ARYNews.tv | Urdu – Har Lamha Bakhabar

Tag: FIA

  • خدمت خلق فاؤنڈیشن کے نام پر منی لانڈرنگ: ایف آئی اے نے گاڑیوں کی تفصیلات طلب کرلیں

    خدمت خلق فاؤنڈیشن کے نام پر منی لانڈرنگ: ایف آئی اے نے گاڑیوں کی تفصیلات طلب کرلیں

    اسلام آباد: وفاقی تحقیقاتی ایجنسی (ایف آئی اے) نے متحدہ قومی موومنٹ کے فلاحی ادارے خدمت خلق فاؤنڈیشن کی 48 گاڑیوں کی مکمل جانچ پڑتال کا فیصلہ کرتے ہوئے محکمہ ایکسائز کو خط لکھ دیا۔

    تفصیلات کے مطابق ایم کیو ایم کے فلاحی ادارے خدمت خلق فاؤنڈیشن پر منی لانڈرنگ کیس کے حوالے سے ایف آئی اے نے اہم پیشرفت دکھاتے ہوئے ادارے کی گاڑیوں کی مکمل جانچ پڑتال کا فیصلہ کیا ہے۔

    اس سلسلے میں ایف آئی اے انسداد دہشت گردی ونگ نے محکمہ ایکسائز کو خط لکھ کر ادارے کی 48 گاڑیوں کی تفصیلات طلب کی ہیں۔

    اپنے خط میں ایف آئی اے نے کہا ہے کہ فاؤنڈیشن کی گاڑیاں کس کے نام ہیں اس بارے میں تفصیلات دی جائیں۔ ایف آئی اے نے فاؤنڈیشن کی کسی بھی گاڑی کی ملکیت تبدیل کرنے سے بھی روک دیا ہے۔

    ایف آئی اے نے خط کی نقول انسداد دہشت گردی عدالت (اے ٹی سی) میں بھی جمع کروا دی ہیں۔

    خیال رہے کہ خدمت خلق فاؤنڈیشن کے نام پر اربوں روپے کی منی لانڈرنگ کا انکشاف کچھ عرصہ قبل ہوا تھا۔

    ایف آئی اے کی تحقیقات کے مطابق متحدہ قومی موومنٹ کے 50 سے زائد رہنما غیر قانونی ٹرانزیکشنز میں ملوث تھے۔ ادارے کے نام پر اربوں روپے کی رقوم منی لانڈرنگ کے ذریعے لندن بھجوائی گئیں۔

    بعد ازاں ایف آئی اے کے انسداد دہشت گردی ونگ نے 726 افراد کی فہرست جاری کی تھی جن سے مجموعی طور پر ایک ارب روپے جمع کرنے ہیں۔

    جاری کی جانے والی فہرست میں میئر کراچی وسیم اختر کا نام بھی شامل تھا۔ وسیم اختر کے علاوہ دیگر افراد میں قمر منصور، اشفاق منگی اور تنویر الحق تھانوی سمیت اہم نام شامل تھے۔

    کے کے ایف پر منی لانڈرنگ کا مقدمہ ضابطہ فوجداری کے تحت درج ہے۔

    ایف آئی اے کے مطابق منی لانڈرنگ کی تحقیقات مکمل ہوتے ہی ایم کیو ایم کے اہم رہنماؤں کی گرفتاری کی جائے گی۔

    3 جنوری کو ایف آئی اے نے فاؤنڈیشن کی ساڑھے 3 ارب روپے مالیت کی جائیدادیں بھی ضبط کرلیں تھی۔ ایف آئی اے کے مطابق فاؤنڈیشن کی جائیدادیں بھتے کی رقوم سے بنائی گئیں۔

  • سوشل میڈیا پر لڑکی کو بلیک میل کرنے والا ملزم سرعام ٹیم نے پکڑوادیا

    سوشل میڈیا پر لڑکی کو بلیک میل کرنے والا ملزم سرعام ٹیم نے پکڑوادیا

    لاہور : لڑکی کو محبت کا جھانسہ دے کر اس سے ذیادتی اور بلیک میلنگ کرنے والا ملزم سرعام کی ٹیم نے بے نقاب کردیا، ملزم نے لڑکی کے بھائی اور باپ کو بھی ویڈیوز بھیجیں۔

    تفصیلات کے مطابق معاشرے کی برائیوں ان میں ملوث افراد کو بے نقاب کرنے کیلئے ٹیم سرعام کی کاوشوں کا سلسلہ جاری ہے، پروگرام کے میزبان اقرار الحسن کی سربراہی میں سرعام کی ٹیم نے لاہور میں ظلم کی شکار متاثرہ لڑکی کی شکایت پر خفیہ طور پر کارروائی کرتے ہوئے اسے بلیک میل کرنے والے ملزم کو پکڑوادیا۔

    ملزم نے سوشل میڈیا پر ایک لڑکی سے محبت کی پینگیں بڑھائیں اسے بتایا کہ وہ پاک فوج میں افسر ہے، حالانکہ وہ ایک نجی ادارے میں چند ہزار روپے پر ملازم تھا۔

    چند ملاقاتوں کے بعد لڑکا اسے بہلا پھسلا کر ایک ہوٹل میں لے گیا اور اس کی ویڈیو بنالی، بعد ازاں اس ویڈیو کو بنیاد بنا کر اس نے لڑکی کو باقاعدہ بلیک میل کرنا شروع کیا اور اس سے رقم کا مطالبہ کرتا رہا، اور دھمکی دی کہ اگر پیسے نہ دیئے تو وہ تمام ویڈیوز انٹرنیٹ پر اپ لوڈ کردوں گا اور تمہارے گھر والوں کو بھی دکھا دوں گا۔

    لڑکی اپنے گھر والوں کی عزت بچانے کیلئے اس کی مکروہ خواہشات اور رقم کے مطالبات پورے کرتی رہی، ملزم نے اس پر ہی بس نہ کیا اور لڑکی کے باپ اور بھائی کو حقیقت بیان کرکے انہیں بھی بلیک میل کرتا رہا۔

    بعد ازاں تھک ہار کر لڑکی کے اہل خانہ نے ٹیم سرعام سے رابطہ کیا، جس پر سرعام کی ٹیم نے ایف آئی اے کے ہمراہ اپنے خفیہ انداز سے کارروائی کی اور اور ملزم کو رنگے ہاتھوں پکڑوادیا۔

    مزید تفصیلات ویڈیو میں ملاحظہ کریں۔

  • جعلی دستاویزات پر گاڑیاں فروخت کرنے والے دو ملزمان کو گرفتار

    جعلی دستاویزات پر گاڑیاں فروخت کرنے والے دو ملزمان کو گرفتار

    کراچی : انٹرنیٹ پر جعلی نمبر پلیٹس اور دستاویزات پر گاڑیاں فروخت کرنے والے دو ملزمان کو گرفتار کرکے مقدمہ درج کرلیا گیا۔

    تفصیلات کے مطابق ایف آئی اے سائبر کرائم سرکل نے فیڈرل بی ایریا میں کارروائی کرتے ہوئے انٹرنیٹ پرجعلی نمبرپلیٹ، دستاویزات پرگاڑیاں فروخت کرنے والے دو ملزمان کو گرفتار کرلیا۔

    ایڈیشنل ڈائریکٹر سائبر کرائم سرکل کا کہنا ہے کہ گرفتار ملزمان کے نام عمیر اور منظر ہیں، ایف آئی اے کے مطابق مذکورہ گروہ کئی شوروم مالکان کی ملی بھگت سے گاڑیاں فروخت کرتا تھا۔

    ملزمان سے جعلی دستاویزات پر فروخت گاڑیوں کا ڈیٹا حاصل کرلیا، ملزمان کے خلاف سائبرکرائم سرکل نے مقدمہ درج کرلیا ہے۔

  • ایف آئی اے کا چیف جسٹس آصف کھوسہ کے نام پرسوشل میڈیا پر جعلی اکاؤنٹس بنانے والوں کے گردگھیرا تنگ

    ایف آئی اے کا چیف جسٹس آصف کھوسہ کے نام پرسوشل میڈیا پر جعلی اکاؤنٹس بنانے والوں کے گردگھیرا تنگ

    اسلام آباد : ایف آئی اے سائبرکرائم نے چیف جسٹس آصف سعیدکھوسہ کےنام پرسوشل میڈیا پر جعلی اکاؤنٹس بنانے والوں کے گردگھیراتنگ کرلیا، چیف جسٹس نے سوشل میڈیا پر جعلی اکاؤنٹس والوں کیخلاف کارروائی کاحکم دیا تھا۔

    تفصیلات کے مطابق ایف آئی اےسائبرکرائم نے چیف جسٹس آصف سعیدکھوسہ کے نام پر سوشل میڈیا پر جعلی اکاؤنٹس بنانے اور چلانے والے ملزمان کے گرد گھیرا تنگ کرلیا ہے، ذرائع ایف آئی اے کا کہنا ہے کہ چیف جسٹس کے نام سے سوشل میڈیاپر5جعلی اکاؤنٹس ہیں، فیس بک اورپی ٹی اےسےملزمان کی شناخت کیلئے مددمانگ لی ہے۔

    [bs-quote quote=”چیف جسٹس کے نام سے سوشل میڈیاپر5جعلی اکاؤنٹس ہیں” style=”style-7″ align=”left” author_name=”ذرائع ایف آئی اے "][/bs-quote]

    ایف آئی اے سائبرکرائم سیل نے فیس بک اورپی ٹی اے سے ملزمان کی شناخت کے لئے مدد مانگ لی ہے، ملزمان تک رسائی کیلئے تحریری درخواست دی ہے۔

    یاد رہے جسٹس آصف کھوسہ کے چیف جسٹس کے حلف اٹھانے کے بعد ترجمان سپریم کورٹ کا کہنا تھا کہ چیف جسٹس پاکستان کاسوشل میڈیا پر کوئی اکاؤنٹ موجود نہیں، ٹوئٹر  یا فیس بک اکاؤنٹ جعلی ہے۔

    ترجمان نے کہا تھا کہ ایف آئی اے اور پی ٹی اے کو ایسے اکاؤنٹ بلاک کرنے کی ہدایات کردی گئیں ہیں جبکہ چیف جسٹس کے جعلی اکاؤنٹ بنانے والوں کے خلاف کارروائی کا حکم بھی دیا تھا۔

    مزید پڑھیں : چیف جسٹس آصف سعید کھوسہ کا سوشل میڈیا پر کوئی اکاؤنٹ نہیں، ترجمان سپریم کورٹ

    خیال رہے رہے 18 جنوری کو جسٹس آصف سعید خان کھوسہ نے ملک کے 26 ویں چیف جسٹس کے عہدے کا حلف اٹھایا تھا، صدر مملکت ڈاکٹرعارف علوی نے جسٹس آصف سعید کھوسہ سے چیف جسٹس آف پاکستان کے عہدے کا حلف لیا تھا۔

    چیف جسٹس آصف سعید کھوسہ نے حلف اٹھاتے ہی عدالت لگا کر ایک گھنٹے کے اندر پہلے مقدمے کا فیصلہ سناتے ہوئے منشیات کے کیس میں سزا یافتہ نور محمد کی سزا میں کمی کی درخواست مسترد کردی تھی۔

    اس سے قبل فل کورٹ ریفرنس سے خطاب میں جسٹس آصف سعید کھوسہ نے کہا تھا کہ زیر التوامقدمات کا قرض اتاروں گا، فوج اورحساس اداروں کاسویلین معاملات میں دخل نہیں ہوناچاہیئے، ملٹری کورٹس میں سویلین کاٹرائل ساری دنیا میں غلط سمجھا جاتاہے،کوشش کریں گےسول عدالتوں میں بھی جلد فیصلے ہوں۔

    چیف جسٹس آصف سعید کھوسہ کا کہنا تھا کہ بطور چیف جسٹس انصاف کی فراہمی میں تعطل دور کرنے کی کوشش کروں گا، جعلی مقدمات اور جھوٹےگواہوں کیخلاف ڈیم بناؤں گا۔

  • پی آئی اے میں کرپشن: ایف آئی اے نے دس سالہ رپورٹ پر تحقیقات شروع کردی

    پی آئی اے میں کرپشن: ایف آئی اے نے دس سالہ رپورٹ پر تحقیقات شروع کردی

    کراچی : پی آئی اے میں ہونے والی کرپشن کے معاملے پر ایف آئی اے نے تحقیقات شروع کردی، سات رکنی تحقیقاتی ٹیم دو ارب سے زائد فنڈز میں خرد برد کی انکوائری کرے گی۔

     تفصیلات کے مطابق ایف آئی اے نے سپریم کورٹ کے احکامات پر سرکاری آڈیٹرز کی مرتب کردہ پی آئی اے کی دس سالہ آڈٹ رپورٹ کے مختلف پیراز پر انکوائری شروع کر دی ہے، اسسٹنٹ ڈائریکٹرز، انسپکٹر اور سب انسپکٹرز پر مشتمل سات رکنی تحقیقاتی ٹیم تشکیل دے دی گئی۔

    انکوائری افسران کو تحقیقات کے لئے پی آئی اے ہیڈ آفس میں دفتر بھی فراہم کردیا گیا ہے، دفتر کی فراہمی سے درکار ریکارڈ اور متعلقہ افسران کی فوری دستیابی ممکن ہوگی، ٹیم کے مختلف افسران ہفتے میں پانچ روز پی آئی اے ہیڈ آفس میں بیٹھیں گے۔

    کراچی پی آئی اے کے شعبہ مارکیٹنگ، برانڈ اور دیگر محکموں میں مبینہ کرپشن کی گئی، انکوائری افسران 34 مختلف معاملات کی انکوائری اور رپورٹ مرتب کریں گے۔

    اس حوالے سے پی آئی اے کے بوئنگ 777 طیاروں کی اپ گریڈیشن کے لئے دو ارب سے زائد فنڈز میں خرد برد کی گئی تھی۔ ذرائع کا کہنا ہے کہ ایف آئی اے نے موجودہ ڈائریکٹر انجنیئرنگ کو ریکارڈ کے ساتھ طلب کر لیا جبکہ سابق ڈائریکٹر کو بھی دوبارہ طلب کیا گیا ہے۔

    پی آئی اے کا منی لانڈرنگ اوراسمگلنگ میں ملوث عملے کے خلاف سخت کارروائی کا فیصلہ

    ایف آئی اے کی جانب سے انکوائری میں کچھ روز قبل سابق ایم ڈی کا بیان بھی ریکارڈ کیا گیا، طیاروں کی اکانومی، بزنس کلاس اپ گریڈیشن کے لئے 2.4 ارب کے فنڈز 2017-18 میں جاری کئے گئے تھے۔

    فنڈز استعمال کے حوالے سے انکوائری سپریم کورٹ احکامات پر دس سالہ آڈٹ رپورٹ کے تناظر میں کی جارہی ہے، مذکورہ فنڈز بوئنگ 777 کی اکانومی اور بزنس کلاس نشستوں کی تبدیلی، ان فلائٹ سسٹم کی تنصیب کے لئے مختص تھے، وفاقی حکومت کے جاری کردہ فنڈز سے مبینہ طور پر ائر لائن کے قرضوں کی ادائیگی کی گئی۔

  • خدمت خلق فاؤنڈیشن کی ساڑھے 3 ارب روپے مالیت کی جائیدادیں ضبط

    خدمت خلق فاؤنڈیشن کی ساڑھے 3 ارب روپے مالیت کی جائیدادیں ضبط

    اسلام آباد: وفاقی تحقیقاتی ایجنسی (ایف آئی اے) نے متحدہ قومی موومنٹ کے فلاحی ادارے خدمت خلق فاؤنڈیشن کی ساڑھے 3 ارب روپے مالیت کی جائیدادیں ضبط کرلیں۔

    تفصیلات کے مطابق ایم کیو ایم کے فلاحی ادارے خدمت خلق فاؤنڈیشن پر منی لانڈرنگ کیس کے حوالے سے ایف آئی اے نے اہم پیشرفت دکھاتے ہوئے فاؤنڈیشن کی جائیدادیں ضبط کرلی ہیں۔

    ضبط کی جانے والی جائیدادوں کی مالیت ساڑھے 3 ارب روپے ہے۔ ایف آئی اے کا کہنا ہے کہ فاؤنڈیشن کی جائیدادیں بھتے کی رقوم سے بنائی گئیں۔

    خیال رہے کہ خدمت خلق فاؤنڈیشن کے نام پر اربوں روپے کی منی لانڈرنگ کا انکشاف 3 ماہ قبل ہوا تھا۔

    ایف آئی اے کی تحقیقات کے مطابق متحدہ قومی موومنٹ کے 50 سے زائد رہنما غیر قانونی ٹرانزیکشنز میں ملوث تھے۔ ادارے کے نام پر اربوں روپے کی رقوم منی لانڈرنگ کے ذریعے لندن بھجوائی گئیں۔

    بعد ازاں ایف آئی اے کے انسداد دہشت گردی ونگ نے 726 افراد کی فہرست جاری کی تھی جن سے مجموعی طور پر ایک ارب روپے جمع کرنے ہیں۔

    جاری کی جانے والی فہرست میں میئر کراچی وسیم اختر کا نام بھی شامل تھا۔ وسیم اختر کے علاوہ دیگر افراد میں قمر منصور، اشفاق منگی اور تنویر الحق تھانوی سمیت اہم نام شامل تھے۔

    کے کے ایف پر منی لانڈرنگ کا مقدمہ ضابطہ فوجداری کے تحت درج ہے۔

    ایف آئی اے کے مطابق منی لانڈرنگ کی تحقیقات مکمل ہوتے ہی ایم کیو ایم کے اہم رہنماؤں کی گرفتاری کی جائے گی۔

  • ایف آئی اے کے ہاتھوں چائلڈ پورنو گرافی میں ملوث ملزم گرفتار

    ایف آئی اے کے ہاتھوں چائلڈ پورنو گرافی میں ملوث ملزم گرفتار

    اسلام آباد: وفاقی تفتیشی ادارے (ایف آئی اے) کے سائبر کرائم سیل نے کارروائی کرتے ہوئے چائلڈ پورنو گرافی میں ملوث ملزم گرفتار کر لیا۔

    تفصیلات کے مطابق فیڈرل انوسٹی گیشن ایجنسی نے بچوں کے ساتھ جنسی زیادتی کی ویڈیوز بنانے میں ملوث ایک ملزم کو اسلام آباد سے گرفتار کر لیا ہے۔

    [bs-quote quote=”ملزم ویڈیوز سوشل میڈیا پر اپ لوڈ کرنے کی دھمکی دیتا تھا۔” style=”style-7″ align=”left” color=”#dd3333″][/bs-quote]

    حکام کا کہنا ہے کہ ملزم جنید زیادتی کے بعد بچوں کو بلیک میل کر کے پیسے بٹورتا تھا۔

    ایف آئی اے نے کہا ہے کہ ملزم جنید کے خلاف مقدمہ درج کر کے مزید تفتیش شروع کر دی گئی ہے۔

    اے آر وائی نیوز کے نمائندے ذوالقرنین حیدر کے مطابق ملزم جنید ویڈیو بنانے کے بعد بچوں کو دھمکی دیتا تھا کہ ویڈیو سوشل میڈیا پر اپ لوڈ کر دے گا۔

    متاثرہ بچوں کے والدین نے ایف آئی اے سے شکایت کی تو تفتیشی ادارے نے کارروائی کرکے ملزم جنید کو حراست میں لے کر مقدمہ درج کر لیا۔

    یہ بھی پڑھیں:  کراچی : چائلڈ پورنو گرافی کے الزام میں گرفتار ملزم کے دوران تفتیش انکشافات

    ایف آئی اے ملزم سے مزید تفتیش کر رہی ہے، تاہم یہ معلوم نہیں ہو سکا ہے کہ ملزم اکیلے اس جرم میں ملوث تھا یا اس کے مزید ساتھی بھی ہیں۔ ملزم نے تفتیش میں بتایا کہ وہ اکیلے یہ کام کرتا تھا۔

    یاد رہے کہ رواں ماہ کے آغاز میں کراچی سے بھی ایف آئی اے نے چائلڈ پورنو گرافی کے الزام میں ایک شخص کو گرفتار کیا تھا، ملزم کے بارے میں انکشاف ہوا کہ وہ لڑکی کے نام سے جعلی فیس بک آئی ڈی سے لڑکوں کو بھی بلیک میل کرتا تھا۔

    ملزم حمزہ گروپ اور اکاؤنٹس پر کم عمر بچوں کو ویڈیوز شیئر اور غیر اخلاقی عمل کے لیے اکساتا تھا۔ ملزم حمزہ اب تک کئی بچوں کی زندگیوں سے کھیل چکا ہے۔

  • طاہر محمود اشرفی کے اکاؤنٹس میں مشتبہ ٹرانزکشن، ایف آئی اے نے طلب کرلیا

    طاہر محمود اشرفی کے اکاؤنٹس میں مشتبہ ٹرانزکشن، ایف آئی اے نے طلب کرلیا

    لاہور  : چیئرمین علماء کونسل پاکستان حافظ طاہر محمود اشرفی کے اکاؤنٹس میں مشتبہ ٹرانزکشن کاانکشاف ہوا ہے، ایف آئی اے نے 26 دسمبر کو طلبی کا نوٹس بھجوادیا۔

    تفصیلات کے مطابق  ایف آئی اے انسداد دہشت گردی ونگ نے معروف مذہبی اسکالر اور چیئرمین علماء کونسل پاکستان حافظ طاہر محمود اشرفی کے بینک اکاؤنٹس میں مشتبہ ٹرانزکشنز میں انکشاف ہوا ہے جس کے مطابق مغربی ممالک سے ان کے اکاؤنٹس میں رقوم منتقل کی گئیں۔

    ایف آئی اے نے حافظ طاہر محمود اشرفی کو ان کے بینک اکاؤنٹس میں مشتبہ ٹرانزکشن کے الزام میں تفتیش کیلئے طلب کرلیا ہے۔

    اس حوالے سے ذرائع کا کہنا ہے کہ ایف آئی اے کی تحقیقات کا دائرہ کار مزید کئی اور اہم شخصیات تک پھیلایا جاسکتا ہے، تحقیقات ایف آئی اےانسداد دہشت گردی ونگ کررہا ہے، جس نے مزید تحقیقات کیلئے حافظ طاہر محمود اشرفی کو 26 دسمبر کو طلبی کا نوٹس بھی جاری کردیا ہے۔