اسلام آباد: وزیر اعظم محمد نواز شریف کی زیر صدارت وفاقی کابینہ کا اجلاس ہوا جس میں بجٹ تجاویز کی منظوری دے دی گئی۔
تفصیلات کے مطابق وفاقی کابینہ کا اجلاس وزیر اعظم نوز شریف کی زیر صدارت ہوا۔ اجلاس میں وزیر خزانہ اسحٰق ڈار نے فنانس ڈویژن کی کارکردگی سے متعلق بریفنگ دی۔
بعد ازاں وفاقی کابینہ نے بجٹ 18-2017 کی منظوری دے دی۔
اجلاس میں شنگھائی تعاون تنظیم کی مستقل رکنیت کے لیے طریقہ کار کی منظوری دی گئی جبکہ مقدمات نمٹانے سے متعلق کابینہ کمیٹی کی سفارشات کی بھی توثیق کردی گئی۔
شرکا نے پرائیوٹ پاور انفرا اسٹرکچر کے ایکٹ 2010 میں ترمیم کی منظوری دی، جبکہ توانائی کے بارے میں کابینہ کمیٹی اور اقتصادی رابطہ کمیٹی کے فیصلوں کی توثیق بھی کی گئی۔
تجاویز میں مجموعی ترقیاتی بجٹ 2113 ارب روپے رکھا گیا ہے۔ سالانہ ترقیاتی بجٹ کی مد میں 1001 ارب روپے رکھے گئے ہیں۔
صوبوں کا ترقیاتی بجٹ 1112 ارب روپے ہے جبکہ 168 ارب روپے غیر ملکی امداد سے حاصل کیے جائیں گے۔
وفاقی کابینہ کے اجلاس کے بعد وفاقی وزیر خزانہ اسحٰق ڈار پارلیمنٹ میں بجٹ 18-2017 پیش کریں گے۔
وفاقی کابینہ کے اجلاس سے قبل وزیر اعظم نے مسلم لیگ ن کی پارلیمانی پارٹی کے اجلاس کی بھی صدارت کی تھی جس میں حکومت کی جانب سے پیش کیے جانے والے آخری بجٹ پر تبادلہ خیال کیا گیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
