لاہور : رانا ثناءاللہ کے پارلیمنٹ کے مشترکہ اجلاس سے خطاب پر پی ٹی آئی کے رہنما فواد چوہدری نے اپنے شدید ردعمل کا اظہار کرتے ہوئے وزیرداخلہ کو نااہل کرنے کا مطالبہ کردیا۔
ان کا کہنا تھا کہ امپورٹڈ حکمرانوں نے ایک بار پھر سپریم کورٹ کے خلاف اعلان جنگ کردیا ہے، یہ گروہ پہلے بھی سپریم کورٹ پر حملہ کرچکا ہے، سپریم کورٹ بیان کا نوٹس لے اور وزیرداخلہ راناثناءاللہ کو نااہل کرے۔
فواد چوہدری نے کہا کہ رانا ثناءاللہ نے پیغام دیا ہے کہ وہ90دن کے اندر الیکشن کے حکم پرعمل درآمد نہیں ہونے دیں گے، انہوں نے سانحہ ماڈل ٹاؤن والے دن بھی ایسی ہی تقریر پنجاب اسمبلی میں کی تھی۔
پی ٹی آئی رہنما نے کہا کہ کون فتنہ ہے اور کون دہشت گرد یہ فیصلہ عوام کریں گے، جمہوریت کا نام لینے والی کسی جماعت کو عوام کے سامنے آنے سے نہیں گھبرانا چاہیے، پی ڈی ایم حکومت انتخابات سے فرار کیلئے آئین کو ردی کی ٹوکری میں ڈالنا چاہتی ہے۔
آج ڈمی پارلیمان میں حکومت نے عدلیہ پر حملہ کر دیا ہے،اعلی عدلیہ کو ناقابل بیان نقصان پہنچایا گیا ہے، وکلاء اور پاکستان کے شہری عدلیہ کے وقار اور قانون کیلئے کھڑے ہوں گے،PeeDM حکومت انتخابات سے فرار کیلئے آئین کو ردی کئ ٹوکری میں ڈالنا چاہتی ہے اس کیخلاف مزاحمت کیلئے تیار ہو جائیں
— Ch Fawad Hussain (@fawadchaudhry) March 22, 2023
انہوں نے کہا کہ پہلے سے طے کیا گیا ہے کہ الیکشن کسی صورت نہیں ہونے دینے، عدلیہ کیخلاف پارلیمنٹ سے بغاوت شروع کی جارہی ہے، رانا ثناءاللہ کی باڈی لینگویج دیکھ لیں، ارکان کے مزاج دیکھ لیں، صرف عدلیہ مخالف اجلاس بلایا گیا ہے۔
فواد چوہدری نے کہا کہ آج ڈمی پارلیمان میں حکومت نے عدلیہ پر حملہ کردیا، اعلیٰ عدلیہ کو ناقابل بیان نقصان پہنچایا گیا ہے، وکلا اور پاکستان کے شہری عدلیہ کے وقار، قانون کیلئے کھڑے ہونگے، وکلاء اور پاکستان کے شہری کیخلاف مزاحمت کیلئے تیار ہوجائیں۔
واضح رہے کہ وفاقی وزیر داخلہ راناثنااللہ نے قومی اسمبلی اجلاس میں اظہارخیال کرتے ہوئے کہا تھا کہ ہم الیکشن سے فرار نہیں بلکہ ایک ہی دن میں عام انتخابات چاہتے ہیں، تمام اسمبلیوں کے انتخابات نگراں سیٹ اپ کے ہوتے ہوئے ہونے چاہئیں نگران سیٹ اپ کے ہوتے ہوئے اکٹھے الیکشن ہی سب کیلئے لیول پلیئنگ فیلڈ ہوگی۔
راناثنا کا کہنا تھا کہ چیف جسٹس نےکہا الیکشن 90 دن میں نہ ہوئے تو مداخلت کریں گے 30 اپریل کی تاریخ بھی 90 دن کے اندر الیکشن کی تاریخ سے باہر ہے الیکشن ایسا ہو جو ملک میں استحکام کاسبب بنے، قومی اسمبلی کی 60 فیصد نشستیں پنجاب سے ہیں۔
