اسلام آباد (21 اگست 2025): حکومت طالب علموں کی مقروض نکلی، وفاقی کالج آج ایجوکیشن کے طلبہ کی جانب سے جمع کرائے گئے 13 ملین روپے یوٹیلٹی بلز کی مد میں خرچ کر دیے گئے۔
تفصیلات کے مطابق وفاقی کالج آف ایجوکیشن اسلام آباد کی سرکاری آڈٹ رپورٹ میں انکشاف ہوا ہے کہ طلبہ کی فلاح و بہبود کے لیے جمع کرائی گئی بھاری رقم سرکاری طور پر استعمال کیا گیا۔
آڈٹ رپورٹ کے مطابق حکومت نے وفاقی کالج آف ایجوکیشن اسلام آباد کے اسٹوڈنٹس فنڈ کے 12.9 ملین روپے خلاف ضابطہ خرچ کر ڈالے، اسٹوڈنٹس فنڈ سے کالج کی گاڑیوں میں خلاف ضابطہ پٹرول ڈلوایا جاتا رہا، بجلی، گیس اور انٹرنیٹ کے بل خلاف ضابطہ دیے گئے۔
محکمہ تعلیم کی جانب سے طلبہ کیلیے بھیجی گئیں کتابیں بارش کی نذر (ویڈیو)
رپورٹ میں کہا گیا ہے کہ طلبہ فنڈ سے آئیسکو، ایس این جی پی ایل، پی او ایل اور نیاٹیل کو بھی ادائیگیاں کی گئیں، طلبہ فنڈز سے یہ ادائیگیاں قواعد و ضوابط کے بر خلاف کی گئیں۔
آڈٹ رپورٹ میں یہ بھی کہا گیا ہے کہ 12.9 ملین روپے کی رقم 10 برس کے دوران بطور قرض لی گئی ہے، اور 12.9 ملین میں سے 7.9 ملین روپے واپس کیے گئے لیکن 5 ملین اب بھی بقایا ہیں۔