کراچی : ایم کیو ایم کے سربراہ ڈاکٹر فاروق ستار نے کہا ہے کہ رابطہ کمیٹی کے جو جو لوگ میرے گھر پر آئے ہیں وہ میرے بھائی ہیں اور سب بھائیوں کو مل کر کوئی فیصلہ کرنا ہے، آج کوئی بات رہ گئی ہے تو کل اجلاس بلا کر پوری کرلیں گے۔
یہ بات انہوں نے پی آئی بی کالونی میں اپنی رہائش گاہ پر میڈیا سے گفتگو کرتے ہوئے کہی، ان کا کہنا تھا کہ ہمارے درمیان کچھ معاملات طے پا گئے ہیں اور جو معاملات رہتے ہیں ان پر کل دوپہر میں بیٹھ کر بات کریں گے، کیوں یہ بھائیوں کا معاملہ ہے اور بھائیوں کے درمیان ہی حل ہوگا۔
ان کا کہنا تھا کہ مجھے اراکین کی بات سننی چاہیےاور مجھے سمجھانی چاہیے، ہم کسی کو ہنسنے کا موقع نہیں دیں گے، کسی صورت یہ تاثرنہیں دینا کہ ہم میں تقسیم ہے، اختلاف رائے کی وجہ سے کسی اورکو خوش ہونے کا موقع نہیں دینا چاہتے، ہمارے اختلاف رائے کو تقسیم نہ سمجھیں۔
ان کا مزید کہنا تھا کہ سینیٹ الیکشن بھاگے نہیں جارہے اور سینیٹ الیکشن کا مسئلہ بھی نہیں ہے، لیکن یہ مسئلہ سینیٹ الیکشن سے بھی زیادہ گھمبیر ہے۔
انہوں نے کہا کہ میرے لئے پی آئی بی اور بہادر آباد میں فرق نہیں، دلوں میں گنجائش ہے، اختلاف رائے کے باوجود رابطہ کمیٹی اراکین میرے لئےیہاں آئے، موجودہ صورتحال کو سمٹینے میں کارکنان کا تعاون درکار ہے۔
مزید پڑھیں:فاروق ستار او رابطہ کمیٹی کے مذاکرات کامیاب ہوگئے
لڑائی یا تقسیم نہیں ،اختلاف رائے ہوسکتا ہے، اسے ہمیں حل کرنا ہے، آج کوئی بات رہ گئی ہے تو کل اجلاس بلا کر پوری کرلیں گے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پرشیئر کریں۔
