ARYNews.tv | Urdu – Har Lamha Bakhabar

Tag: farooq sattar

  • دھرنا دیا تو یوٹرن پالیسی نہیں ہوگی، فاروق ستار

    دھرنا دیا تو یوٹرن پالیسی نہیں ہوگی، فاروق ستار

    کراچی: متحدہ قومی موومنٹ پاکستان کے سربراہ ڈاکٹر فاروق ستار نے کہا ہے کہ ایم کیو ایم کے خلاف سازشوں کو بند ہونا چائیے ایم کیو ایم اور پاکستان کی سالمیت ایک دوسرے سے وابستہ ہیں۔

    کراچی کے علاقے اورنگی ٹاؤن میں ایم کیو ایم کے تحت خواتین کا جنرل ورکز اجلاس میں ڈاکٹر فاروق ستار نے خطاب کرتے ہوئے کہا کہ ایم کیو ایم بہت جلد حکومت سندھ کی کرپشن کو بے نقاب کرنے کیلئے وائٹ پیپر جاری کرے گی۔

     فاروق ستار کا کہنا تھا کہ ایم کیوایم کے خلاف سازشوں کو بند ہونا چائیے،اپنے حقوق کے لیے تاریخی دھرنا دے سکتے ہیں اور اگر دھرنا دینے پر آگئے تو یو ٹرن پالیسی نہیں ہو گی۔ دھرنے کا شور اور باتیں کرنے والے لیڈران ڈیڑھ سو لوگ بھی جمع نہیں کرسکے۔

    پڑھیں:  جس دن صوبے کا سوچا بنا لیں گے، فاروق ستار

     تحریک انصاف پر تنقید کرتے ہوئے فاروق ستار کا کہنا تھا کہ اگر ایم کیو ایم نے جلسہ کیا تو لوگ پریڈ گراؤنڈ کا جلسہ بھول جائیں گے۔ انہوں نے مخالفین کو مخاطب کرتے ہوئے کہا کہ جلد چھوڑ کر جانے والے واپس آجائیں گے ۔

    فاروق ستار نے دعویٰ کیا کہ متحدہ پاکستان چھوڑنے والے رکن قومی اسمبلی آصف حسنین جلد ہمارے ساتھ ہوں گے اور دیگر ناراض لوگ بھی ہمارے پاس آجائیں گے، ایک سال میں پھر انقلاب لاکر دکھائیں گے۔

    مزید پڑھیں: ایم کیو ایم کا سابق یونٹ انچارج گرفتار، 12 مئی اور متعدد وارداتوں کا اعتراف

     اس موقع پر اپوزیشن لیڈر سندھ اسمبلی خواجہ اظہار الحسن نے خطاب کرتے ہوئے حکومت سندھ پر شدید تنقید کی اور کہا کہ آئندہ انتخابات میں پیپلز پارٹی کو اپوزیشن میں بیٹھنے مجبور کردیں گے۔

    خواجہ اظہار کا کہنا تھا کہ 22 اگست کے بعد لوگ ایم کیو ایم کو کمزور سمجھ رہے تھے مگر آج ہم پہلے سے زیادہ مضبوط اور نکھر چکے ہیں کیونکہ ہمارے اندر صفائی کا عمل مکمل ہوچکا ہے۔

    اپوزیشن لیڈر نے کہا کہ پاناما لیکس پر متحدہ کا مؤقف واضح ہے، اس معاملے میں سپریم کورٹ پر کسی بھی جماعت کا دباؤ قبول نہیں کریں گے کیونکہ پوری قوم کی نظریں انصاف کے فیصلے کی منتظر ہیں۔

  • جس دن صوبے کا سوچا بنا لیں گے، فاروق ستار

    جس دن صوبے کا سوچا بنا لیں گے، فاروق ستار

    کراچی: ایم کیو ایم پاکستان کے سربراہ ڈاکٹر فاروق ستار نے کہا ہے کہ ابھی ہم نے سوچنا شروع کیا ہے کہ ہمارا صوبہ کیوں نہیں جس دن اس کے قیام کی تحریک شروع کی تو صوبہ بنا کر دم لیں گے۔

    لیاقت آباد میں ایم کیو ایم کے تحت منعقد ہونے والے جنرل ورکرز اجلاس سے خطاب کرتے ہوئے ڈاکٹر فاروق ستار نے کہا کہ ابھی صرف ہم نے سوچنا شروع کیا کہ سب کا صوبہ ہے تو ہمارا کیوں نہیں جبکہ ہم نے ابھی صوبہ بنانے کے لیے کوئی باضابطہ اعلان نہیں کیا۔ جس دن صوبہ کا سوچیں گےتو جیسے پاکستان بنایا ویسے صوبہ بھی بنا لیں گے۔

    پڑھیں : فاروق ستار کا 25 دسمبر کو مزار قائد پر جلسے کا اعلان

     سربراہ ایم کیو ایم پاکستان نے کہا کہ کراچی کی آبادی کا اصل شمار ظاہر کیا جائے تو ہمارے حصے میں 80 نشستیں آئیں گی ۔ انہوں نے کہا کہ ہمیں اپنے مستقبل کا فیصلہ خود کرنا ہے اور کسی کا آلہ کار نہیں بھی نہیں بننا۔

    ڈاکٹر فاروق ستار نے کہا کہ کراچی کے حقوق کے لیے خیرات نہیں چاہیے ہم اپنا حق سر اٹھا کر حاصل کرنا چاہتے ہیں، اگر متحدہ پاکستان کمر کس لے تو اگلا وزیر اعلیٰ کراچی کا ہوگا۔ تحریک انصاف کے اسلام آباد دھرنے پر تنقید کرتے ہوئے ایم کیو ایم کے سربراہ نے کہا کہ ’’ہم ایسا عظیم الشان دھرنا دیں گے جو تاریخ میں یاد رکھا جائے گا‘‘۔

    انہوں نے اعلان کیا کہ ہم اپنے حقوق اور اختیارات کے لیے ارباب اختیار اور ریاستی اداروں کے دروازے پر دستک دیں گے ، اگر ہماری شنوائی نہیں ہوئی تو پھر جلد اہم فیصلہ کریں گے۔

  • فاروق ستار کا 25 دسمبر کو مزار قائد پر جلسے کا اعلان

    فاروق ستار کا 25 دسمبر کو مزار قائد پر جلسے کا اعلان

    کراچی: ایم کیو ایم پاکستان کے سربراہ ڈاکٹر فاروق ستار نے کہا ہے کہ متحدہ پاکستان کے تحت 25 دسمبر کو مزار قائد کے سامنے بڑا جلسہ ہوگا جو ماضی کے تمام ریکارڈ توڑ دے گا۔

    بلدیہ ٹاؤن میں جنرل ورکرز اجلاس سے خطاب کرتے ہوئے ڈاکٹر فاروق ستار نے کہا کہ ایم کیو ایم پاکستان 23 اگست کی پالیسی پر عمل پیرا ہے، اب ہم پیچھے مڑ کر نہیں دیکھیں گے اور کراچی کو اس کی کھوئی ہوئی عظمت لوٹائیں گے۔

    ڈاکٹر فاروق ستار نے کہا کہ اگر مردم شماری کی گئی تو کراچی کو 35 نشتیں دینی پڑ جائیں گے، انہوں نے امید کا اظہار کرتے ہوئے کہا کہ آئندہ سندھ کا وزیر اعلیٰ کراچی اور متحدہ قومی موومنٹ کا ہوگا۔

    پڑھیں:  عوامی رابطہ اورسو دن کی خدمتی مہم کا آغاز کریں گے،فاروق ستار

     سربراہ ایم کیو ایم کا کہنا تھا کہ ہم خواتین کے تاریخی جلسہ کا ریکارڈ توڑنے کی پوزیشن میں آگئے ہیں، عوامی رابطے میں لوگوں کی دلچسپی دیکھ کر اندازہ ہوا کہ 2016 کے غروب ہوتے ہی کئی لوگوں کی سیاست بھی بیٹھ جائے گی۔

    قبل ازیں ڈپٹی کنونیر عامر خان نے کارکنان سے خطاب کرتے ہوئے کہا کہ ’’کراچی میں ہماری شناخت بھتہ خور اور ٹارگٹ کلر کے نام سے ہوتی تھی تاہم اب ہمیں اپنے اوپر لگے ہوئے الزامات مٹانے کے لیے عوام کی خدمت کرنی ہے‘‘۔

    اپوزیشن لیڈر خواجہ اظہار الحسن نے جنرل ورکرز اجلاس سے خطاب کرتے ہوئے کہا کہ ’’22 اگست کے بعد کئی لوگوں نے اس شہر کو مالِ عنیمت سمجھ کر لوٹنے کی کوشش کی، حکمراں جماعت نے تمام تر سرکاری وسائل ریلی نکالی مگر وہ بھی ناکام رہے‘‘۔

  • نظم و ضبط کی خلاف ورزی، متحدہ پاکستان کے کئی اراکین کی بنیادی رکنیت ختم

    نظم و ضبط کی خلاف ورزی، متحدہ پاکستان کے کئی اراکین کی بنیادی رکنیت ختم

    کراچی: متحدہ قومی موومنٹ پاکستان کی رابطہ کمیٹی نے تنظیمی نظم وضبط کی سنگین خلاف ورزی پرایم کیوایم سندھ تنظیمی کمیٹی کے ارکان ظفر راجپوت، رشیدبھیا،فوزیہ عامر اور رضوانہ اسلم کوفوری طورپرتنظیم کی بنیادی رکنیت سے خارج کردیاہے۔

    تفصیلات کے مطابق ایم کیو ایم پاکستان کی رابطہ کمیٹی کا اجلاس منعقد کیا گیا جس میں ایم کیو ایم حیدرآباد ڈسٹرکٹ کمیٹی کے اراکین عابد غوری، جاوید خان، ذوالفقار علی خانزادہ، فہیم بیگ مغل، فاروق خان، فہیم راحیل اور سعد عزیز کو تنظیمی نظم و ضبط کی سنگین خلاف ورزی کرنے پر بنیادی رکنیت سے خارج کردیا گیا۔

    علاوہ ازیں ایم کیو ایم پاکستان نے تنظیمی نظم و ضبط کی سنگین خلاف ورزی کرنے پر سندھ تنظیمی کمیٹی کے ارکان ظفر راجپوت، رشید بھیا، فوزیہ عامر اور رضوانہ اسلم کی بھی فوری طور پر تنظیمی رکنیت ختم کرنے کا اعلان کیا ہے۔

    پڑھیں:  متحدہ لندن کے خلاف کریک ڈائون جاری، چوتھے رہنما ظفر راجپوت بھی گرفتار

    رابطہ کمیٹی پاکستان نے تمام ذمہ داران اور کارکنان کو ہدایت کی ہے کہ وہ تنظیمی نظم و ضبط کی خلاف ورزی سے باز رہیں اور اس پر سختی سے عمل پیرا رہیں، کارکنان کو ہدایت کی گئی ہے کہ وہ مذکورہ افراد سے کسی بھی قسم کا تنظیمی رابطہ ہرگز نہ رکھیں۔

    مزید پڑھیں: متحدہ رہنما امجد اللہ پریس کلب سے باہر نکل آئے، رینجرز نے گرفتار کرلیا

    قبل ازیں قانون نافذ کرنے والے اداروں نے حیدرآباد میں کارروائی کرتے ہوئے ایم کیو ایم لندن کی جانب سے نامزد کردہ ایڈہاک ممبر ظفر راجپوت کو گرفتار کر کے تفتیش کے لیے نامعلوم مقام پر منتقل کردیا ہے جبکہ کچھ دیر قبل پریس کلب میں محصور امجد اللہ خان کو بھی کلب سے باہر آتے ہی رینجرز اہلکاروں نے گرفتار کر کے نامعلوم مقام پر منتقل کردیا ہے۔

  • اگر متحدہ بانی کو واپس لایا گیا تو میں کام نہیں کروں گا، فاروق ستار

    اگر متحدہ بانی کو واپس لایا گیا تو میں کام نہیں کروں گا، فاروق ستار

    کراچی: سربراہ ایم کیو ایم پاکستان نے کہا ہے کہ بانی ایم کیو ایم نے 22 اگست کو اپنی پارٹی پر خودکش حملہ کیا اور اپنا پاؤں خود کلہاڑی پر مارا تاہم میں نے قوم اور کارکنان کو بچانے کے لیے 23 اگست کو علیحدگی کا فیصلہ کیا۔

    ان خیالات کا اظہار انہوں نے نجی ٹی وی کو انٹرویو دیتے ہوئے کیا۔ ڈاکٹر فاروق ستار کا کہنا تھا کہ ’’اگر بانی ایم کیو ایم کو متحدہ میں دوبارہ لایا گیا تو میں اُس پارٹی میں مزید کام نہیں کروں گا‘‘۔ انہوں نے کہا کہ پاک سرزمین پارٹی نے بندوق پھینک دو اور قلم تھامو کی پالیسی قابل ستائش ہے جس پر انہیں سراہا جانا چاہیے‘‘۔

    پڑھیں:   وقت آنے پراسمبلیوں سے مستعفی ہوسکتے ہیں، ڈاکٹر فاروق ستار

     کنوینر ایم کیو ایم پاکستان نے کہا کہ عزیز آباد سے برآمد ہونے والے اسلحے سے لاعلم اور لاتعلق ہیں تاہم اس معاملے کو منطقی انجام تک پہنچانا ہوگا اور حقائق کو عوام کے سامنے بیان لانے ہوں گے۔ ڈاکٹر فاروق ستار نے کہا کہ عظیم احمد طارق، ڈاکٹر عمران فاروق سمیت 12 مئی کے مقدمات کی تحقیقات ہونی چاہیے تاہم میئر کراچی وسیم اختر کو شہر کی ابتر صورتحال بہتر کرنے کے لیے رہا کیا جانا چاہیے۔

    مزید پڑھیں:  ایم کیو ایم پاکستان کا اجلاس، فاروق ستار کنوینر مقرر

    سربراہ ایم کیو ایم نے کہا کہ ’’ایم کیو ایم کے کچھ لوگوں سے بھارتی خفیہ ایجنسی سے تعلقات ہوں اور را نے کراچی میں کام کیا ہو، تاہم محض چند لوگوں کی وجہ سے پوری قوم کو نشانہ بنانا زیادتی ہے، تاہم ایم کیو ایم پاکستان اب مکمل چھان بین کے بعد ہی لوگوں کو پارٹی میں شامل کررہی ہے‘‘۔

    یہ بھی پڑھیں: ڈاکٹرفاروق ستارکے ساتھ کام نہیں کرسکتا،امجد اللہ خان

     فاروق ستار نے پاک سرزمین پارٹی پر تبصرہ کرتے ہوئے کہا کہ ’’انیس قائم خانی اور مصطفیٰ کمال پارٹی سے مایوس ہوکر گئے تھے تاہم میں نے آج تک انہیں غلط نہیں کہا مگر اُن کے طریقہ کار پر اختلاف ہے‘‘۔

     

  • فاروق ستار اراکین اسمبلی کو مستعفیٰ نہ ہونے کا مشورہ دے رہے ہیں، ندیم نصرت

    فاروق ستار اراکین اسمبلی کو مستعفیٰ نہ ہونے کا مشورہ دے رہے ہیں، ندیم نصرت

    لندن: متحدہ قومی موومنٹ کے کنوینرندیم نصرت نے کہاہے کہ اگست  2015ء میں قائد تحریک نے اپنی ذاتی خواہش پر نہیں بلکہ ایم کیو ایم کے خلاف جاری آپریشن پر حق پرست اراکین سینیٹ، قومی اور صوبائی اسمبلی کو بطور احتجاج استعفے دینے کی ہدایت کی تھی۔

    لندن سے جاری کردہ اعلامیے میں کنوینر ندیم نصرت نے کہا کہ ’’کراچی آپریشن آج بھی پوری شدت کے ساتھ جاری ہے اورایم کیو ایم کے کارکنان کی گرفتاریاں، چھاپے، وفادریاں تبدیل کروانے کے ساتھ ساتھ مسلسل میڈیا ٹرائل کیا جارہا ہے تاہم ڈاکٹر فاروق ستار حق پرست اراکین اسمبلی کو مستعفیٰ نہ ہونے کا مشورہ دے رہے ہیں‘‘۔

    ندیم نصرت نے کہاکہ ڈاکٹر فاروق ستار آج خود کو مہاجرں کے حقوق کاسب سے بڑا علم بردار قرار دے رہے ہیں جبکہ وہ خود بھی جانتے ہیں کہ مہاجر نظریے کے خالق بانی و قائد تحریک  ہیں جنہوں نے اپنی پوری زندگی اس نظریے اور مہاجروں کے حقوق کے لیے وقف کرتے ہوئے  اپنے بڑے بھائی اوربھتیجے کی قربانی بھی دی ہے۔

    پڑھیں: وقت آنے پراسمبلیوں سے مستعفی ہوسکتے ہیں، ڈاکٹر فاروق ستار

     انہوں نے مزید کہا کہ’’ مہاجروں کے قائد صرف قائد تحریک ہیں اور یہ حقیقت ہے، جس نہ تو ڈاکٹر فاروق ستار بدل سکتے ہیں اور نہ ہی اسٹیبلشمنٹ بدل سکتی ہے‘‘۔
    ندیم نصرت نے کہاکہ حق اورسچائی کاتقاضہ ہے کہ جن لوگوں کو عوام نے قائدتحریک  کے کہنے پر اپنا مینڈیٹ دیا وہ اپنی نشستوں سے فوری مستعفی ہوکردوبارہ عوام میں جائیں تاکہ انہیں بھی اندازہ ہوجائے کہ عوام کل کی طرح آج بھی کس کے ساتھ ہیں۔

    یاد رہے کہ دو روز قبل بانی ایم کیو ایم کا ایک ویڈیو پیغام سامنے آیا تھا جس میں انہوں نے اراکین اسمبلی سے مستعفیٰ ہونے کا مطالبہ کیا تھا، انہوں نے مزید کہا تھا کہ جو رکن اسمبلی استعفیٰ نہیں دے گا اُس سے حلقے کے عوام خود مستعفیٰ ہونے کا مطالبہ کریں گے۔

  • بیرون ملک سے آنے والی کسی کال کا جواب نہ دیں، فاروق ستار کی ہدایت

    بیرون ملک سے آنے والی کسی کال کا جواب نہ دیں، فاروق ستار کی ہدایت

    کراچی: ڈاکٹر فاروق ستار نے ایم کیو ایم پاکستان کے تمام ذمہ داران و کارکنان کو ہدایت کی ہے کہ وہ بیرون ملک سے آنے والی کسی کال کا جواب نہ دیں۔

    تفصیلات کے مطابق ڈاکٹر فاروق ستار کی زیر صدارت پی آئی بی میں واقع ایم کیو ایم پاکستان کے عارضی مرکز گھانچی ہال پر اجلاس منعقد کیا گیا، جس میں ڈاکٹر خالد مقبول صدیقی، عامر خان سمیت دیگر اہم اراکین رابطہ کمیٹی و اسمبلی ممبران نے شرکت کی۔

    اجلاس میں موجودہ سیاسی صورتحال پر تفصیلی تبادلہ خیال کیا گیا اور مستقبل میں سیاسی جدوجہد کو جاری رکھنے کے حوالے سے اہم امور زیر غور آئے تاہم بانی ایم کیو ایم کے آڈیو پیغام پر تفصیلی گفتگو کی گئی۔ اس موقع پر اراکین پارلیمنٹ و رابطہ کمیٹی کے ممبران نے ڈاکٹر فاروق ستار کی قیادت پر اعتماد کا اظہار کرتے ہوئے اُن کے ساتھ اپنے سفر کو جاری رکھنے کا اعلان کیا۔

    پڑھیں:  تمام شعبہ جات ہماری بات مانیں گے، فاروق ستار

     ڈاکٹر فاروق ستار نے اجلاس سے خطاب کرتے ہوئے کہا کہ ’’ہمیں پاکستان زندہ باد کہنے کا مینڈیٹ دیا گیاہے، 23 اگست کے بعد صورتحال کافی تبدیل ہوگئی ہے اور اب ملک کے خلاف بات کرنے والوں کو کسی صورت برداشت نہیں کیا جائے گا‘‘

    انہوں نے تمام ممبران کو ہدایت کی کہ وہ بیرون ملک سے آنے والی کسی کال کا جواب نہ دیں اور اپنی جدوجہد کو اسی طرح جاری رکھیں، ہم وطن کی خدمت کا عزم لے کر ایک بار پھر میدان میں اترے ہیں تاہم کسی کارکن یا ذمہ دار کو بیرون ملک سے آنے والی کالز سے کسی قسم کا خوف نہیں ہونا چاہیے‘‘۔

    مزید پڑھیں: لندن کے بیان سے کوئی تعلق نہیں، ایم کیو ایم پاکستان

    سربراہ ایم کیو ایم پاکستان نے خاص طورپر مختلف شعبہ جات کے ذمہ داران اور اراکین پارلیمنٹ کو ہدایت کی کہ بیرون ملک سے آنے والی کسی کال کا جواب نہ دیں کیونکہ اس طرح کی تمام کالز میں سیاسی جدوجہد سے علیحدہ ہونے یا اسمبلی سے مستعفیٰ ہونے پر دباؤ ڈالا جاتا ہے‘‘۔

  • تمام شعبہ جات ہماری بات مانیں گے، فاروق ستار

    تمام شعبہ جات ہماری بات مانیں گے، فاروق ستار

    کراچی: ایم کیو ایم لندن اور پاکستان قیادت کے درمیان ایک دوسرے کے خلاف بیان بازی کا عمل جاری ہے،فاروق ستار نے کہا ہے کہ کارکنان ہماری بات ماننے ہم لندن قیادت سے قطع تعلق کرچکے ہیں۔

    لندن سے جاری ہونے والے بیان کے بعد ایم کیو ایم پاکستان کے سربراہ فاروق ستار نے کہا ہے کہ تمام شعبہ جات ہماری بات مانیں، ہم 23 اگست والی بات پر ڈٹے ہوئے ہیں، لندن والے جو بھی بات کرتے ہیں وہ ان کی مرضی ہے، ہمارا لندن سے تعلق نہیں، ان کی مرضی ہے جو دل چاہے بیان دیں۔

    انہوں‌ نے کہا کہ ہم نے پہلے ہی ایم کیو ایم لندن سے قطع تعلق کردیا ہے،جو پالیسی ہم نے طے کی ہے اس کے مطابق ہی کام کریں گے، ہماری پر امن سیاسی جدوجہد جاری رہے گی۔

    ان کا کہنا تھا کہ ایم کیوایم پاکستان پیچھے دیکھنے کے بجائے کام جاری رکھے گی، ہم نے اجتماعیت کو سامنے رکھتے ہوئے فیصلہ کیا، ہم نے ازخود فیصلہ کیا اس کی مقصدیت کسی سے ڈھکی چھپی نہیں۔

    فاروق ستار نے کہا کہ نہ کوئی استعفا دے گا نہ ممبر شپ سے مستعفی ہوں گے، جو بیان لندن سے آیا اس پر تحریری بیان جاری کیا ہے، تمام ارکین اور عہدیدار اسی طرح کام کو جاری رکھیں گے۔

    کچھ دیر قبل ایم کیو ایم کی لندن قیادت نے کہا ہے کہ قائد ایم کیو ایم کے خلاف سندھ اسمبلی میں قرارداد پاس کرنے کا عمل شرم ناک ہے جس پر ایم کیو ایم کے تمام ارکان اسمبلی مستعفی ہوجائیں، فوری طور پر تمام تنظیمی ڈھانچہ اور شعبہ تحلیل کردیے گئے ہیں۔

  • لندن سے دو رہنماؤں کی وطن واپسی، فاروق ستار کی قیادت پر اعتماد

    لندن سے دو رہنماؤں کی وطن واپسی، فاروق ستار کی قیادت پر اعتماد

    کراچی: ایم کیو ایم کے لندن میں مقیم دو رہنماؤں کہف الوریٰ اور شبیر قائم خانی کی وطن واپسی پر سربراہ ایم کیو ایم ڈاکٹر فاروق ستار سے ملاقات قیادت سنبھالنے پر اعتماد کا اظہار کیا۔

    تفصیلات کے مطابق گزشتہ دو ماہ سے لندن میں مقیم ایم کیو ایم رابطہ کمیٹی کے ڈپٹی کنونیئر کہف الوریٰ اور رکن رابطہ کمیٹی شبیرقائم خانی وطن واپس پہنچ گئے، دونوں رہنماء گزشتہ دو ماہ سے لندن میں مقیم تھے تاہم 22 اگست کے بعد کچھ دنوں کےلیے امریکا جانے کی کوشش کی اور کوائف مکمل نہ ہونے پر ائیرپورٹ سے واپس لندن بے دخل کردیے گئے تھے۔

    پڑھیں:     لندن کے بیان سے کوئی تعلق نہیں، ایم کیوایم پاکستان

    کراچی آمد کے بعد دونوں رہنماء ایم کیو ایم کے پی آئی بی میں واقع عارضی مرکز گھانچی ہال پہنچے اور رابطہ کمیٹی پاکستان کے اجلاس میں شرکت کے علاوہ ڈاکٹر فاروق ستار سے ملاقات کرکے اُن کی سربراہی پر اطمینان کا اظہار کیا اور آئندہ کے لیے پارٹی کو اپنی خدمات پیش کیں۔ دونوں رہنماؤں نے 17 ستمبر کو لندن سیکریٹریٹ میں بانی ایم کیو ایم کی سالگرہ کی تقریبات میں بھی شرکت کی تھی۔

    یاد رہے 22 اگست کو اشتعال انگیز تقریر اور میڈیا ہاؤسز پر حملے کے اگلے روز ڈاکٹر فاروق ستار نے بانی ایم کیو ایم اور لندن قیادت سے اظہار لاتعلقی کا اعلان کیا تھا، بعد ازاں رابطہ کمیٹی نے پارٹی آئین میں ترمیم کرتے ہوئے الطاف حسین سے فیصلوں کی توثیق کرنے والے شق کو حذف کرنے کا اعلان کیا تھا۔

    مزید پڑھیں:    ایم کیو ایم کا اپنے پرچم سے قائد متحدہ کا نام ہٹانے کا فیصلہ

    بعد ازاں ایم کیو ایم پاکستان نے پارٹی پرچم سے بانی کا نام ہٹا کر انتخابی نشان آویزاں کردیا تھا تاہم لندن قیادت کی جانب سے مسلسل بیانات کے سلسلے کو مدنظر رکھتے ہوئے سربراہ ایم کیو ایم پاکستان نے گزشتہ روز لندن کے تمام رہنماؤں بشمول کنونیئر کو رابطہ کمیٹی سے خارج کرنے کا اعلان کردیا ہے۔

  • ڈاکٹر فاروق ستار سمیت 20 متحدہ رہنمائوں‌ کے وارنٹ جاری

    ڈاکٹر فاروق ستار سمیت 20 متحدہ رہنمائوں‌ کے وارنٹ جاری

    کراچی: جوڈیشل مجسٹریٹ شرقی کی عدالت میں لاؤڈ اسپیکر ایکٹ کیس کی سماعت ہوئی جس میں فاضل جج نے ڈاکٹر فاروق ستار سمیت دیگر 20 رہنماؤں کے دوسری بار وارنٹ گرفتاری جاری کردیے۔

    تفصیلات کے مطابق بانی ایم کیو ایم اور رہنماؤں کے خلاف تھانہ سولجر بازار میں درج مقدمے کی سماعت ہوئی، دورانِ سماعت فاضل جج نے بانی تحریک،سربراہ ایم کیو ایم پاکستان ڈاکٹر فاروق ستار  سمیت 20 رہنماؤں کے دوبارہ وارنٹِ گرفتاری جاری کرتے ہوئے سماعت 20 اکتوبر تک ملتوی کردی۔

    عدالت نے ملزمان کی غیر موجودگی کو دیکھتے ہوئے تفتیشی افسر پر اظہارِ برہمی کیا اور مقدمے میں نامزد ملزمان کے ایک بار پھر وارنٹِ گرفتاری جاری کرتے ہوئے سماعت ملتوی کردی۔

    یاد رہے ایم کیو ایم کی جانب سے گزشتہ سال کارکنان کی جبری گمشدگیوں اور گرفتاریوں کے خلاف لیاقت آباد نمبر 10 سے نمائش تک ریلی نکالی گئی تھی، جس پر ایم کیو ایم کی قیادت کے خلاف تھانا سولجر بازار میں مقدمہ درج کیا گیا تھا، جس میں لاؤڈ اسپیکر ایکٹ اور دیگر دفعات شامل کی گئی تھیں۔