ARYNews.tv | Urdu – Har Lamha Bakhabar

Tag: fawad chaudary

  • چیف جسٹس انتخابی حلقوں کے نتائج روکے جانے پر نوٹس لیں، فواد چوہدری

    چیف جسٹس انتخابی حلقوں کے نتائج روکے جانے پر نوٹس لیں، فواد چوہدری

    اسلام آباد: پاکستان تحریکِ انصاف کے ترجمان فواد چوہدری نے انتخابی حلقوں کے نتائج روکے جانے پر چیف جسٹس آف پاکستان میاں ثاقب نثار سے نوٹس لینے کی استدعا کر دی۔

    تفصیلات کے مطابق انتخابی حلقوں کے نتائج روکے جانے پر تحریکِ انصاف کا ردِ عمل سامنے آ گیا، پی ٹی آئی ترجمان نے چیف جسٹس سے مداخلت کرنے کی استدعا کر دی۔

    فواد چوہدری نے میڈیا سے گفتگو کرتے ہوئے کہا ’20 حلقوں کے نتائج انتظامی یا عدالتی وجوہات کی بنا پر روکنا نا مناسب عمل ہے۔‘

    انھوں نے کہا کہ 48 حلقوں میں پہلے ہی ووٹوں کی دوبارہ گنتی کی جا چکی ہے، اب نتائج میں مزید تعطل سے انتقالِ اقتدار کا عمل مؤخر ہونے کا خدشہ ہے۔

    پی ٹی آئی ترجمان فواد چوہدری کا کہنا تھا کہ عدالت اس بات کی وضاحت پہلے ہی کر چکی ہے کہ دوبارہ گنتی کن وجوہ کی بنا پر ہو سکتی ہے۔

    لاہورہائی کورٹ نے خواجہ آصف کی کامیابی کا نوٹی فکیشن روک دیا

    انھوں نے کہا ’انتخابی جمہوری عمل میں کسی بھی قسم کی نا جائز تاخیر نقصان دہ ہے، چیف جسٹس سے استدعا ہے کہ نتائج کے نا مناسب تعطل کا نو ٹس لیں۔‘

    واضح رہے کہ آج لاہور عدالت نے این اے 73 سیالکوٹ سے عثمان ڈار کی درخواست پر حکم جاری کرتے ہوئے خواجہ آصف کی کام یابی کا نوٹی فکیشن روک دیا ہے، پی ٹی آئی رہنما نے خواجہ آصف کی کام یابی چیلنج کرتے ہوئے دوبارہ گنتی کی درخواست دائر کی تھی۔

    یاد رہے کہ آج لاہور ہائی کورٹ نے فیصل آباد کے حلقے این اے 106 پر بھی رانا ثناء اللہ کی کام یابی کے خلاف درخواست پر سماعت کرتے ہوئے ان کی کام یابی کا نوٹی فکیشن روکنے کا حکم دے دیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو  زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ایم کیوایم الیکشن جیت کر آئی ہے ہمیں ان کی ضرورت ہے ،فواد چوہدری

    ایم کیوایم الیکشن جیت کر آئی ہے ہمیں ان کی ضرورت ہے ،فواد چوہدری

    اسلام آباد : پاکستان تحریک انصاف کے رہنما فواد چوہدری کا کہنا ہے کہ حکومت سازی کا عمل بہت مشکل کام ہے ، ایم کیوایم الیکشن جیت کر آئی ہے ہمیں ان کی ضرورت ہے۔

    تفصیلات کے مطابق پی ٹی آئی رہنما فواد چوہدری نے پارلیمانی پارٹی کے اجلاس سے قبل میڈیا سے گفتگو کرتے ہوئے کہا کہ حکومت سازی کا عمل بہت مشکل کام ہے، عمران خان کی حلف برداری سب سے اہم مرحلہ ہے۔

    فواد چوہدری کا کہنا تھا کہ عمران خان آج اپنے خیالات پارلیمانی پارٹی کےسامنے رکھیں گے اور پارلیمانی پارٹی آج عمران خان کو وزیراعظم نامزد کرے گی جبکہ پنجاب ،کے پی پارلیمانی رہنماؤں کے اجلاس بھی طلب کرلئے گئے ہیں۔

    رہنما پی ٹی آئی نے کہا کہ ایم کیوایم الیکشن جیت کر آئی ہے ہمیں ان کی ضرورت ہے، ایم کیو ایم سے مقامی اختلافات بھی مقامی سطح پر حل ہوجائیں گے۔

    ان کا کہنا تھا کہ ایم کیوایم اور پی ٹی آئی کی پالیسی مختلف ہے ، حکومت سازی کیلئے تمام جماعتوں کو ساتھ لیکر چلیں گے۔

    ایم کیوایم پاکستان حکومت کا حصہ ہوگی، عمران اسماعیل

    پی ٹی آئی رہنما عمران اسماعیل کا کہنا تھا کہ پارلیمانی پارٹی اجلاس کے بعد بنی گالہ میں بھی اجلاس ہوگا، ایم کیوایم ہماری اتحادی جماعت ہے، ایم کیوایم کو اسٹیک ہولڈرز کی طرح ساتھ لیکر چلنا چاہتے ہیں۔

    انھوں نے مزید کہا کہ ایم کیوایم پاکستان حکومت کا حصہ ہوگی، متحدہ کو وزارتیں ملیں گی، لیکن حتمی فیصلہ نہیں ہوا، دونوں جماعتوں کی طرف سے بیان بازی پر افسوس ہے۔

    پاکستان تحریک انصاف کے رہنما شفقت محمود نے بھی میڈیا سے گفتگو میں کہا کہ پارلیمانی پارٹی اجلاس میں مستقبل کے لائحہ عمل پربات ہوگی ، عمران خان سے آج ایم این ایز کی رسمی ملاقات ہے۔

    خیال رہے گذشتہ روز کراچی پریس کلب میں صحافیوں سے گفتگو کرتے ہوئے فردوس شمیم نقوی نے کہا تھا کہ ایم کیو ایم اپنے میئر کراچی کی وجہ سے الیکشن میں ہاری، پی ٹی آئی مجبوری میں ایم کیوایم کے پاس گئی کیونکہ تحریک انصاف کو وفاق میں اپنے نمبرز پورے کرنے تھے، وہ متحدہ پر لگائے گئے اپنے الزامات پر تاحال قائم ہیں۔

    جس کے بعد شہر قائد کے مئیر وسیم اختر اور فیصل سبز واری کا کہنا تھا کہ پی ٹی آئی کے رہنما اپنی قیادت سے پوچھیں کہ ایم کیو ایم کی کیا اہمیت ہے، عمران خان ہماری حمایت کے بغیر وزیر اعظم نہیں بن سکتے۔

  • کابینہ کی پوزیشن پھولوں کی سیج نہیں کانٹوں کا بستر ہو گی،فواد چوہدری

    کابینہ کی پوزیشن پھولوں کی سیج نہیں کانٹوں کا بستر ہو گی،فواد چوہدری

    اسلام آباد : پی ٹی آئی رہنما فواد چوہدری کا کہنا ہے کہ کابینہ کی پوزیشن پھولوں کی سیج نہیں کانٹوں کا بستر ہوگی، لوگ جلد و مؤثر تبدیلی چاہتے ہیں اور بڑے فیصلوں کی امید رکھتے ہیں۔

    تفصیلات کے مطابق پاکستان تحریک انصاف کے رہنما فواد چوہدری نے سماجی رابطے کی یوب سائٹ ٹوئٹر پر تحریک انصاف کی سب سے بڑی اپوزیشن عوامی توقعات ہیں، اکابرین یہ ذہن نشین کرلیں کابینہ کی پوزیشن پھولوں کی سیج نہیں کانٹوں کا بستر ہو گی، لوگ جلد و مؤثر تبدیلی چاہتے ہیں اور بڑے فیصلوں کی امید رکھتے ہیں۔

     مزید پڑھیں : حکومت پھولوں کی سیج نہیں ہوگی، عمران خان نے جو کہا ہے اس پر عمل کریں گے، فواد چوہدری

    یاد رہے چند روز قبل پاکستان تحریک انصاف کے ترجمان فواد چوہدری کا کہنا تھا کہ ہماری نشستیں عمران خان کی امانت ہیں، وہ جو بھی فیصلہ کریں ہمیں منظور ہوگا۔

    رہنما پی ٹی آئی کا کہنا تھا کہ حکومت پھولوں کی سیج نہیں ہوگی، عمران خان نے جو کہا ہے اس پر عمل کریں گے، پاکستان کے عوام کو عمران خان سے بہت امیدیں ہیں۔

  • امید ہے ایم کیو ایم بھی پی ٹی آئی کا ساتھ دے گی ، فواد چوہدری

    امید ہے ایم کیو ایم بھی پی ٹی آئی کا ساتھ دے گی ، فواد چوہدری

    اسلام آباد : پاکستان تحریک انصاف کے رہنما فواد چوہدری کا کہنا ہے کہ فیصلہ عمران خان نے کرنا ہے کہ وزیراعلیٰ پنجاب کون ہوگا، امید ہے ایم کیو ایم بھی پی ٹی آئی کا ساتھ دے گی۔

    تفصیلات کے مطابق پی ٹی آئی رہنما فواد چوہدری نے میڈیا سے گفتگو کرتے ہوئے کہا کہ ہم نے بنیادی فارمولہ طے کرلیا ہے، آج مزید 2 امیدوار پی ٹی آئی میں شامل ہوں گے، تعداد 15 ہوجائے گی، صوبائی اسمبلی میں ہماری نشستیں 180ہیں، حکومت بنا سکتے ہیں۔

    فوادچوہدری کا کہنا تھا کہ فیصلہ عمران خان نےکرناہےکہ وزیراعلیٰ پنجاب کون ہوگا، کوئی فرمائش نہیں چل رہی،عمران خان عہدے تقسیم کریں گے۔

    رہنماپاکستان تحریک انصاف نے کہا کہ ایم کیو ایم کے بغیر قومی اسمبلی میں 168نشستیں ہیں، امید ہے ایم کیو ایم بھی پی ٹی آئی کا ساتھ دے گی، ایم کیو ایم کے مثبت فیصلے کے نتیجے میں مستحکم حکومت بناسکتے ہیں۔

    گذشتہ روز فواد چوہدری نے دعویٰ کیا تھا پنجاب میں اس نے نمبر گیم پورا کر لیا اور حکومت سازی کے لیے 141 ارکان کی حمایت مل گئی ہے۔

    مزید پڑھیں : پنجاب میں 141 ارکان کی حمایت مل گئی، پی ٹی آئی کا دعویٰ

    رہنما پی ٹی آئی نے وزیراعلیٰ کیلئے اتحادی جماعتوں کیساتھ بات چیت کی تردید کرتے ہوئے واضح کیا تھا کہ وزیراعلیٰ پی ٹی آئی سے ہی ہوگا۔

    اس سے قبل پاکستان تحریک انصاف کے مرکزی رہنما شاہ محمود قریشی کا کہنا تھا کہ پنجاب ہمارے لیے اہم ہے، یہاں نمبر پورے کر کے پی ٹی آئی حکومت بنائے گی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں

  • فواد چوہدری کا نوازشریف کی جلد صحتیابی کے لئے نیک خواہشات کا اظہار

    فواد چوہدری کا نوازشریف کی جلد صحتیابی کے لئے نیک خواہشات کا اظہار

    اسلام آباد : پاکستان تحریک انصاف کے رہنما فوادچوہدری نے نوازشریف کی جلد صحتیابی کے لئے نیک خواہشات کا اظہار کیا جبکہ بیگم کلثوم نواز کی صحت یابی کے لئے دعا بھی کی۔

    تفصیلات کے مطابق پی ٹی آئی رہنما فواد چوہدری نے سماجی رابطے کی ویب سائٹ ٹوئٹر پر اپنے پیغام میں نوازشریف کی جلدصحتیابی کےلئےنیک خواہشات کااظہار کرتے ہوئے کہا کہ اللہ بیگم کلثوم نواز کو بھی مکمل صحت عطا فرمائے۔

    یاد رہے کہ گذشتہ رات اڈیالہ جیل میں قید سابق وزیراعظم اور مسلم لیگ ن کے تاحیات قائد نوازشریف کو طبیعت ناساز ہونے کے بعد پمز اسپتال منتقل کرکے شعبہ امراض قلب کے پرائیویٹ روم میں داخل کردیا گیا تھا۔

    نواز شریف کا پمز کارڈیک سینٹر میں ابتدائی طبی معائنہ مکمل کرلیا گیا جبکہ دل اور گردوں کے ٹیسٹ آج صبح کیے جائیں گے۔

    مزید پڑھیں : نوازشریف اڈیالہ سے پمز اسپتال منتقل، شعبہ امراض قلب کا پرائیویٹ وارڈ سب جیل قرار

    دوسری جانب پمز شعبہ امراض قلب کا پرائیویٹ وارڈ سب جیل قرار دے دیا گیا، سب جیل کا نوٹیفکیشن چیف کمشنر اسلام آباد نے جاری کیا۔

    پنجاب کے نگراں وزیرداخلہ شوکت جاوید کا کہنا تھا کہ نوازشریف کودودن ہسپتال میں رکھا جائے گا، انتظامیہ اورپولیس کوالرٹ رہنےکی ہدایت کردی گئی ہے۔

    واضح رہے کہ احتساب عدالت نے رواں ماہ 6 جولائی کو ایون فیلڈ ریفرنس کا فیصلہ سناتے ہوئے نوازشریف کو 11، مریم نوازکو 8 اور کیپٹن ریٹائرڈ صفدر کو ایک سال قید سنائی تھی۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ملتان کا جلسہ ناکام ہوگیا، عوام نے ن لیگ کو مسترد کردیا، شاہ محمود قریشی

    ملتان کا جلسہ ناکام ہوگیا، عوام نے ن لیگ کو مسترد کردیا، شاہ محمود قریشی

    اسلام آباد/ ملتان : پاکستان تحریک انصاف کے مرکزی رہنما شاہ محمودقریشی نے کہا ہے کہ ملتان کے عوام نے ن لیگ کو مسترد کردیا، فواد چوہدری کا کہنا ہے کہ میاں صاحب چوری کا مال واپس کرنے کی تیاری کریں۔

    یہ بات انہوں نے پی ایم ایل این کے ملتان جلسے سے نواز شریف کے خطاب پر اپنے رد عمل کیں کہی، شاہ محمود قریشی نے کہا کہ اگر آج میں ن لیگ کا حصہ ہوتا تو جلسہ دیکھ کر مایوس لوٹتا، ملتان کا جلسہ آج ناکام ہوگیا ہے، عوام نے ن لیگ کو مسترد کردیا۔

    نواز شریف کے پاس وقت ہوتا تو آج ملتان کی گلیاں دکھاتا، ملتان کی گلیوں میں گٹرکاپانی نظرآتا ہے،اسکولوں کا حال برا ہے، ملتان میں میٹرو منصوبہ ناکام رہا ہے،ایک سوال کے جواب میں شاہ محمود قریشی کا کہنا تھا کہ ن لیگ میں واپس جانے کا فیصلہ جاوید ہاشمی کا ذاتی ہے۔

    داغی کو دربار میں شامل کرنے کیلئے ڈارامہ رچایا گیا، فواد چوہدری

    علاوہ ازیں پاکستان تحریک انصاف کے ترجمان فواد چوہدری نے اپنے رد عمل میں کہا کہ میاں صاحب آپ چوری کا مال واپس کرنے کی تیاری کریں کیونکہ اب آپ کو جیل تو جانا ہی ہے۔

    فواد چوہدری نے کہا کہ عوام تو پہلے بھی نوازشریف کے جلسے میں نہیں آتے تھے، اب پٹواریوں نے بھی آناچھوڑ دیا ہے، ملتان کے عوام نے بھی کرپٹ خاندان سے بیزاری کا اظہار کردیا، سارا ڈرامہ ایک "داغی” کو دربار میں شامل کرنے کیلئے رچایا گیا۔

    فوادچوہدری کا کہنا تھا کہ ملتان میٹرو سے ہونے والی ترقی چینی حکام نے بےنقاب کی، میاں صاحب آپ چوری کامال واپس کرنے کی تیاری کریں، اب آپ کی جیبوں اور تجوریوں سے مال مسروقہ برآمد کیا جائے گا، قوم کی کمر پر لادا گیا قرضوں کا بوجھ اسی سرمائے سے ادا ہوگا، میاں صاحب ایک دن جیل تو آپ کو جانا ہی ہے۔

    رہنما پی ٹی آئی نے مزید کہا کہ کے پی میں ہم نے وہ کارکردگی دکھائی جس کا آپ کیلئے تصور بھی محال ہے، پختونخوا کے آئینے میں دیکھیں گے توشرم سے ڈوب مرنا ہوگا، کے پی میں عمران خان پھرآرہا ہے اور پنجاب آپ سے جان چھڑوا رہا ہے، جو غلط فہمیاں آپ کے ذہن میں ہیں، چند روزمیں وہ بھی دور ہوجائیں گی۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔  

  • نوازشریف کا مقابلہ پی ٹی آئی یاپیپلزپارٹی سے نہیں، شہبازشریف اورحمزہ شہباز سے ہوگا، فواد چوہدری

    نوازشریف کا مقابلہ پی ٹی آئی یاپیپلزپارٹی سے نہیں، شہبازشریف اورحمزہ شہباز سے ہوگا، فواد چوہدری

    اسلام آباد: پاکستان تحریک انصاف رہنما فواد چوہدری کا کہنا ہے کہ نوازشریف کرپشن ثبوت کے بعد بوکھلاہٹ کا شکارہیں، ان کا مقابلہ پی ٹی آئی یاپیپلزپارٹی سے نہیں، شہبازشریف اورحمزہ شہباز سے ہوگا۔

    تفصیلات کے مطابق نوازشریف کےبیان پر پی ٹی آئی رہنما فواد چوہدری نے ردعمل کا اظہار کرتے ہوئے کہا کہ نوازشریف کامقابلہ پی ٹی آئی یاپیپلزپارٹی سے نہیں بلکہ ان کا مقابلہ شہبازشریف اورحمزہ شہباز سے ہوگا۔

    فواد چوہدری کا کہنا تھا کہ سازش کاراگ جی ٹی روڈریلی سےپہلےالاپ رہےہیں، راولپنڈی سےنکلےتوجہلم میں سازش بتانے کا کہا، جہلم کے بعد گوجرانوالہ میں سازش بتانے کا کہا۔

    رہنما پی ٹی آئی نے مزید کہا کہ نوازشریف کرپشن ثبوت کےبعدبوکھلاہٹ کاشکارہیں، دباؤ کا شکار نوازشریف تیزی سے انجام کی طرف بڑھ رہے ہیں۔

    مزید پڑھیں : آئندہ الیکشن میں ن لیگ کا مقابلہ زرداری اور عمران سے نہیں بلکہ خلائی مخلوق کے ساتھ ہے، نوازشریف

    یاد رہے کہ گذشتہ روز صادق آباد میں جلسے سے خطاب کرتے ہوئے سابق وزیر اعظم نواز شریف نے کہا تھا کہ ن لیگ کا مقابلہ زرداری کے ساتھ ہے نہ عمران کے ساتھ بلکہ ہمارا مقابلہ خلائی مخلوق کے ساتھ ہے، اب پاکستان کی بدنصیبی کا70سالہ دور دوبارہ نہیں آئے گا۔

    نواز شریف کا پی ٹی آئی پر  شدید تنقید کرتے ہوئے کہنا تھا کہ تحریک انصاف تو کوئی شے ہی کچھ نہیں ہے، یہ بلا لے کر نکلنے والے لوگ قوم سے مذاق کر رہے ہیں، پی ٹی آئی والوں کو کرکٹ کھیلنے کے علاوہ اور کوئی کام نہیں ہے، شاید یہ لوگ میری کرکٹ کے لئے خدمات کو بھی بھول گئے ہیں، یہ لوگ شوکت خانم میموریل کیلئے میری خدمت کو بھی بھول گئے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں

  • فواد چوہدری سراج الحق پر تنقید سے پہلے گریبان میں جھانکیں، فرید احمد پراچہ

    فواد چوہدری سراج الحق پر تنقید سے پہلے گریبان میں جھانکیں، فرید احمد پراچہ

    لاہور : جما عت اسلامی کے نائب امیر ڈاکٹر فرید احمد پراچہ نے کہا ہے کہ فواد چوہدری سراج الحق پر تنقید سے پہلے اپنے گریبان میں جھانکیں، آپ مشرف، ق لیگ، پیپلزپارٹی، ایم کیو ایم کی ترجمانی کرتے رہے ہیں۔

    ان خیالات کا اظہار انہوں نے لاہور میں فواد چوہدری کے بیان پر اپنے رد عمل میں میڈیا سے گفتگو کرتے ہوئے کیا، انہوں نے کہا کہ عمران خان نے خود کہا تھا کہ پی ٹی آئی کے 20ایم پی ایز سینیٹ الیکشن میں بک گئے تھے۔

    سینیٹ الیکشن میں پی ٹی آئی نے سراج الحق کو ووٹ دیئے جبکہ جماعت اسلامی نے تحریک انصاف کو اس سے تین گنا ووٹ دیئے۔

    فرید احمد پراچہ کا کہنا تھا کہ فواد چوہدری اس سے پہلے پرویز مشرف، ق لیگ، پیپلزپارٹی، ایم کیو ایم کی ترجمانی کرتے رہے ہیں، ہر چڑھتے سورج کو سلام کرنے والے کو دوسروں پر کیچڑا چھالنا زیب نہیں دیتا۔

    فرید پراچہ کا مزید کہنا تھا کہ جماعت اسلامی ساتھ نہ دیتی تو پی ٹی آئی کی کے پی حکومت دو ماہ بھی قائم نہ رہ پاتی، فواد چوہدری ہمارا شکریہ ادا کریں کہ کے پی حکومت 5سال پورے کر رہی ہے۔

    مزید پڑھیں : ہمارے ووٹوں‌ سے سینیٹر بننے والے سراج الحق الزام لگانے سے پہلے سینیٹر شپ چھوڑیں، فواد چوہدری

    یاد رہے کہ گزشتہ روز لندن سے واپسی پر پی ٹی آئی کے ترجمان فواد چوہدری نے کہا تھا کہ اگر ہم نے آرڈر لے کر ووٹ ڈالے ہیں تو امیر جماعت اسلامی سراج الحق سیٹ چھوڑ دیں کیوں کہ وہ بھی پی ٹی آئی کے ووٹوں سے سینیٹر بنے تھے۔

  • مریم نواز جھوٹوں کی آئی جی اور مریم اورنگزیب پی ایس اوہیں، فواد چوہدری

    مریم نواز جھوٹوں کی آئی جی اور مریم اورنگزیب پی ایس اوہیں، فواد چوہدری

    اسلام آباد : تحریک انصاف کے ترجمان فواد چوہدری کا کہنا ہے کہ مریم نواز جھوٹوں کی آئی جی اور مریم اورنگزیب پی ایس اوہیں، قوم منتظر ہے کب آپ دستاویز پیش اورپیسوں کا حساب دیں، قوم کے صبر کا پیمانہ اب لبریز ہوچکا ہے۔

    تفصیلات کے مطابق تحریک انصاف کے ترجمان فواد چوہدری نے مریم نواز کے بیان پر ردعمل کا اظہار کرتے ہوئے کہا کہ مریم نواز جھوٹوں کی آئی جی اور مریم اورنگزیب پی ایس اوہیں، کہا جارہا ہے تھوڑا انتظار کریں، قوم برسوں سےانتظار کر رہی ہے۔

    فواد چوہدری کا کہنا تھا کہ قوم پیسوں کےحساب کےلیےان کی دستاویزکی منتظر ہے، 134 دن مقدمہ چلا 6 ماہ سے احتساب عدالت میں سماعت جاری ہے، سادہ سے سوالات ہیں جن کے جواب نہیں دیے جا رہے۔

    ترجمان تحریک انصاف نے کہا کہ وہ کہہ رہی تھیں لندن تودور پاکستان میں بھی ان کی کوئی پراپرٹی نہیں، دستاویز سےثابت ہوچکا کہ ایون فیلڈ اپارٹمنٹس کی مالک آپ ہیں، اب آپ کہہ رہی ہیں کہ تھوڑا اور انتظار کریں۔

    انکا مزید کہنا تھا کہ قوم کے صبر کا پیمانہ اب لبریز ہوچکا ہے، آپ کے پاس بتانے کو کچھ ہے تو بتائیں ورنہ اڈیالہ جانے کی تیاری کریں۔

    مزید پڑھیں :  لاڈلہ صاحب سے کہیں بس چند دن انتظار کرلیں، مریم نواز

    یاد رہے کہ عمران خان نے ٹوئٹر پر مریم نواز کے مبینہ جھوٹ اور برٹش ورجن آئی لینڈ کی فنانشنل انوسٹیگشن ایجنسی کی دستاویز شیئر کئے اور لکھا تھا اس سے ثابت ہوتا ہے کہ مریم نواز ہی اربوں روپے مالیت کے مےفیئرز فلیٹس کی مالک ہیں، انکا اپنا کوئی ذریعہ آمدن نہیں چنانچہ یہ پیسہ نواز شریف نے چرایا اور بیٹی کے نام پر منی لانڈرنگ کرکے باہر بھجوایا۔

    چیئرمین پی ٹی آئی نے مریم نوازاور شہبازشریف کے بیٹے سلمان شہباز کے ٹی وی انٹریوز کی ویڈیو بھی شیئر کی اور کہا مریم نواز نے کرپشن اور چوری کے پیسے سےخریدی گئی جائیدادیں بچانے کیلئے جھوٹ بولا۔

    جس کے بعد مریم نواز نے ردعمل کا اظہار کرتے ہوئے ٹوئٹ کیا کہ لاڈلہ صاحب سے کہیں بس چند دن انتظار کرلیں، واجد ضیا خود ان کاغذات کی حقیقت بتادیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • ن لیگ کا جنازہ نکل چکا میت کو چار کاندھے درکار ہیں ، فواد چوہدری

    ن لیگ کا جنازہ نکل چکا میت کو چار کاندھے درکار ہیں ، فواد چوہدری

    اسلام آباد : پاکستان تحریک انصاف کے رہنما فواد چوہدری کا کہنا ہے کہ ن لیگ کا جنازہ نکل چکا میت کو چار کاندھے درکار ہیں، پنجاب کی بیوروکریسی پینٹاگون کے نام سے جانی جاتی ہے، شاہد خاقان عباسی کاغذی وزیراعظم ہیں، اصل اختیارات تو فوادحسن فواد کے پاس ہیں۔

    تفصیلات کے مطابق پاکستان تحریک انصاف کے ترجمان فواد چوہدری نے میڈیا سے گفتگو کرتے ہوئے کہا کہ آپ اس لئے نااہل ہوئے کیوں کہ آپ نااہل تھے ، آپ کو اہل کرنا آمروں کی سازش تھی۔

    سعد رفیق پر تنقید کرتے ہوئے فواد چوہدری کا کہنا تھا کہ سعد رفیق بھی شہبازشریف کا فرنٹ مین ہے ، پیراگون ہاؤسنگ کا مالک سعد رفیق ہے ، احد چیمہ نے سعد رفیق کی کمپنی کو غیر قانونی ٹھیکہ دیا، اس کیس میں احد چیمہ وعدہ معاف گواہ بن جائے گا، اس گینگ کاسربراہ سعد رفیق ہے۔

    انھوں نے کہا کہ اداروں کیخلاف سازش بےنقاب کرنے کیلئےکارکنوں کو تیار رہنے کیلئے کہا ہے ، تحریک انصاف آئین اور اداروں کیساتھ کھڑی ہے ، پاکستان میں کسی بھی قسم کے محاذ آرائی کامتحمل نہیں ہوسکتا۔

    رہنما پی ٹی آئی کا کہنا تھا کہ ن لیگ کا جنازہ نکل چکا میت کو چار کاندھے درکار ہیں، پیپلزپارٹی ن لیگ کو کاندھا دیتی ہے تو اچھی بات ہے۔

    سینیٹ الیکشن کے بارے میں انھوں نے کہا کہ سینیٹ کے انتخابات کا مقابلہ مسلم لیگ ن کے علاوہ دیگر جماعتوں میں ہوتا نظر آرہا ہے ۔۔لیکن جو الیکشن کمیشن فیصلہ کرے گا وہی ہوگا۔

    انکا کہنا تھا کہ تحریک انصاف واحد ہے جوملک میں انصاف بحال کراسکتی ہے، قوم اس سازش کا بھانڈہ پھوٹتا ہوا دیکھنا چاہتی ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔