فیصل آباد : پاکستان مسلم لیگ (ن) کی سینئر نائب صدر اور چیف آرگنائزر مریم نواز مسلم لیگ یوتھ ونگ کے کنونشن سے خطاب سے قبل کارکنان آپس میں لڑ پڑے۔
مسلم لیگ یوتھ ونگ کے کنونشن کا اہتمام ایک نجی ہوٹل میں کیا گیا تھا جہاں سیکیورٹی کے سخت انتظامات کیے گئے تھے۔
ن لیگ کے کارکنان یوتھ ونگ کے پروگرام میں اندر جانے کی اجازت نہ ملنے پر آپس میں لڑ پڑے، ہوٹل انتظامیہ نے لڑنے والے کارکنوں کو وہاں سے باہر نکال دیا۔
اس حوالے سے ذرائع کا کہنا ہے کہ مسلم لیگ یوتھ ونگ کے رہنما عثمان گجر اور ایم این اے خالد وڑائچ کے بیٹے کی آپس میں تلخ کلامی ہوئی تھی جس کے بعد عثمان گجر نے انہیں اندر جانے سے روکا تو بات لڑائی تک جا پہنچی۔
واضح رہے کہ مریم نواز گزشتہ روز فیصل آباد کے دور وزہ تنظیمی دورے پر پہنچی تھیں انہوں نے یکم فروری سے ملک گیر تنظیمی دوروں کا آغاز کیا تھا۔ وہ اس سے قبل بہاولپور، ملتان، ایبٹ آباد، اسلام آباد، راولپنڈی، سرگودھا اور ساہیوال ڈویژنز کے دورے کر چکی ہیں۔
یاد رہے کہ اس سے قبل گزشتہ ماہ ساہیوال میں مسلم لیگ (ن) یوتھ ونگ اور سوشل میڈیا ٹیم کا اجلاس بد نظمی کا شکار ہوگیا تھا، کارکن اور مریم نواز کی سیکیورٹی ٹیم میں دھکم پیل ہوئی اور نعرے بازی بھی کی گئی۔
مسلم لیگ (ن) کے ورکرز کنونشن میں لیگی کارکن اور مریم نواز کی سیکیورٹی ٹیم میں جھگڑا ہوگیا تھا، اجلاس میں "ورکرز کو عزت دو ” کے نعرے لگائے گئے۔
