اسلام آباد : وزیراعظم عمران خان نے وفاقی کابینہ کا اجلاس کل طلب کرلیا ، جس میں اپوزیشن کی تحریک سے نمٹنے اور کورونا صورتحال پر بھی بات چیت ہوگی۔
تفصیلات کے مطابق وزیراعظم عمران خان کی زیرصدارت وفاقی کابینہ کا اجلاس کل ہوگا، وفاقی کابینہ اجلاس کا 14 نکاتی ایجنڈاجاری کردیا گیا ہے۔
اجلاس میں ملکی سیاسی معاشی صورتحال کا جائزہ لیا جائے گا اوراپوزیشن کی تحریک سے نمٹنے اور کورونا صورتحال پر بھی بات چیت ہوگی۔
وفاقی کابینہ اجلاس میں اداروں میں اصلاحات سے متعلق کمیٹی سفارشات کی منظوری دی جائے گی جبکہ پبلک سیکٹرز کےسی اواور ایم ڈیز کی نشستوں پر تعیناتیوں کا فیصلہ کیا جائے گا۔
اجلاس میں جی 20 ممالک میں قرضوں کی ادائیگی میں توسیع سے متعلق اور بھارتی براڈکاسٹرز کو واجبات کی ادائیگی سے متعلق این او سی کے اجرا پر غور ہوگا۔
گذشتہ کابینہ کے اجلاس میں کورونا سے بچاؤ کی اشیا امپورٹ پر ڈیوٹی اور ٹیکس معافی سمیت کورونا سے بچاؤ، اسمگلنگ روک تھام آرڈیننس میں اختیارات کی فراہمی کی منظوری دی گئی تھی ۔
کابینہ نے پاکستان میڈیکل اتھارٹی کے قیام ، آن لائن ویزا سہولت کو مزید 16 ممالک تک بڑھانے اور اسلام آباد وائلڈلائف مینجمنٹ بورڈ کے چیئرمین کی تقرری کی منظوری بھی دی تھی۔
ذرائع کے مطابق پریس کونسل پاکستان کےممبران کا نوٹیفکیشن جاری کرنے کا معاملہ اور پاکستان ٹیلی ویژن کارپوریشن کے بورڈ آف ڈائریکٹرز کی تشکیل نوکا معاملہ مؤخر کردیا گیا تھا۔
اہم پبلک سیکٹرانٹرپرائزیز کے سی ای اوزکی تقرری پربریفنگ کابینہ ایجنڈا میں شامل تھی جبکہ کابینہ اقتصادی رابطہ کمیٹی کے 28 اکتوبر اور 4 نومبر کے فیصلوں کی توثیق کردی گئی۔
