ہالی ووڈ کی مشہور فلم فرنچائز فاسٹ اینڈ فیورس کی نئی فلم ’ہوبز اینڈ شا‘ کا ٹریلر پیش کردیا گیا، یہ فلم سیریز کے مرکزی کرداروں کے بجائے 2 علیحدہ کرداروں کے گرد گھومتی ہے۔
سیریز میں ڈوم (ون ڈیزل) اور اس کے ساتھیوں کی مدد کرنے والے پولیس افسر ہوبز (ڈوائن جانسن) اور ان کے دشمن آئن شا (جیسن اسٹیتھم) کو اس نئی فلم میں پیش کیا جارہا ہے۔
گو کہ یہ دونوں ایک دوسرے کے دشمن ہیں تاہم اب ان کو ایک مشترکہ دشمن کا سامنا ہے جس سے لڑنے کے لیے انہیں مجبوراً متحد ہونا پڑتا ہے۔
ادریس البا نامی دشمن نہایت مضبوط، خطرناک اور بلٹ پروف ہے اور اس کے آگے یہ دونوں، جو خود بھی اپنے دشمنوں کو ناکوں چنے چبوا دیتے ہیں، بے بس نظر آتے ہیں چنانچہ ان کے پاس ایک یہی راستہ ہے کہ دونوں مل کر اس دشمن کا مقابلہ کریں۔
اس مقبول سیریز کا تسلسل پیش کرنے کے بجائے ایک نئی فلم کیوں پیش کی جارہی ہے جو ضمنی کرداروں کے گرد گھومتی ہے؟
اس سوال کا جواب دیتے ہوئے نئی فلم کے مصنف کرس مورگن نے برطانوی نشریاتی ادارے کو بتایا کہ سیریز کے آخری حصے میں جب یہ دونوں جیل میں اکٹھے ہوتے ہیں تو ان کے درمیان نہایت متاثر کن کیمسٹری سامنے آئی جسے فلم بینوں نے بے حد پسند کیا۔
مورگن کا کہنا ہے کہ آن اسکرین اور آف اسکرین ان دونوں اداکاروں کی جوڑی نہایت شاندار ہے جو کسی فلم کو ایکشن بنانے کے ساتھ ساتھ پر مزاح بھی بنا سکتی ہے۔
ان کا کہنا تھا کہ چونکہ فلم کی ٹیم اس سیریز کو ہمیشہ سے مزید وسعت دینا چاہتی تھی، اور ان دونوں کرداروں کی کیمسٹری کو بھی بہت پسند کیا گیا، یہی وجہ ہے کہ اس سیریز کی ضمنی فلم پیش کی جارہی ہے۔
خیال رہے کہ فاسٹ اینڈ فیورس فلم فرنچائز کا آغاز سنہ 2001 سے کیا گیا تھا جس کے بعد ہر نیا حصہ پہلے سے بہترین اور مداحوں کو دنگ کردینے والا ہوتا ہے۔
سنہ 2013 میں فلم کے کرداروں میں سے ایک پال واکر کی ناگہانی موت نے نہ صرف دنیا بھر میں ان کے مداحوں بلکہ فلم کی شوٹنگ کو بھی دھچکہ پہنچایا تھا۔ فیورس 7 کی بقیہ شوٹنگ پال واکر کی موت کے بعد ان کے بھائیوں کی مدد سے پوری کی گئی۔
سیریز کی آخری فلم ’فیٹ آف دی فیوریس‘ سنہ 2017 میں پیش کی گئی جس نے دنیا بھر میں 1 ارب 239 کروڑ ڈالر کی کمائی کی۔
سیریز کی تمام فلمیں اب تک 5 ارب ڈالر کا بزنس کر چکی ہیں اور یہ ہالی ووڈ کی سب سے زیادہ کمانے والی آٹھویں فلم سیریز ہے۔
فاسٹ اینڈ فیورس فلم سیریز دنیا بھر میں یکساں طور پر مقبول فلم سیریز ہے جس کے مرکزی کردار پال واکر کی موت کے باوجود اس کی مقبولیت میں کمی نہیں آئی، تاہم فلم کی پروڈکشن کو ایک نئے مسئلے کا سامنا کرنا پڑ رہا ہے۔
فلم میں لیٹی کا کردار ادا کرنے والی اداکارہ مشل روڈرگز نے دھمکی دی ہے کہ اگر اگلی فلم میں اداکاراؤں کے کردار میں اضافہ نہ کیا گیا تو وہ یہ فلم سیریز چھوڑ دیں گی۔
سماجی رابطوں کی ویب سائٹ انسٹا گرم پر مشل نے فلم کے دیگر کرداروں کے ساتھ اپنی تصاویر پوسٹ کرتے ہوئے لکھا، ’امید ہے کہ سیریز کی اگلی فلم میں خواتین کو اہمیت دی جائے گی، ورنہ میں اس سیریز کو خیر باد کہہ دوں گی‘۔
A post shared by Michelle Rodriguez (@mrodofficial) on
مشل روڈرگز نے پہلی بار اس شکایت کا اظہار چند روز پہلے دیے جانے والے ایک انٹرویو میں کیا جس میں انہوں نے کہا، ’میں اور جورڈانا گزشتہ 16 سال سے اس فلم میں کام کر رہے ہیں۔ لیکن ان 16 سالوں میں سیریز میں، میں اپنے اور جور ڈانا کے بولے جانے والے ڈائیلاگز کو ایک ہاتھ کی انگلیوں پر گن سکتی ہوں‘۔
جورڈانا پاناما سے تعلق رکھنے والی اداکارہ ہیں جو فاسٹ اینڈ فیورس میں برائن (پال واکر) کی بیوی اور ڈوم ٹوریٹو (ون ڈیزل ) کی بہن کا کردار ادا کر رہی تھیں۔
اپنے اس انٹرویو میں مشل کا کہنا تھا کہ صرف ایک فاسٹ اینڈ فیورس ہی نہیں، ہالی ووڈ کی اکثر ایکشن فلمیں مرد کرداروں کے گرد گھومتی ہیں اور ان میں اداکاراؤں کو صرف خانہ پری کے لیے رکھا جاتا ہے۔
ان کا کہنا تھا کہ وہ لاکھوں لوگوں کے سامنے اپنے آپ کو اس طرح پیش کیے جانے کو نہایت برا خیال کرتی ہیں، اور اگر یہی صورتحال جاری رہی تو وہ فلم سیریز چھوڑنے پر مجبور ہوجائیں گی۔
یاد رہے کہ گزشتہ 16 سال میں فرنچائز کی پہلی فلم سے لے کر اب تک کئی خواتین کرداروں کا اضافہ کیا گیا جن میں گال گیڈٹ، چارلیز تھیرون، اور ہیلن میرن شامل ہیں تاہم ان کا یہ کردار نہایت مختصر ہوتا ہے اور فلم بنیادی طور پر مرد کرداروں کے گرد ہی گھومتی ہے۔
تاحال فلم کی پروڈکشن کمپنی کی جانب سے مشل کی دھمکی یا انٹرویو پر کوئی رد عمل ظاہر نہیں کیا گیا تاہم اگر مشل اپنی دھمکی پر عمل کر ڈالتی ہیں، تو پال واکر کی موت کے بعد یہ فاسٹ اینڈ فیورس فلم فرنچائز کے لیے ایک اور بڑا نقصان ہوگا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
