لاہور: فٹبال کی دنیا کے سب سے بڑے ایونٹ فیفا ورلڈ کپ کی ٹرافی 3 فروری کو پاکستان لائی جائے گی۔
تفصیلات کے مطابق پاکستان فٹ بال فیڈریشن پرپابندی اورپاکستان کے 2018 کے فٹبال ورلڈ کپ میں کوالیفائی نہ کرنے کے باوجود ورلڈ کپ ٹرافی پاکستان لائی جارہی ہے۔
ذرائع کے کہنا ہے کہ فیفا ورلڈ کپ ٹرافی لاہور لائی جائے گی‘ جہا ں شہرکے دو یا تین مقامات پر اس کی تقریبِ رونمائی کا انعقاد ہوگا۔ پاکستان میں موجود شائقینِ فٹبال اس تاریخی ٹرافی کو دیکھنے کے لئے پرامید ہیں۔
یاد رہے فیفا ورلڈ کپ ٹرافی پہلی مرتبہ 1974 میں متعارف کرائی گئی تھی، جس کی تیاری میں خطیر رقم خرچ کی گئی تھی ، 18 قیراط سونے سے تیار کردہ ٹرافی کی لمبائی 36.8 سینٹی میٹر اور اس کا وزن 6.1 کلو گرام ہے۔
واضع رہے عالمی فٹبال ٹرافی کو پاکستان لانے میں پاکستان فٹبال فیڈریشن کا کوئی کردار نہیں بلکہ یہ ٹرافی فیفا اور اسپانسرز کے تعاون سے پاکستان لائی جارہی ہے جس کا مقصد پاکستان میں فٹبال جیسے عالمی کھیل کی پذیرائی کرنا ہے۔
فٹبال ٹرافی پاکستان لانے والے ایک اہلکار نے بتایا کہ ہم پاکستان میں فٹبال کو زندہ کرنا چاہتے ہیں اور ٹرافی لانے کا مقصد پاکستانی شائقین میں اس حوالے سے شوق پیدا کرنا ہے۔ خیال رہے کہ فیفا ورلڈ کپ 2018 روس میں کھیلا جائے گا جس میں دینا بھر سے 32 ٹیمیں حصہ لیں گی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
