کراچی: شہر قائد میں جعلی ڈالرز بھی فروخت ہونے لگے ہیں، ایف آئی اے نے ایک کارروائی میں جعلی ڈالر کی فروخت میں ملوث ملزم عبداللہ کو گرفتار کر لیا۔
ترجمان ایف آئی اے کے مطابق کمرشل بینکنگ سرکل کراچی کی ایک بڑی کارروائی میں جعلی ڈالر کی فروخت میں ملوث ملزم عبداللہ کو گرفتار کیا گیا ہے۔
ڈائریکٹر ایف آئی اے کراچی زون زعیم اقبال شیخ کی ہدایت پر ملزمان کی گرفتاری کے لیے کریک ڈاؤن جاری ہے، ڈپٹی ڈائریکٹر کمرشل بینکنگ سرکل کراچی علی مراد کی زیر نگرانی ایک چھاپہ مار کارروائی میں گرفتار ملزم عبداللہ سادہ لوح شہریوں کو کم قیمت کی آڑ میں جعلی ڈالر فروخت کرتا تھا۔
ترجمان نے بتایا کہ ملزم ڈالر کی فروخت کے لیے شہریوں سے پبلک مقامات پر ملاقات کرتا تھا، ملزم کے قبضے سے جعلی 1600 امریکی ڈالر برآمد کیے گئے ہیں۔ ملزم کے خلاف کارروائی ایک متاثرہ شہری کی درخواست پر عمل میں لائی گئی ہے۔
ملزم کی گرفتاری کے لیے تکنیکی وسائل کو بروئے کار لایا گیا، گرفتار ملزم سے تفتیش کا آغاز کر دیا گیا ہے، ترجمان کا کہنا ہے کہ دوران تفتیش مزید انکشافات متوقع ہیں۔
