمام ضلعوں میں تحقیقات کے لیے کمیٹیاں تشکیل دے دی گئی ہیں جو کسانوں کے مسائل کو  بغور سنے گی جبکہ متاثرہ خاندانوں کی کفالت کے حوالے سے بھی حکومت کوئی پالیسی متعارف کرائے گی۔

    بھارتی وزیر کا کہنا تھاکہ 49 کسانوں نے گزشتہ ماہ قرضوں کی وجہ سے خوکشی کی جبکہ 20 کسانوں کی موت کی وجوہات جاننے کے لیے کمیٹی کام کررہی ہے۔

    مزید پڑھیں: بھارت میں کیڑے مار اسپرے کرنے والے 20 کسان ہلاک

    ریڈی کا کہنا تھا کہ محکمہ زراعت نے اب تک جو تحقیقات کیں اُس میں یہ بات سامنے آئی کہ دھرواد سے تعلق رکھنے والے 19 کسانوں نے حکومتی پالیسی کی وجہ سے اپنی جانوں کا خاتمہ کیا جبکہ دیگر ضلعوں میں بھی گزشتہ دو ماہ کے دوران خود کشی کے رجحان میں نمایاں حد تک اضافہ ہوا جو تشویشناک ہے۔

    وزیرزراعت کا کہنا تھا کہ وزیر اعلیٰ کی جانب سے آئندہ مالی سال کے بجٹ میں کسانوں کے قرضے معاف کرنے کی تجاویز پیش کی گئی ہیں تاکہ بحران پر قابو پایا جاسکے اور کسانوں کو بھی بہتر سہولت دی جائے۔

    این ایچ شیوا سنگر کا مزید کہنا تھا کہ حکومت کسانوں کو ٹرانسپورٹ اور اسٹوریج کی سہولت فراہم کرنے کے حوالے سے جلد سہولیات دینے کا ارادہ رکھتی ہے تاکہ وہ اپنے مال کو اچھے داموں مارکیٹ میں فروخت کرسکیں۔

    واضح رہے کہ بھارت میں تقریباََ 26 کروڑ افراد زراعت کے پیشے سے وابستہ ہیں جبکہ گزشتہ سال مہاراشٹرا میں 1 ہزار سے زائد کسانوں نے غربت سے تنگ آکر خودکشی کرلی تھی۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ہائی کورٹ کا شوگرکین کمشنر کو کاشت کاروں کی ادائیگی یقینی بنانے کا حکم

    ہائی کورٹ کا شوگرکین کمشنر کو کاشت کاروں کی ادائیگی یقینی بنانے کا حکم

    لاہور: عدالتِ عالیہ نے شوگر کین کمشنر کو حکم دیا ہے کہ حکومت کے مقررکردہ ریٹ کے مطابق کاشت کاروں کو ادائیگی کرنے کو یقینی بنایا جائے اورادائیگی نہ کرنے والی شوگرملزکے خلاف کارروائی کا حکم بھی صادرکردیا۔

    تفصیلات کے مطابق لاہور ہائی کورٹ کی جسٹس عائشہ اے ملک نے کاشتکاروں کی  103 ایک ہی نوعیت کی درخواستوں پر فیصلہ سنایا جن  میں حکومت پنجاب، کین کمشنر اورملزمالکان کو فریق بنایا گیا ہے. درخواستوں میں نشاندہی کی گئی ہے کہ شوگر ملز انتظامیہ کو گنا فروخت کیا لیکن معاوضہ نہیں دیا گیا ۔

    درخواست گزاروں کا کہنا تھا کہ شریف خاندان کی برادرز شوگر ملز، پتوکی شوگر ملز اوردریا خان شوگر ملزسمیت دیگر کئی شوگر ملز  نے ادائیگی  نہیں کی۔ شوگر ملزمالکان کی جانب سے ادائیگی نہ ہونی کی وجہ سے کاشت کار مالی مشکلات کا شکار ہو رہے اور نئی فصل کاشت کرنے کے قابل نہیں ہے۔

    کاشتکاروں نے اپنی ادائیگیوں کے لیے متعلقہ حکام سے بھی رابطہ کیا لیکن کوئی شنوائی نہیں ہوئی۔ درخواستوں میں استدعا کی گئی کہ  شوگر ملز مالکان کو معاوضے کی ادائیگی کا حکم دیا جائے۔

    عدالت نے غریب کسانوں کی عرضیوں پر فیصلہ صاد ر کر تے ہوئے حکم دیا کہ کسانوں کو سرکاری ریٹ کے مطابق ادائیگی کو یقینی بنایا جائے اور جو مل ادائیگی نہ کرے اس کے خلاف کارروائی کی جائے ۔ عدالت نے ملوں سے قرضوں کی واپسی کے لیے بنکوں کی درخواستیں مسترد کرتے ہوئے حکم دیا کہ جو رقوم ملوں نے ہائی کورٹ کے رجسٹرار آفس میں جمع کروائی گئی ہیں وہ کسانوں میں تقسیم کی جائیں۔

    شریف فیملی کی شوگر ملزکھولنے سے روک دیا

     یاد رہے کہ رواں سال  جنوری میں چیف جسٹس نے کسانوں کو درپیش مسائل کے باعث کیس روزانہ کی بنیاد پر سننے کا فیصلہ کرتے ہوئے کہا  تھا کہ کم ازکم اس سیزن کسانوں کانقصان نہیں ہونےدیں گے اور شوگرملزکی بندش سے کیس میں کسانوں کی فریق بننےکی درخواستیں منظور کرلیں تھی۔  کسانوں کے اعتراض پر چیف جسٹس نے ٹوک دیا تھا اور کہا آپ کسی اور کے آلہ کار بنیں گےتو معاملہ خراب ہوجائے گا، کسانوں کو بھی ریلیف دیا گیا، شوگر ملزکوغیر قانونی کام سے بھی روک دیا گیا ہے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • ملک میں پہلی بارکسانوں کو فصل کےعوض قرضہ کی فراہمی

    ملک میں پہلی بارکسانوں کو فصل کےعوض قرضہ کی فراہمی

    شیخوپورہ : سیکورٹیز اینڈ ایکس چینج کمیشن (ایس ای سی پی) کی کاوشوں کی نتیجے میں ملک میں پہلی بار ایک نجی بینک کی جانب سے کسانوں کووئیر ہاؤس میں محفوظ رکھی گئی فصل کے عوض قرض کی فراہمی شروع کر دی گئی ہے۔

    تفصیلات کے مطابق پاکستان ایگریکلچرل کولیشن کے تعاون سے حبیب بینک (ایچ بی ایل) کی جانب سے ضلع شیخوپورہ میں مرید کے کے دوکسانوں کو ایجیلٹی پاکستان کے گوداموں میں رکھی گئی 185 ٹن گندم کے عوض 37 لاکھ روپے قرضہ فراہم کیا گیا۔

    ایس جی ایس پاکستان نے گودام میں رکھی گئی اس گندم کے لیے معیاری سرٹیفکیٹ جاری کیا جبکہ پاکستان مرکنٹائل ایکس چینج میں حبیب بینک کے نام پرمال ضمانت کے طور پر رکھے ہیں۔

    ایم ایم فلورملزکے چیئرمین محمود مولوی نے گندم کے اس اسٹاک کو خریدنے کی ہامی بھری ہے، پاکستان ایگری کلچرل کولیشن کے چیف ایگزیکٹو عارف ندیم کا کہنا ہے کہ کسانوں کی محفوظ گوداموں میں محفوظ اجناس کی رسیدوں کے عوض قرض کی فراہمی ایک نئے دور کا آغاز ہے۔

    انہوں نے کہا کہ اس بزنس ماڈل کی ابتدا سے کسانوں کوحاصل مالی وسائل تک رسائی میں اضافہ ہو گا اور کسانوں کو براہ راست مارکیٹ تک رسائی بھی ممکن ہو گی اور کسان اپنی اجناس کو اچھی قیمت تک محفوظ رکھ سکیں گے اور اجناس کی قیمتوں کو استحکام ملے گا۔

    عارف ندیم نے کہا کہ پاکستان میں اس نئے دور کا آغاز ایس ای سی پی کی جانب سے کولیٹرل مینجمنٹ ریگولیشن 2017 جاری کرنے کے نتیجے میں ممکن ہوا.