اسلام آباد : پاکستان تحریک انصاف کے رہنما اور سابق وفاقی وزیر فواد چوہدری نے کہا ہے کہ ججز کسی کی بلیک میلنگ میں آئے بغیر آزادانہ فیصلے کریں، اس پر عمل کرانا عوام کا کام ہے، پورا پاکستان سپریم کورٹ کے پیچھے کھڑا ہے۔
اسلام آباد میں نیوز کانفرنس کرتے ہوئے فواد چوہدری نے کہا کہ امریکا کے چیف جسٹس نے کہا تھا کہ اگر ہم فیصلہ دیں اس پر عمل کرانا عوام کا کام ہے، آئین کو بچانے کی ذمہ داری صرف سپریم کورٹ نہیں عوام کا بھی فرض ہے۔
فواد چوہدری نے کہا کہ جب سپریم کورٹ کے حکم پر عمل نہیں ہوتا تو پھر آئین بھی نہیں رہتا پھر عوام سے بھری ہوئی سڑکیں اور گلیاں فیصلہ کرتی ہیں، لوگ نہیں نکلتے تو کسی حقوق پر بات کرنے کا حق نہیں، ہم نےاس تحریک کوایک سال سے لیڈ کیا ہے آگے بھی کرینگے۔
پی ٹی آئی رہنما کا کہنا تھا کہ ن لیگ کی داخلی سیاست مذاکرات کو نقصان پہنچا رہی ہے، مریم نواز گروپ کے خواجہ آصف، احسن اقبال اور جاوید لطیف اور دیگر اسحاق ڈار، سعد رفیق اور اعظم تارڑ کو غلط مشورے دے رہے ہیں۔
انہوں نے کہا کہ موجودہ آئین کے ہوتے ہوئے پنجاب کے انتخابات چودہ مئی سے آگے نہیں جا سکتے، اگر آپ آگے جاتے ہیں تو اس کے لیے آئینی ترمیم چاہیے اور چیف جسٹس نے کہا تھا کہ اگر آپ اس سے آگے جانا چاہتے ہیں تو پھر مذاکرات کرکے آئین میں ترمیم کرنی ہوگی کیونکہ موجودہ آئین میں آپ مقررہ تاریخ سے آگے نہیں جا سکتے۔
فواد چوہدری نے کہا کہ مسلم لیگ (ن) اور مریم نواز ان ججز کو اس لیے نشانہ بنا رہی ہے کہ قومی احتساب بیورو (نیب) ترامیم کے خلاف درخواست پر سماعت کرنے والی چیف جسٹس اور دو ججز پر مشتمل بینچ ٹوٹ جائے اور وہ اپنا فیصلہ نہ دیں۔
مسلم لیگ ن کی چیف آرگنائزر مریم نواز پر تنقید کرتے ہوئے انہوں نے کہا کہ کل مریم نواز نے معزز عدلیہ کو نشانہ بنایا، سپریم کورٹ کے8ججز ن لیگ کے نشانے پر ہیں، یہ تمام مہم صرف ایک مقصد کے تحت ہورہی ہے کہ چیف جسٹس کی سربراہی میں موجودہ تین رکنی بینچ تحلیل ہو، پاکستان میں96بارایسوسی ایشن سپریم کورٹ کے حق میں قرارداد پاس کرچکی ہیں۔
فوادچوہدری نے کہا کہ مریم نواز کہہ رہی ہیں کہ ان کے پاس اور بھی ویڈیوز ہیں، یہ وہ طوطا ہے جس میں شریف، زرداری فیملی کی جان پھنسی ہے کیونکہ اگر سپریم کورٹ نیب ترامیم کو کالعدم قرار دے گا تو ان کے 11 سو ارب روپے کے مقدمات پھر سے بحال ہو جائیں گے اس لیے ان ججز پر توجہ دی جا رہی ہے۔
انہوں نے کہا کہ رفیق تارڑ،ملک قیوم کے زمانے سےبینچ بنوانا ن لیگ کا پرانا وتیرہ ہے، ایون فیلڈ اور اپارٹمنٹ ہی پاناما کے ثبوت ہیں،اس وقت عدل کے ادارے سے مافیاز سے مقابلہ ہے، یہ تو سپریم کورٹ کو بم مارنا چاہتے ہیں، حکومتی پے رول پر وکلاء کی کوئی حیثیت نہیں۔
تحریک انصاف کا کہنا تھا کہ مریم نواز پی ٹی آئی چیئرمین عمران خان کی اہلیہ بشریٰ بی بی کو مسلسل تنقید کا نشانہ بنا رہی ہیں حالانکہ بشریٰ بی بی کبھی کسی سیاسی سرگرمی کا حصہ نہیں بنی سوائے اس کے کہ وہ غریبوں اور پناہ گاہوں کا دورہ کرتی ہیں، اس لیے بشریٰ بی بی کی طرف مریم کو قانونی نوٹس بھیجنے کا فیصلہ کیا گیا ہے اور ہم ان کے خلاف فوجداری مقدمہ درج کرنے جا رہے ہیں۔
فواد چوہدری نے کہا کہ پی ٹی آئی چیئرمین عمران خان کی اہلیہ بشریٰ بی بی کبھی کسی سیاسی سرگرمی کا حصہ نہیں بنی سوائے اس کے کہ وہ غریبوں اور پناہ گاہوں کا دورہ کرتی ہیں۔
انہوں نے کہا کہ پی ٹی آئی رہنما علی امین گنڈا پور اور حسان نیازی کی ضمانت ہوچکی ہے، اس کےباوجود رہنماؤں کو رہا نہیں کیا جارہا، سازش کے تحت عدالتی نظام کو ختم کیا جارہا ہے، تمام ادارے سپریم کورٹ کے احکامات کے پابند ہیں، عدالت صرف فیصلےنہ کرے، اپنے فیصلوں پرعملدرآمد بھی کروائے۔
