اسلام آباد: ملک کے دارالحکومت میں سات دن سے پریس کلب کے باہر دھرنے پر بیٹھے قبائلی عمائدین نے شکوہ کیا ہے کہ ان کی بات نہیں سنی جارہی۔

تفصیلات کے مطابق اسلام آباد میں دھرنے پر بیٹھے فاٹا قبائل کے عمائدین نے پریس کانفرنس میں الیکشن کمیشن، نگراں وزیراعظم اور چیف جسٹس پاکستان سے اپیل کی ہے کہ ان کے مطالبے سنے جائیں۔

قبائلی عمائدین نے کہا کہ فاٹا کےعوام اپنے حقوق کے لیے اسلام آباد آئے ہیں، ہمیں مزید مایوس نہ کیا جائے، فاٹا کے عوام پُر امن طور پر اپنا مسئلہ پیش کر رہے ہیں۔

عمائدین نے مطالبہ کیا کہ فاٹا کی صوبائی نشستوں پر بھی نگراں حکومت کی نگرانی میں الیکشن کرائے جائیں، ان کا کہنا تھا کہ ہم نے احتجاج ریکارڈ کرایا لیکن کوئی شنوائی نہیں ہوئی، چیف الیکشن کمشنر کو بھی اپنے مطالبے سے آگاہ کر دیا ہے۔

عمائدین نے کہا کہ الیکشن کمیشن نے ہمارے مطالبے نہ مانے تو وزیر اعظم ہاؤس کے باہر دھرنا دیں گے، ان کا کہنا تھا کہ فاٹا کے لوگوں کا یہ دھرنا پُر امن ہے۔

فاٹا انضمام بل کا فوری اطلاق: نگراں وزیراعظم نے فاٹا عوام کے دھرنے کا نوٹس لے لیا

پریس کانفرنس سے خطاب کرتے ہوئے عبداللہ گل نے کہا کہ ہم چیف جسٹس کو دھرنے کے شرکا سے ملاقات کی دعوت دیتے ہیں، فاٹا کے عوام کے جائز مطالبات کو حل کیا جائے۔ ان کا کہنا تھا کہ فاٹا کےعوام نے ہمیشہ بیرونی طاقتوں کے آگے قومی پرچم بلند کیا، فاٹا کےعوام کو احساس دلایا جائے کہ وہ بھی اس ملک کا حصہ ہیں۔

چیئرمین متحدہ قبائل پارٹی حبیب نور نے پریس کانفرنس سے خطاب کرتے ہوئے کہا کہ قبائلی عوام گزشتہ سات دن سے پریس کلب پر دھرنا دیے بیٹھے ہیں لیکن افسوس ہے کہ کسی حکومتی وفد نے رابطہ نہیں کیا، ہم فاٹا کے جائز مطالبات کے لیے دھرنا دے رہے ہیں، فاٹا کےعوام نے اپنا گھر باڑ چھوڑ کر 20 کروڑ عوام کے لیے قربانی دی لیکن ہمیں ہمارے حقوق نہیں دیے جارہے ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: فاٹا انضمام بل کے انتخابات سے پہلے اطلاق کے سلسلے میں فاٹا عوام کے دھرنے کا نگراں وزیر اعظم ناصر الملک نے نوٹس لے لیا۔

تفصیلات کے مطابق فاٹا عمائدین نے اسلام آباد پریس کلب کے باہر فاٹا عوام کے دھرنے میں مطالبہ کیا کہ فاٹا انضمام بل کا اطلاق انتخابات سے پہلے کیا جائے۔

اسلام آباد دھرنے میں فاٹا کے عمائدین اور لوگوں کی بڑی تعداد نے شرکت کی، یہ دھرنا متحدہ قبائل پارٹی کے زیرِ اہتمام کیا جا رہا ہے۔ احتجاج کرنے والے دھرنا منتظمین کا کہنا ہے کہ فاٹا میں بھی انتخابات کرائے جائیں۔

دریں اثنا نگراں وزیر اعظم ناصر الملک نے فاٹا میں انتخابات کرانے کے مطالبے اور بل کے فوری اطلاق کے لیے منعقد کیے جانے والے دھرنے کا نوٹس لے لیا۔

ذرائع کا کہنا ہے کہ وزیر اعظم ہاؤس سے دھرنے کے قائدین سے رابطہ کیا گیا ہے، وزیر اعظم کی جانب سے پریس کلب پر دھرنا دینے والوں کو کل بات چیت کی پیش کش کی گئی۔

ذرائع کے مطابق متحدہ قبائل پارٹی کے قائدین کل حکومت سے بات چیت کریں گے، اس بات چیت میں دھرنے کے دیگرعمائدین بھی شریک ہوں گے۔

قبائلی عمائدین نے وزیر اعظم ہاؤس سے ہونے والے رابطے کے متعلق کہا کہ وزیر اعظم ہم سے بات کرنا چاہ رہے ہیں، امید ہے کل مثبت پیش رفت ہوگی۔

چترال، فاٹا انضمام کی حمایت میں ریلی

عمائدین کا بات چیت کے سلسلے میں واضح طور پر کہنا ہے کہ وہ انتخابات اور بل کے فوری اطلاق کے مطالبات منوائے بغیر دھرنا چھوڑ کر واپس نہیں جائیں گے۔

عمائدین نے میڈیا سے بات چیت کرتے ہوئے کہا کہ ہمارا مطالبہ ہے فاٹا میں صوبائی اسمبلی انتخابات میں بالکل بھی تاخیر نہ کی جائے اور بلدیاتی انتخابات بھی بر وقت کرائے جائیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔