لاہور : تحریک انصاف کے رہنما فواد چوہدری نے کہا ہے کہ ن لیگ کی سیاست ختم ہوچکی، 4 ستمبر کے بعد نوازشریف اپنے اہل خانہ سمیت ضمانتیں کروائیں گے یا پھر جیل جائیں گے۔
تفصیلات کے مطابق لاہور میں پی ٹی آئی چیئرمین سیکرٹریٹ میں پریس کانفرنس کرتے ہوئے پی ٹی آئی رہنما فواد چوہدری نے کہا کہ ن لیگ کی سیاست ختم ہوگئی، چار ستمبر کے بعد نوازشریف ریلی نہیں نکال سکتے ، نوازشریف کو اہلخانہ سمیت ضمانت کرانی پڑسکتی ہے، ضمانت نہ ہوئی تو نوازشریف جیل جائیں گے۔
فواد چوہدری کا کہنا تھا کہ حدیبیہ پیپر ملز کا کیس اب تک نیب میں فائل کیوں نہیں کیا گیا، فواد حسن فواد کے قریبی کو راولپنڈی میں نیب کا ڈائریکٹر کیوں لگایا گیا،اس طرح چورن بکنے والا نہیں، کوئی سینئر رہنما ریلی میں نہیں،مریم، حسن اورحسین آئندہ ہفتے ضمانتیں کراتے دکھائی دیں گے۔
رہنما پی ٹی آئی نے کہا کہ خیبرپختونخو اور پنجاب میں پی ٹی آئی نے پارلیمانی بورڈ تشکیل دیدیا ہے، پرویزخٹک کو عمران خان کا سیاسی مشیر مقرر کردیا گیا ہے، پرویزخٹک پورے ملک میں عمران خان کے سیاسی مشیر ہونگے جبکہ انتخابات کیلئے مرحلہ وار ٹکٹس دینے کا فیصلہ کیا گیا ہے۔
پاکستان تحریک انصاف کے ترجمان نے کہا کہ ریلی نکالنے پر99فیصد قیادت نواز شریف کے ہمراہ نہیں ہے۔ ریلی میں ان کے ساتھ صرف طلال چوہدری اورماروی میمن جیسے شامل باجے چل رہے ہیں۔
فواد چوہدری کا کہنا تھا کہ نواز شریف کی بے وجہ ریلی میں بچے کی شہادت پر افسوس ہے، یہ سمجھ نہیں آ رہی کہ نواز شریف یہ ریلی کیوں نکال رہے ہیں، جے آئی ٹی کے تیرہ سوالات کو سامنے رکھتے ہوئے انھوں نے کہا کہ میاں نواز شریف کو اور کسی نے نہیں بلکہ ان کے بچوں نے سستے اکاﺅنٹنٹس اور وکیل بھرتی کر کے پھنسوایا ہے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
اسلام آباد: نواز شریف کی تقریر پر پی ٹی آئی، عوامی تحریک اور شیخ رشید نے ردعمل دیتے ہوئے کہا ہے کہ نواز شریف محض اقامے پر نہیں اربوں روپے کی کرپشن پر نااہل ہوئے، سپریم کورٹ کی کارروائی قوم کے سامنے ہے۔
نواز شریف کے ریلی سے خطاب کے بعد اے آر وائی نیوز سے گفتگو کرتے ہوئے عوامی مسلم لیگ کے سربراہ شیخ رشید نے کہا کہ محمد خان جونیجو کو انہوں نے نکالا، بے نظیر بھٹو کو دو بار انہوں نے نکالا۔
، یہ لوگ جھوٹ بولتے ہیں، انہوں نے چار سال میں 35 ارب ڈالر قرضہ لیا، جب کہ 70سال میں 40 ارب ڈالر قرضہ لیا گیا اور اب موجودہ وزیراعظم شاہد خاقان عباسی ایل این جی کے اسکینڈل میں ملوث ہے۔
شیخ رشید نے کہا کہ جس دن نواز شریف نے سچ بولا وہ ان کی سیاست کا آخری سال ہوگا، ہمارے کالج اور اسپتال اور سڑکیں اسی طرح پڑی ہیں پنڈی میں ترقی نہیں ہوئی اسی لیے پنڈی کی ریلی ناکام ہوئی۔
انہوں نے نوازشریف کو مخاطب کرتے ہوئے کہا کہ میاں صاحب آپ پر اربوں ڈالر کی کرپشن ہے، آپ پرکرپشن کے19 کیسز ہیں اور آپ اپنے وزیر خزانہ کے لیے منی لانڈرنگ کرتے رہے ہیں، یہ معاملہ صرف اقامہ کا نہیں ہے۔
انہوں نے کہا کہ آپ چور دروازے سے مذاکرات بھی کررہے ہیں، بھیک بھی مانگ رہے ہیں اور کمزور عوامی طاقت کا مظاہرہ کررہے ہیں، آج بھی پنڈی میں چار بار بجلی کی لوڈ شیڈنگ ہوئی، یہ کون سی ترقی ہے؟
سربراہ عوا می مسلم لیگ نے کہا کہ 13 اگست کو لیاقت باغ کے جلسے میں نواز شریف کا پوسٹ مارٹم کریں گے، نواز شریف کا یہ سارا عمل فوج اور عدلیہ کو دباؤ کا شکار کرنے کے لیے ہے۔
ریلی ناکام رہی، اس میں لوگ ہی نہیں آئے، فواد چوہدری
اے آر وائی نیوز سے ٹیلی فونک گفتگو کرتے ہوئے پاکستان تحریک انصاف کے ترجمان فواد چوہدری نے پنڈی اور پوٹھو ہار کے لوگوں کو مبارک باد دی اور کہا کہ وہ لوگ آئین کے ساتھ کھڑے رہے اور ریلی میں نہیں گئے۔
ریلی ناکام رہی، اس میں لوگ ہی نہیں آئے، کامیاب تو کیا خاک ہوئے، لوگوں کو مقدمے کی ایک ایک حقیقت کا پتا ہے یہ عوام کو بے وقوف نہیں بناسکتے۔
ایک سوال کے جواب میں فواد چوہدری نے کہا کہ نواز شریف کچھ بھی کہہ سکتے ہیں لیکن لوگ جانتے ہیں، فیصلہ لوگوں کے سامنے آیا ہے، مقدمہ سب کے سامنے چلا ہے کہ نواز شریف کرپشن پر نکالے گئے ہیں، لوگ اتنے پاگل نہیں ہیں کہ وہ یقین کرلیں کہ نواز شریف کرپشن پر نہیں نکالے گئے۔
ان کا کہنا تھا کہ ایسی تقریر کا مقصد احتساب کیسز سے سپریم کورٹ کی نگرانی ہٹوانا ہے، لیکن یہ ممکن نہیں ہے، عدلیہ کی نگرانی جاری رہے گی، چار ستمبر کو ریفرنس دائر کرنے کی جو تاریخ ہے اس پر ریفرنسز دائر ہوں گے اور انہیں سزا ملے گی۔
انہوں نے کہا کہ لوٹا گیا پیسہ ملک میں واپس آنا چاہئیے، برآمدگی کے معاملے پر بھی پی ٹی آئی نظر رکھے گی، وہ صبح اٹھتے ہیں یا رات کو سوتے ہیں تو انہیں عمران خان یاد آتا ہے۔
وہ تنہا شخص ہے جس نے یہ معاملہ اٹھایا ورنہ لوگ تو کرپشن کو بھول چکے تھے، عمران خان نے ہی انہیں یاد دلایا، اب پیسہ نکلوانے کا عمل بھی عمران خان ہی مکمل کرائیں گے۔
فواد چوہدری نے کہا کہ آئی ایس آئی کی ن لیگ کو فنڈنگ کاکیس بھی ابھی بھی سپریم کورٹ میں پڑا ہوا ہے، کس طرح آئی ایس آئی نے رقومات کے ذریعے ن لیگ کو جتوایا، بعد کے معاملات میں بھی ن لیگ نے دھاندلی کی، ایک بھی ایسا الیکشن نہیں جس میں شفاف طریقے سے یہ لوگ برسر اقتدار آئے ہوں، اب ان کی واپسی کا دور شروع ہوگیا، اب ان کے نوٹ اور بوٹ نہیں چل رہے۔
پہلی بار پاکستان میں چور اور سپاہی مل کر نہیں کھیلے، 60 دنوں میں سب کچھا چٹھا سامنے آگیا، اب مزید تحقیقات ہوجائیں تو کیا کچھ سامنے آجائےگا، اصل میں ن لیگ کا مقصد اب پیسے کی برآمدگی اور واپسی کو روکنا ہے لیکن پی ٹی آئی کا اب اگلا ہدف پیسے کی وطن واپسی ہے۔
علاوہ ازیں اے آر وائی سے گفتگو کرتے ہوئے پاکستان عوامی تحریک کے رہنما نور اللہ صدیقی نے کہا کہ تین بار وزیراعظم بننے والا شخص اس قدر ڈھٹائی سے جھوٹ بولے تو بہت افسوس ہوتا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
لاہور: تحریک انصاف کے ترجمان فواد چوہدری نے الزام عائد کیا ہے کہ عائشہ گلالئی نے 5 کروڑ روپے لے کر عمران خان کی کردار کشی کی جس پر انہیں نوٹس جاری کرتے ہوئے معافی کا مطالبہ کیا گیا ہے، انہوں اپنی دھواں دار پریس کانفرنس میں حدیبیہ پیپرز مل کیس کھولنے کا مطالبہ اور وزیراعظم خاقان عباسی پر تنقید کرتے ہوئے انہیں ریلو کٹا قراردے دیا۔
تفصیلات کے مطابق لاہورمیں چیئرمین سیکریٹریٹ میں پی ٹی آئی رہنماؤں نے پریس کانفرنس کی، اس موقع پر فواد چوہدری کے ہمراہ خواتین رہنما زرین ضیا، عالیہ حمزہ، یاسمین راشد بھی موجود تھیں۔
پریس کانفرنس سے خطاب کرتے ہوئے فواد چوہدری کا کہنا تھا کہ عمران خان کیخلاف سو فیصد سازش ہورہی ہے، اس قسم کے مزید کردار بھی سامنےآئیں گے، جس کیلئے پورا اسکرپٹ لکھا گیاہے جس میں نواز لیگ، میرشکیل الرحمان سمیت5لوگ ہیں، جن کیلئے پیسوں کی بوریوں کے منہ کھول دیئےگئے ہیں۔
انہوں نے کہا کہ اگر لیڈر اتنا برا تھا تو عائشہ گلالئی کو اس کی دی گئی نشست سے بھی استعفیٰ دے دینا چاہئیے، انہوں نے الزام عائد کیا کہ عائشہ گلالئی نے عمران خان کی کردار کشی کے لئے 5 کروڑ روپے وصول کئے ہیں۔
فواد چوہدری نے کہا کہ اس سے قبل پارٹی کو خیر باد کہنے والی خواتین رہنماؤں ملائکہ اور نازبلوچ نے واضح طور پر کہا ہے کہ ہمارے اختلافات تنظیمی تھے، ملائکہ اور نازبلوچ نے کہا ہے کہ عمران خان نے ہمیشہ ہماری عزت کی ہے۔ فواد چوہدری کا مزید کہنا تھا کہ جےآئی ٹی تفتیش کی ریکارڈنگ اور والیوم ٹین منظر عام پر لایا جائے۔
لقموں سے اندازہ ہوتا ہے کہ معاملہ کچھ اور ہے، زرین ضیا
دریں اثناء پی ٹی آئی رہنما زرین ضیا نے کہا کہ عائشہ گلالئی کے الزامات کی تردید اور شدید مذمت کرتے ہیں، ان کےالزامات سے ہماری دل آزاری ہوئی ہے، ان کو کہنا چاہتے ہیں کسی اورپارٹی میں جاکر الزامات نہ لگائیں۔
پی ٹی آئی کے تمام ممبرز فیملی کی طرح کام کرتےہیں، عائشہ گلالئی پشاور این اے ون کا ٹکٹ مانگ رہی تھیں، جس پر عمران خان نے ان کو کہا کہ آپ درست کام نہیں کر رہیں۔
انہوں نے کہا کہ عائشہ گلالئی کی پریس کانفرنس میں ان کے والد لقمے دے رہے تھے، ان کو والد کے لقموں کی ضرورت کیوں پڑرہی تھی؟ پریس کانفرنس سے اندازہ لگایا جاسکتا ہے کہ معاملہ ہی کچھ اور ہے۔
انہوں نے وزیر اعلیٰ خیبرپختونخوا پر بھی الزامات لگائے ہیں، پرویزخٹک ہمارے وزیراعلیٰ ہیں ہمیں معلوم ہے کہ وہ کیسےکام کر رہے ہیں۔
عائشہ گلالئی نے پارٹی کی تمام خواتین کی توہین کی، عالیہ حمزہ
پریس کانفرنس سے خطاب کرتے ہوئے پی ٹی آئی کی ممبرکور کمیٹی عالیہ حمزہ نے کہا کہ عمران خان کی گواہی پی ٹی آئی کے علاوہ اور بھی لوگ دے رہے ہیں، چیئرمین میرٹ پرکسی قسم کا سمجھوتہ نہیں کرتے۔
انجینئر اور کور کمیٹی کا حصہ ہوں ہمیں پارٹی میں عزت دی جاتی ہے، عائشہ گلالئی نے پارٹی کی تمام خواتین کی توہین کی ہے۔
عالیہ حمزہ نے کہا کہ گلالئی کہتی ہیں کہ خان صاحب مغربی اقدار لانا چاہتے ہیں، لیکن ہم ان سے پوچھنا چاہتے ہیں کہ عائشہ گلالئی صاحبہ آپ کی اپنی بہن بیرون ملک کیسے کپڑے پہنتی ہے؟
گلالئی کو میسج2013میں ملا تو اس وقت پریس کانفرنس کیوں نہ کی، عائشہ گلالئی نے پارٹی چھوڑنے سے پہلے عمران خان سے ملاقات کی اس ملاقات کی تصاویر منظرعام پر آچکی ہیں، ان تصاویر میں عمران خان کی نظریں دیکھی جاسکتی ہیں، جس میں عمران خان نے ایک مرتبہ بھی ان کو نظر تک اٹھا کرنہیں دیکھا۔
عائشہ گلالئی آپ اس کو دھمکی سمجھتی ہیں تو سمجھیں لیکن آئندہ عمران خان کیخلاف ایسی غلیظ باتیں نہ کرنا،عائشہ گلالئی کو صرف عمران خان کی کردارکشی کے پیسے ملے ہیں، اگر ان کو جہانگیر ترین کےخلاف پیسے ملے تو وہ ان پر بھی الزامات لگادیں گی، ہم خوش نصیب ہیں جوہمیں عمران خان صاحب جیسےلیڈرملےہیں۔
عائشہ گلالئی کےالزامات سے بہت دکھ ہوا ہے، یاسمین راشد
اس موقع پر خطاب کرتے ہوئے پی ٹی آئی رہنما یاسمین راشد کا کہنا تھا کہ میں پی ٹی آئی پنجاب میں پہلی خاتون جنرل سیکریٹری تھی، عائشہ گلالئی کےالزامات سے بہت دکھ اور تکلیف ہوئی ہے۔
ان کو کسی بھی شخص کی کردارکشی نہیں کرنی چاہئیےتھی، عمران خان صاحب جیسا دوسرا لیڈراس وقت پاکستان میں کوئی نہیں، یاسمین راشد نے کہا کہ عائشہ گلالئی کے پاس میسج آیاتھا تو اپنا بلیک بیری پہلے دے دیں۔
اسلام آباد : تحریک انصاف کے رہنما فواد چوہدری کہتے ہیں کہ بچوں نے پیسے کیسے کمائے شریف فیملی نہیں بتا سکی ، تاریخ میں پہلی بار نوازشریف اور ان کی فیملی کا ساٹھ دن میں احتساب ہوا۔ پاناما کیس عالمی سطح پر اٹھا پی ٹی آئی نے معاملہ نہیں اٹھایا۔
تفصیلات کے مطابق پی ٹی آئی رہنما فواد چوہدری نے سپریم کورٹ کے باہر میڈیا سے گفتگو میں کہا کہ تاریخ میں پہلی بار نوازشریف اور ان کی فیملی کا 60دن میں احتساب ہوا ، بچوں نے پیسے کیسے کمائے شریف فیملی نہیں بتا سکی ،کیس کی سماعت کےدوران شریف فیملی کےرازوں سے پردہ اٹھا۔
فواد چوہدری نے کہا کہ پانامااسکینڈل عالمی سطح پر اٹھا پی ٹی آئی نے معاملہ نہیں اٹھایا،لندن کی29ٹاپ پراپرٹی میں شریف فیملی کی پراپرٹی شامل ہے، وزیروں نے اقامے بنوائے اور پیسے منی لانڈرنگ کرکے باہر بھجوائے۔
تحریک انصاف کے رہنما کا کہنا تھا کہ پی ٹی آئی یا عمران خان کا نواز شریف سے کوئی ذاتی جھگڑا نہیں ،پاناما کیس 134 دن سپریم کورٹ میں چلا جس میں شریف خاندان کی کرپشن بے نقاب ہو گئی ہے، نواز شریف کے جانے سے جمہوریت کو کوئی خطرہ نہیں۔
انھوں نے مزید کہا کہ پی ٹی آئی نے قانون کی بالادستی کیلئے کوشش کی ہے اور ہماری محنت رنگ لانے والی ہے، آج پورے پاکستان کی نظر سپریم کورٹ ہے امید ہے آج انصاف جیتے گا۔
یاد رہے پاناما کیس کا فیصلہ محفوظ ہونے کے بعد تحریک انصاف کے رہنما فواد چوہدری کا کہنا تھا کہ آج پاکستان کی تاریخ کا بہت ہی اہم دن تھا، کیس اختتام کو پہنچا
انشا اللہ نوازشریف نااہل ہوں گے اور جیل بھی جائیں گے۔
پی ٹی آئی رہنما نے کہا تھا کہ نوازشریف نے ایف زیڈای کے ذرائع ظاہرنہیں کیے، نواز شریف کے بچے کیسے ارب پتی ہوئےنہیں بتایا گیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
اسلام آباد : تحریک انصاف کے رہنما فواد چوہدری کا کہنا تھا عمران خان نے منی ٹریل جمع کرادی ہے، عمران خان کا جرم زمین خریدنا نہیں بلکہ پاناما کا کیس کرنا ہے ، عمران خان کی طرح اگر کسی میں ہمت ہے تو منی ٹریل دے۔
تفصیلات کے مطابق پی ٹی آئی رہنما فواد چوہدری نے میڈیا دے گفتگو کرتے ہوئے کہا کہ سپریم کورٹ میں عمران خان کی پوری منی ٹریل پیش کی، سسیکس کی پوری منی ٹریل آج عدالت میں پیش کی گئی، عمران خان کی طرح اگر کسی میں ہمت ہے تو منی ٹریل دے، پاناما کا فیصلہ آنے کے بعد ن لیگ کی قیادت ردی کی ٹوکری میں جائے گی، دانیال عزیز اور طلال چوہدری کو وزیر بنانے کیلئے خصوصی دعائیں کیں۔
فواد چوہدری کا کہنا تھا کہ دیکھیں گے پاکستان میں اور کتنے لیڈر ہیں جو کچن کا حساب بھی دیں، دیکھتے ہیں اور کون سے لیڈر ہیں، جو بیرون ملک مہنگے ہوٹلز میں رہتے ہیں، عمران خان بیرون ملک کہیں بھی گئے پورا حساب پیش کیا ہے، عمران خان کے معاملے پر سپریم کورٹ کے احتساب کو سراہتے ہیں، چاہتے ہیں احتساب کا عمل اسی طرح جاری رہے۔
انھوں نے کہا کہ عمران خان کا جرم زمین خریدنا نہیں بلکہ پاناما کا کیس کرنا ہے ، کمائی حلال کی ہو تو پھر قطری خط یا جعلی دستاویزات کی ضرورت نہیں پڑتی، عمران خان نے بینکنگ ٹرانزیکشن سے کمائی ظاہر کی، ن لیگ کے چمچوں سے کہتا ہوں نوازشریف سے درخواست کریں، شردپوار سے نوازشریف کے اچھے تعلقات ہیں، آئی سی سی سے لیٹر نکلوالیں کہ عمران خان کرکٹر تھے بھی یا نہیں۔
جنگ اور جیو پر تنقید کرتے ہوئے پی ٹی آئی رہنما نے کہا کہ جنگ گروپ کا صحافی ایک دن خبر دیتا ہے اور اگلے دن معافی مانگتا ہے، جنگ گروپ کا صحافی خود ساختہ انویسٹی گیٹو رپورٹر بنا ہوا ہے، جنگ جیو کی خبروں کو شک کی نگاہ سے دیکھا کریں۔
فواد چوہدری کا کہنا تھا کہ جعلی وکیل کہتے ہیں اوورسیز پاکستانی شہری پاکستانی نہیں ہیں، جو بھی کہتے ہیں اوورسیزپاکستانی نہیں وہ خود پاکستانی نہیں ہیں، حکومت اوورسیز پاکستانیوں کی عزت نہیں کرسکتی تو کم ازکم توہین نہ کرے، اوورسیز پاکستانیوں کیخلاف اور عمران خان کا کیس ردی کی ٹوکری میں جائیگا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
اسلام آباد : تحریک انصاف کے رہنما فوادچوہدری کا کہنا ہے کہ آج پاکستان کی تاریخ کا بہت ہی اہم دن تھا، کیس اختتام کو پہنچا انشا اللہ نوازشریف نااہل ہوں گے اور جیل بھی جائیں گے۔
تفصیلات کے مطابق پی ٹی آئی کے ترجمان فواد چوہدری نے پاناما کیس کا فیصلہ محفوظ ہونے کے بعد میڈیا سے گفتگو میں کرتے ہوئے کہا کہ آج پاکستان کی تاریخ کابہت ہی اہم دن تھا،کیس اختتام کو پہنچا، واضح نہیں کہ 3رکنی بینچ فیصلہ سنائے گا یا5رکنی ، فیصلہ سنانے میں کتنا وقت لگے گا اندازہ ہی لگایا جاسکتا ہے، میرے خیال میں فیصلہ آئندہ ہفتے یا 10دن میں سنایا جائے گا۔
فوادچوہدری کا کہنا تھا کہ وزیراعظم نے قوم سے،ایوان سے اور عدالت سےجھوٹ بولا، عدالت میں ثابت ہواپاپابھی پاپی،پپوبھی پاپی اور سب پاپی ہیں، پاپ کرنے والے پاکستان کو لیڈ نہیں کرسکتے۔
پی ٹی آئی رہنما نے کہا کہ نوازشریف نے ایف زیڈای کے ذرائع ظاہرنہیں کیے، نواز شریف کے بچے کیسے ارب پتی ہوئےنہیں بتایاگیا، انشااللہ نوازشریف نااہل ہوں گےاورجیل بھی جائیں گے۔
اس سے قبل فواد چوہدری نے خبردار کیا کہ نوازشریف سے احتساب کا آغاز ہوا ہے، انجام بہت دور تک جائے گا، ہوسکتا ہے آج کیس کا آخری دن ہو، وزیراعظم کےپاس اب بھی وقت ہےاستعفیٰ دےدیں۔
رہنماپاکستان تحریک انصاف کا کہنا تھا کہ پاپابھی پاپی ہیں اورپپو بھی پاپی ہے، اصل کاروبار ان کا کرپشن تھا، موٹر وے کا کمیشن پاکستان سے باہر منتقل کیا گیا، ہم سیاسی طور پر پسماندہ نہیں ہیں، فوج عدلیہ کو ملوث کرنے کے بجائے وزیراعظم سیاسی طور پر سوچتے۔
فواد چوہدری نے پیپلز پارٹی پر تنقید کرتے ہوئے کہا کہ جو لوگ کیس کو عدالت لے جانے کے مخالف تھے وہ آج کریڈٹ لے رہے ہیں ، پیپلزپارٹی والے وہ ہیں، جو ٹورنامنٹ بھی نہیں کھیلا اور کپ لینے آگئے۔
یاد رہے گذشتہ روز بھی فواد چودھری کا کہنا تھا کہ عدالت نے خود کہا ہے کہ شریف فیملی کی جانب سے جعلی دستاویزات پیش کئے گئے ہیں اب ان پر476 اے کا مقدمہ بنتا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : پاکستان تحریک انصاف کے ترجمان فواد چوہدری نے کہا ہے کہ امید ہے جمعے تک کیس کا فیصلہ آجائے گا، شریف خاندان کے لیے جمعہ اختتامی دن ہوگا، پاپا کے پاپا بھی پاپی اور بچے بھی پاپی بس پاپا پاپی نہیں ہیں۔
تفصیلات کے مطابق سپریم کورٹ کے باہر میڈیا سے بات کرتے ہوئے پی ٹی آئی ترجمان فواد چوہدری کا کہنا تھا کہ شریف خاندان نے تمام اداروں میں جعلی کاغذات جمع کرائے خاص طور پر اسحاق ڈار نے، حکومتی وکلا کے پاس اب دلائل نہیں بچے، امید ہے جمعے تک کیس کا فیصلہ ہوجائے گا،شریف خاندان کے لیے جمعہ اختتامی دن ہوگا۔
فواد چوہدری نے کہا کہ ہمارے اضلاع کے اتنے بجٹ نہیں جتنے میں حسن نے گھر خریدا، پیسے نوازشریف کے نہیں تو بچے ہی بتادیں یہ کہاں سے آئے، حسن نواز نے انٹرویو میں کہا طالب علم ہوں میرے پاس پیسےنہیں اور کچھ عرصے بعد حسن نواز 13کمپنیوں کے مالک بن جاتے ہیں، حسن نواز 16 سال کی عمر میں ارب پتی بن گئے لیکن نواز شریف کو پتہ ہی نہیں چلا۔
پی ٹی آئی ترجمان کا کہنا تھا کہ شریف خاندان کے وکیل کہتے ہیں یہ جائیداد میاں شریف کی ہے، اسحاق ڈار کے اثاثوں میں اضافہ ہوا ہے کہتے ہیں بتا نہیں سکتا، ایک لیٹر جمع کرایا گیا اور کہا گیا ڈیڑھ ارب کی تنخواہ یو اے ای سے لی گئی، انہوں نے تمام اداروں کے پاس جعلی کاغذات جمع کرائے ہیں، عدالت نے جعلی کاغذات جمع کرانے کو شک کی نگاہ سے دیکھا۔
انھوں نے کہا کہ عدالت نے کہا ان کاغذات کا ٹریل بتائیں یہ کس کے پاس تھے، اسحاق ڈار کہہ رہے ہیں پاکستان میں صرف ایک لینڈ کروزر ہے، اسحاق ڈارکہتے ہیں دبئی میں ان کے پاس مہنگی ترین گاڑیاں ہیں، اسحاق ڈار کہتے ہیں ان کا شریف خاندان کی ٹرانزیکشنز سے تعلق نہیں، وکلا کے پاس دلائل نہیں، عدالت کے پاس ایک بجے تک وقت تھا، طارق حسن نے کچھ نہیں بتایا،سلمان اکرم راجہ نے وقت مانگ لیا۔
فوادچوہدری کا کہنا تھا کہ نوازشریف اور ان کے بچوں نے عدالت میں جھوٹ بولا، شریف خاندان کی جانب سے پیش کیا گیا مٹیریل جعلی تھا، نوازشریف نے بحیثیت وزیراعظم قوم اور اسمبلی سے جھوٹ بولا، اسحاق ڈار ہل میٹل کیس میں منسلک ہیں، اسحاق ڈار بھی اس کرپشن کی کہانی میں اہم کردارہیں ۔
انکا کہنا تھا کہ پورا ملک اس کیس کو دیکھنا چاہتا ہے، حکمران پوری قوم کو بے وقوف سمجھتے ہیں ، پاپا کے پاپا بھی پاپی اور بچے بھی پاپی بس پاپا پاپی نہیں ہیں ، اسحاق ڈار کے وکیل طارق حسن مشہور آدمی ہیں ، حکمرانوں کی جانب سے چن چن کر وکلا رکھے گئے ہیں، امید ہے کل تک دلائل کا معاملہ نمٹ جائے گا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : پاکستان تحریک انصاف کے ترجمان فواد چوہدری کا کہنا ہے کہ وزیراعظم نوازشریف کو اب معجزہ ہی نااہلی سے بچاسکتاہے، معاملہ نوازشریف اوران بچوں کی چودہ سال سزا تک جارہا ہے۔
تفصیلات کے مطابق پی ٹی آئی کے ترجمان فواد چوہدری نے سپریم کورٹ کے باہر میڈیا سے گفتگو کرتے ہوئے کہا کہ وزیراعظم کے وکیل نے مقدمہ نیب کورٹ کو بھیجنے کی بات کی، وزیراعظم نوازشریف کو اب معجزہ ہی نااہلی سے بچاسکتا ہے، نوازشریف کی نااہلی اب دیوار پر لکھی نظر آرہی ہے.
فواد چوہدری کا کہنا تھا کہ نوازشریف جب بھی اقتدار میں آئے ، جائیدادوں میں بے شمار اضافہ ہوا، نوازشریف کی گرینڈ گڈ بائی کیلئے پی ٹی آئی جشن کا اہتمام کرے گی، پی ٹی آئی اور پاکستان کے عوام جشن کی تیاری کریں۔
پی ٹی آئی کے ترجمان نے کہا کہ شریف خاندان نے کرپشن کرکے پیسہ لوٹا اور ملک سے باہر لےگئے، بنی گالہ سے جو جو سوال پوچھا گیا اس کا جواب دے رہے ہیں، عدالت میں تسلیم کیا ایف زیڈ ای کمپنی نوازشریف کی ہے،ان کے پاس اب کچھ نہیں، ٹائیں ٹائیں فش ہوگیا ہے۔
انھوں نے کہا لیگی رہنماؤں نے جھوٹ میں پی ایچ ڈی کررکھی ہے، عمران خان پر سیاسی احتجاج کا الزام ہے مگر وہ ان کا حق ہے، عمران خان اور پی ٹی آئی رہنماؤں کیخلاف دہشتگردی کے مقدمات بنائے جارہےہیں، سیاسی مخالفین کو تنگ کرنے کےلئے ایسے مقدمات بنائے جارہےہیں، پاکستان کی تاریخ سیاسی احتجاج سے بھری پڑی ہے۔
کیس نوازشریف اور مریم نواز کی چودہ چودہ سال سزا کی طرف جارہا ہے
سماعت مین وقفے میں پی ٹی آئی کے ترجمان فواد چوہدری نے میڈیا سے گفتگو کرتے ہوئے کہا تھا کہ شریف خاندان کے لیے سزائیں دیوار پر لکھی نظر آرہی ہیں، کیس یقیناً نوازشریف اور مریم نواز کی چودہ چودہ سال سزا کی طرف جارہا ہے۔
فواد چوہدری نے کہا کہ موٹو گینگ سپریم کورٹ کے باہر بڑی بڑی تقریریں کرتا ہے، شریف خاندان نے عدالت میں قطری خط کے بارے میں کچھ نہیں کہا، کہتے ہیں والیم 10کھولیں تو عدالت نے کہا والیم 10 میں کچھ نہیں،اگر والیم 10 کھلا تو اس کے بھی اثرات آئیں گے آپ چاہتے ہیں تو کھول دیتے ہیں، والیم دس کھلاتو اور بھی بہت سے انکشافات ہوں گے۔
انھوں نے کہا کہ جے آئی ٹی میں آڈیو اور ویڈیو ریکارڈ کے بارے میں بات نہیں ہورہی، کیپٹن صفدرکی آڈیو ویڈیو آنے پر ٹکٹس بلیک میں فروخت ہوں گی تو معلوم ہے پاکستان فلم انڈسٹری کو کتنا فائدہ ہوگا۔
تحریک انصاف کے ترجمان کا کہنا تھا کہ جے آئی ٹی نے1992 اور 1994میں ایف آئی آرز کھولنے کا مطالبہ کیا، شریف خاندان کے وکلانے ایف آئی آرز کھولنے پر اعتراض کیا ہے، ادارے شریف خاندان کے ماتحت ہیں تو تحقیقات شفاف نہیں ہورہی۔
انھوں نے کہا کہ نوازشریف نے جے آئی ٹی کے سامنے خالو کو پہچاننے سے انکار کردیا تھا، ایف زیڈ ای کمپنی کا اعتراف کرلیا گیا ، نوازشریف چیئرمین ہیں، مان لیا گیا اقامہ ایف زیڈای کمپنی کے نام پر حاصل کیا گیا۔
فواد چوہدری کا مزید کہنا تھا کہ پہلے بھی کہا تھا کہ ن لیگ کو منی لانڈرنگ کیلئے استعمال کیا گیا، لندن فلیٹس کیسے حاصل کیے گئے ابھی تک وضاحت نہیں کی گئی، کیلبری فونٹ کے معاملےپر کوئی تردید جاری نہیں کی گئی، شریف خاندان کیس میں تاخیری حربے استعمال کررہا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : ترجمان تحریک انصاف فوادچوہدری کا کہنا ہے کہ بھارتی اخبار کہتا ہے نوازشریف کو پاک فوج مخالف دیکھا جاتا ہے، بھارت چاہتا ہے نوازشریف اقتدارمیں ہی رہے، عمران خان کی نااہلی کسی صورت نہیں ہوگی۔
تفصیلات کے مطابق عمران خان نااہلی کیس کی سماعت کے بعد میڈیا سے بات کرتے ہوئے پاکستان تحریک انصاف کے ترجمان فواد چوہدری نے کہا کہ عمران خان کی نااہلی کسی صورت نہیں ہوگی انہوں نے کچھ نہیں کیا، مافیا کا مقابلہ کرنا آسان نہیں، ہماری ٹیم مقابلہ کررہی ہے، بنی گالہ کی منی ٹریل پیش کی،جمائما نے بھی ریکارڈ بھیج دیا، لندن اپارٹمنٹ کی خرید و فروخت کے ریکارڈ کا مطالبہ کیا گیا جو پیش کیا۔
فواد چوہدری کا کہنا تھا کہ پیسے حلال کے ہوں اور قطریوں کے نہ ہوں تو منی ٹریل مل جاتی ہے، عمران خان نے 1971سے ریکارڈ نکال لیا ہے، وہ بھی پیش کریں گے، سپریم کورٹ سوال پوچھتی ہے تو یہ ہمارا فرض ہے کہ جواب دیں، عوام کے مینڈیٹ کی بات کرنے والوں کا دامن صاف ہونا ضروری ہے۔
ترجمان پی ٹی آئی نے کہا کہ مسلم لیگ ن کے چمچوں نے جو الزامات لگائے اس کا جواب دے رہے ہیں، پاکستانی قانون کے مطابق لندن اپارٹمنٹ کو ڈکلیئرکرنا ضروری نہیں تھا، 1997 میں ضروری نہیں تھا کہ الیکشن کمیشن کے فارم میں اثاثے بتائیں، الیکشن کمیشن کے فارم میں اثاثوں کا خانہ2002 میں آیا۔
انکا کہنا تھا کہ لیگی رہنما وکیلوں سے مشاورت کے بعد میڈیا بریفنگ دیا کریں، ن لیگ کو بھی نیسکول نیلسن کی طرح منی لانڈرنگ کیلئے استعمال کیا گیا، سعدرفیق2سال سے اسٹے آرڈر پر وزارت ریلوے پر براجمان ہیں، سعدرفیق پر الزام ہے کہ انہوں نے پرائز بانڈ کے ذریعے پیسہ وائٹ کیا اور ریلوے کی زمینوں کو فروخت کررہےہیں۔
فواد چوہدری نے کہا کہ اسحاق ڈار کرپشن کرکےمنی لانڈرنگ کاپیشہ باہرلےجاتےہیں، مذہب کا لبادہ اوڑھ کر کرپشن کرنے والے سب سے خطرناک ہیں، اسحاق ڈار،بیرسٹر ظفر اللہ جتنےمذہبی بنتے ہیں، اتنےہی کرپٹ ہیں، مذہب کا لبادہ اوڑھنے والے کچھ ایسے صحافی بھی ہیں، جنہوں نے ملک کو نقصان پہنچایا۔
ترجمان تحریک انصاف کا کہنا تھا کہ پاناماکیس کا معاملہ گیم اوور ہے، غیریقینی صورتحال سے بچنے کیلئے استعفیٰ دینا چاہیے، مسلم لیگ ن کو بھی وزیراعظم سے متعلق سوچنا چاہیے، آئندہ ہفتے سے امید ہے پاکستان میں غیریقینی صورتحال ختم ہو جائے گی۔
بھارتی اخبار میں شائع ہونے والی خبر کے حوالے سے فواد چوہدری کا کہنا تھا کہ بھارتی اخبار کی خبر سے لگتا ہے نوازشریف کو پاک فوج مخالف دیکھا جاتا ہے، پاک فوج مخالف ہونے کی وجہ سے نوازشریف کا بھارت کو فائدہ ہوگا، بھارت چاہتا ہے نوازشریف اقتدار میں ہی رہے، بھارت کونوازشریف کے اقتدار میں رہنے سے فائدہ ہورہا ہے، مودی کے نوازشریف سےتعلقات کسی سے ڈھکے چھپے نہیں، بتایا جائے نوازشریف نے بھارت سے کیسے تعلقات رکھےہیں، یہ کیسی خبریں آرہی ہیں نوازشریف کے جانے کا بھارت کو نقصان ہوگا۔
ترجمان پی ٹی آئی کا کہنا تھا کہ انویسٹی گیشن رپورٹ کوتبدیل نہیں کیاجاسکتا، شریف خاندان کے خلاف کرمنل انکوائری چل رہی تھی، شریف خاندان کےخلاف کرمنل انکوائری کی رپورٹ بھی آچکی ہے، جھوٹی خبر لگاتے ہیں اور بعد میں معافیاں مانگتےہیں، جنگ گروپ کی جانب سے جھوٹی خبریں لگانے کا سلسلہ جاری ہے، جنگ گروپ جیسےادارے ملک کویرغمال بناناچاہتےہیں، معافی کافی نہیں،ایسی خبروں کا سخت نوٹس اور سرزنش کرنی چاہیے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
