فیفا ورلڈ کپ کا دوسرا سیمی فائنل آج دفاعی چیمپئن فرانس اور پہلی بار فائنل فور میں پہنچنے والی عرب مسلم ٹیم مراکش کے درمیان ہوگا۔
اے آر وائی نیوز کے مطابق قطر میں جاری فٹبال ورلڈ کپ کا رنگا رنگ میلہ اپنے اختتام کی جانب گامزن ہے اور آج دوسرا سیمی فائنل کھیلا جا رہا ہے جس میں دفاعی چیمپئن فرانس کا مقابلہ ٹورنامنٹ میں بڑے بڑے برج الٹ کر دنیا کو حیران کر دینے والے مراکش سے ہوگا۔
ایک جانب اگر دفاعی چیمپئن فرانس پھر فائنل میں پہنچنے کو بے قرار ہے تو ٹورنامنٹ میں بہترین کارکردگی کا مظاہرہ کرنے والی مراکش کی ٹیم بھی ہار ماننے کو تیار نہیں ہے۔
آج رات 12 بجے فرانس اور مراکش کی ٹیمیں جیت کے عزم کے ساتھ البیت اسٹیڈیم میں اپنا ایکشن شروع کریں گی۔
اگر بات کی جائے دونوں ٹیموں کے دو طرفہ مقابلوں کی تو یہاں فرانس کا کوئی مدمقابل نہیں کہ دونوں ٹیموں کے درمیان 7 انٹرنیشنل میچ ہوئے فرانس نے پانچ بار میدان مارا جب کہ میچ برابری کے فیصلے پر ختم ہوئے۔
لیکن جب میچ ہو تو سابقہ ریکارڈ نہیں ٹیم کا جوش وجذبہ دیکھا جاتا ہے جو مراکش ٹیم کے کھلاڑیوں میں کوارٹر فائنل میں رونالڈو کی پُرتگال کو پچھاڑنے کے بعد آسمان کی بلندیوں کو چھو رہا ہے جب کہ فرانس بھی مضبوط انگلینڈ کو ہرا کر سیمی فائنل میں آئی ہے۔
آج یہ دیکھنا ہوگا کہ مراکشی ٹیم ڈریم رن جاری رکھ پائے گی یا فرانس عرب ٹیم کا خواب توڑ کر فائنل کا ٹکٹ کٹائے گی۔
یاد رہے کہ مراکش کے گول کیپر یونس بونو اب تک مخالفین کے لیے سیسہ پلائی دیوار بنے ہوئے ہیں اور کوئی مخالف ان کے خلاف گول اسکور نہیں کر سکا ہے۔
مراکش کے یاسین بونو، گول کیپر یا سیسہ پلائی دیوار؟
اس سے قبل پہلے سیمی فائنل میں ارجنٹائن نے کروشیا کو شکست دے کر فائنل کے لیے کوالیفائی کرلیا ہے۔
میچ اے اسپورٹس اور اے آر وائی زیپ پر براہ راست دکھایا جائے گا۔
