کراچی : پاکستان فلم انڈسٹری کی معروف اداکارہ میرا نے تہلکہ خیز دعویٰ کیا ہے کہ ان میں غیبی طاقت کی بدولت پریوں اور جنات کو دیکھنے کی صلاحیت ہے۔
ایک ٹی وی انٹرویو میں انہوں نے بتایا کہ میرا تعلق ایک مذہبی گھرانے سے رہا ہے، میں بھی اوائل دور میں ٹوپی والا برقعہ پہنا کرتی تھی۔
نجی ٹی وی چینل کے کامیڈی شو میں گفتگو کرتے ہوئے انہوں نے کہا کہ ان کے دادا ایک حکیم اور بہت مذہبی آدمی تھے، ان کے پاس مؤکلوں کو قابو کرنے کی طاقت تھی اور لوگ ان کے پاس اپنی دعاؤں کے لیے آتے تھے اور ان کی دعائیں ہمیشہ پوری ہوجاتی تھیں۔
میرا نے مزید یہ دعویٰ بھی کیا کہ وہ اپنی دادی اور دادا کے پاس رہتی تھی اور ان کے پاس بھی اپنے دادا جیسی طاقت تھی، وہ پریوں یا مؤکلوں کو دیکھ سکتی تھیں جو ان کے دادا کے قابو میں تھے۔
واضح رہے کہ اداکارہ میرا پاکستان سمیت بھارتی فلموں میں بھی اپنی صلاحیتوں کا لوہا منوا چکی ہیں، اپنے کام اور نام کی بدولت 46 سالہ اداکارہ کا شمار آج بھی نامور اداکاراؤں میں کیا جاتا ہے۔
