نئی دہلی : بھارتی ریاست راجستھان میں معمول کی مشقوں کے دوران انڈین ایئر فورس کا لڑاکا طیارہ گر کر تباہ ہوگیا تاہم پائلٹ محفوظ رہا۔
بھارتی میڈیا رپورٹ کے مطابق حادثہ تیکنکی خرابی کے باعث پیش آیا، مگ 29 لڑاکا طیارہ راجستھان میں رات کے معمول کے تربیتی مشن کے دوران گر کر تباہ ہوا تاہم پائلٹ بحفاظت باہر نکلنے میں کامیاب ہوگیا۔
طیارے کے زمین پر گرتے ہی اس میں خوفناک آگ بھڑک اُٹھی اور دیکھتے ہی دیکھتے لڑاکا طیارہ جل کر خاکستر ہوگیا، پائلٹ نے پیرا شوٹ کی مدد سے طیارے سے چھلانگ لگائی۔
فوجی حکام نے بتایا ہے کہ لڑاکا طیارہ رات 10 بجے کے قریب رہائشی علاقے سے دور گر کر تباہ ہوا۔ بھاتی فضائیہ نے واقعے کی مکمل تحقیقات کیلئے انکوائری کمیٹی تشکیل دیدی ہے۔
واضح رہے کہ اس سے قبل رواں سال مارچ اور جون میں بھارتی فضائیہ کے دو طیارے بھی معمول کی مشقوں کے دوران حادثے کا شکار ہوکر تباہ ہوچکے ہیں۔
