پشاور : سربراہ جے یو آئی مولانا فضل الرحمان نے کہا ہے کہ پاکستان سے شکست کے بعد مودی اور بھارت دنیا کو منہ دکھانے کے قابل نہیں رہا۔
پشاور میں میڈیا سے گفتگو کرتے ہوئے مولانا فضل الرحمان نے کہا کہ پاکستان کے جوابی وار کے بعد بھارت اور مودی کو ایسی شکست ہوئی کہ آج وہ دنیا کو منہ دکھانے کے قابل نہیں ہیں۔
انہوں نے کہا کہ ماضی میں بارہا کہہ چکا ہوں کہ اسرائیل اور بھارت ایک ہی منصوبے پر کام کررہے ہیں، آج کی صورتحال نے واضح کردیا کہ یہ دونوں ایک ہی ہیں۔
غزہ میں جاری اسرائیلی جارحیت میں اب تک 60ہزار فلسطینیوں بہن بھائیوں اور بچوں کی جانیں جاچکی ہیں، بین الاقوامی قوتوں کو پوچھنا چاہئے کہ بچوں کو مارنا کون سی انسانیت ہے۔
سربراہ جے یو آئی کا کہنا تھا کہ اس شاندار کامیابی پر بری فوج اور پاک فضائیہ کو مبارک باد پیش کرتا
ہوں، پوری پاکستانی قوم اپنی افواج کے ساتھ کھڑی ہے۔
مولانافضل الرحمان نے کہا کہ پہلگام واقعے میں عام شہریوں کو قتل کیا گیا جس پر پاکستان نے بھی تشویش و مذمت کا اظہار کیا اور بھارت نے واقعے کا مقدمہ بھی درج کیا، مودی نے اس واقعے کو ہندو مسلم تصادم کیلئے استعمال کیا لیکن ان کی عوام نے یقین نہ کیا۔
انہوں نے بھارتی وزیر اعظم کو مخاطب کرتے ہوئے کہا کہ مودی جی! آپ کشمیر میں اپنے لوگوں کو بھی سیکیورٹی فراہم نہیں کرسکے۔
فضل الرحمان نے کہا کہ سندھ طاس معاہدے میں عالمی بینک ثالث ہے، یہ معاہدہ کوئی ختم نہیں کرسکتا،
مودی سن لے ہم نے آپ کو 3 دریا دیے تھے اور دو ہمارے پاس تھے، اب ان شاء اللہ پانچوں دریا ہمارے پاس ہوں گے۔
سربراہ جے یو آئی کا کہنا تھا کہ آپ نے پاکستان پر حملہ کرکے تنازعات کو جنگ کے ذریعےحل کرنے کی کوشش کی جبکہ ہم نے تنازعات کے حل کے لئے پرامن راستہ اپنایا۔
پاک بھارت کشیدگی سے متعلق تمام خبریں
ان کا مزید کہنا تھا کہ اسرائیل نے بھارت کو جو اسلحہ اور بارود فراہم کیے تھے وہ پاکستانی افواج نے ہوا میں اڑا دئیے، اگر اب جارحیت کی گئی تو آپ 1راکٹ ماریں گے ہم100راکٹ ماریں گے، ہمارے دوستوں نے دوستی کا پورا حق ادا کیا۔
