اسلام آباد: پاکستان تحریکِ انصاف نے قومی اسمبلی کے اسپیکر کے لیے پیپلز پارٹی کے امیدوار خورشید شاہ سے اسد قیصر کے حق میں دست بردار ہونے کی درخواست کر دی۔

تفصیلات کے مطابق پی ٹی آئی اور پیپلز پارٹی کے وفود کے درمیان ہونے والے مذاکرات میں تحریکِ انصاف نے خورشید شاہ سے درخواست کی کہ وہ پی ٹی آئی کے اسد قیصر کے حق میں دست بردار ہوجائیں۔

پی ٹی آئی کے ترجمان فواد چوہدری نے ملاقات کے بعد میڈیا سے گفتگو کرتے ہوئے کہا ’خورشید شاہ سے اسد قیصر کے حق میں دستبرداری کی درخواست کی ہے، پیپلز پارٹی سے کہا کہ وہ ہمیں ووٹ دے۔‘

فواد چوہدری نے کہا کہ ملاقاتوں کا مقصد پارلیمانی جماعتوں کا تعاون حاصل کرنا تھا، ہم نے پارلیمان کو مضبوط بنانا ہے، سب کو متحد ہو کر چیلنجز کا مقابلہ کرنا ہے۔

پی ٹی آئی ترجمان کا کہنا تھا کہ دنیا کے مختلف ممالک سے فون آ رہے ہیں، دنیا عمران خان کو عالمی لیڈر کی طرح دیکھ رہی ہے، سعودی ولی عہد شاہ سلمان نے بھی عمران خان کے لیے نیک تمناؤں کا اظہار کیا۔

نئے پاکستان میں نئی بات ہونی چاہیے، اسپیکر سینئر ترین پارلیمنٹیرین ہو، خورشید شاہ

فواد چوہدری نے مزید کہا کہ ہم نے ایم کیو ایم، بی این پی مینگل اور پی پی کے رہنماؤں کو تقریبِ حلف برداری میں شرکت کے لیے دعوت نامے دیے ہیں، عمران خان سوال جواب کے لیے خود پارلیمنٹ آئیں گے۔

دریں اثنا پی ٹی آئی کی جانب سے اسپیکر قومی اسمبلی کے منصب کے لیے نامزد امیدوار اسد قیصر نے بھی میڈیا سے گفتگو کی، انھوں نے کہا کہ آج ایم کیو ایم سمیت پارلیمانی رہنماؤں سے ملاقاتیں کی گئیں، چاہتے ہیں کہ پارلیمنٹ میں سیاسی جماعتیں عوامی توقعات پر پورا اتریں۔

نامزد اسپیکر قومی اسمبلی نے کہا کہ ملک کو سنجیدہ چیلنجز کا سامنا ہے، قومی ایجنڈے کو سامنے رکھ کر چیلنجز کا مقابلہ کریں گے اور قوم کو ایک نیا پاکستان بنا کردیں گے۔

اسلام آباد: پاکستان تحریک انصاف کے ترجمان فواد چوہدری نے کہا ہے کہ شہبازشریف کی پریس کانفرنس خفت مٹانے کی کوشش ہے۔

ان خیالات کا اظہار انھوں نے شہباز شریف کی پریس کانفرنس پر ردعمل دیتے ہوئے کیا۔ انھوں نے کہا کہ قوم نے چوروں کے لئے رچائے گئے تماشے سے اظہار لاتعلقی کر دیا۔

فواد چوہدری کا کہنا تھا کہ مجرم نوازشریف، مریم نواز ابوظہبی سے آ کر اڈیالہ پہنچ گئے، شہبازشریف چیئرنگ کراس پر بھنگڑوں سے لطف اندوز ہوتے رہے۔

انھوں نے کہا کہ شہبازشریف لالچ، دھمکیوں کے باوجود چار ہزارلوگ نہیں لاسکے، انھوں نے کل بڑے بھائی کو "نواز تیرے جانثار، سب فرار” کا پیغام دیا۔

فواد چوہدری نے کہا کہ شہباز شریف کی گفتگو شکست کا یقین چھپانے کی کوشش ہے، ملک میں پہلی بار شفاف انتخابات کے آثار پیدا ہوئے ہیں۔

پاکستان تحریک انصاف کے ترجمان نے کہا کہ شہبازشریف نےدھاندلی کا شورمچانا شروع کر دیا ہے، ایمپائرز سے مل کر کھیلنے والے میدان میں اترنے سے گھبرا رہے ہیں، العزیزیہ، فلیگ شپ ریفرنس میں شریفوں کا گھناؤنا چہرہ سامنے آئے گا۔

نواز شریف کا جیل میں ٹرائل کر کے انصاف کی دھجیاں اڑائی گئیں، شہباز شریف

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔