ARYNews.tv | Urdu – Har Lamha Bakhabar

Tag: Financial loss

  • وزارت خزانہ نے جولائی تا اکتوبر معاشی رپورٹ جاری کردی

    وزارت خزانہ نے جولائی تا اکتوبر معاشی رپورٹ جاری کردی

    اسلام آباد : وزارت خزانہ کی جانب سے چار ماہ کی معاشی اپ ڈیٹ رپورٹ جاری کردی گئی ہے جس کے تحت مالیاتی خسارہ 804ارب روپے تک پہنچ گیا۔

    تفصیلات کے مطابق معاشی رپورٹ میں کہا گیا ہے کہ مالیاتی خسارہ84فیصد اضافے کے ساتھ 804ارب روپے تک پہنچ گیا، گزشتہ مالی سال مالیاتی خسارہ 438ارب روپے تھا۔

    رپورٹ میں کہا گیا ہے کہ ترقیاتی بجٹ میں کی فنڈنگ میں48فیصد کمی ہوئی،رواں مالی سال جولائی سے اکتوبر ترسیلات زر، بیرونی سرمایہ کاری میں کمی ہوئی۔

    وزارت خزانہ کے مطابق رواں مالی سال جولائی سے اکتوبر ترسیلات زر8.6 فیصد کم ہوئیں، گزشتہ جولائی سے اکتوبر ترسیلات زر10.8ارب، رواں سال 9.8ارب ڈالر رہیں۔

    جولائی سے اکتوبر کی برآمدات میں2.6فیصد اضافہ جبکہ درآمدات میں11.6فیصد کمی واقع ہوئی، ایف بی آر محصولات میں جولائی سے اکتوبر16.6فیصد کا اضافہ ہوا۔

    رپورٹ میں کہا گیا ہے کہ نان ٹیکس آمدن میں گزشتہ مالی سال اسی عرصے کی نسبت15.5فیصد کمی ہوئی، رواں مالی سال اکتوبر تک زرعی شعبے کو قرضوں میں31.5فیصد کا اضافہ ہوا۔

    وزارت خزانہ کے مطابق جولائی سے اکتوبر افراط زر کی شرح25.5فیصد اضافہ ہوا، اکتوبر2022میں مہنگائی کے بڑھنے کی شرح26.6 فیصد ریکارڈ کی گئی۔

  • ’ابتدائی سروے کے مطابق 102 ارب کا نقصان ہوچکا ہے‘

    ’ابتدائی سروے کے مطابق 102 ارب کا نقصان ہوچکا ہے‘

    پشاور: صوبہ خیبر پختونخواہ کے وزیر شوکت یوسف زئی کا کہنا ہے کہ ابتدائی سروے کے مطابق بارشوں اور سیلاب سے 102.3 ارب کا نقصان ہوا ہے، سوات میں 34 جاں بحق افراد کے خاندانوں کو 4 لاکھ روپے معاوضہ دیا گیا ہے۔

    تفصیلات کے مطابق صوبائی وزیر شوکت یوسف زئی کا کہنا ہے کہ ابتدائی سروے کے مطابق 102.3 ارب کا نقصان ہوا ہے، 1400 کلو میٹر سے زائد سڑکیں تباہ ہوئی ہیں، صوبے میں سیلاب اور بارشوں سے 289 اموات ہوچکی ہیں۔

    شوکت یوسف زئی کا کہنا تھا کہ سوات میں سب سے زیادہ 34 اموات ہوئی ہیں، جن کی اموات ہوئی ہیں ان کےخاندان کو 4 لاکھ روپے معاوضہ دیا گیا ہے، زخمی ہونے والے افراد کا معاوضہ 1 لاکھ 60 ہزار کر دیا گیا ہے۔

    انہوں نے کہا کہ وزیر اعلیٰ محمود خان نے شروع دن سے اپنا ہیلی کاپٹر مہیا کیا ہے، ہیلی کاپٹر سے بڑی تعداد میں لوگوں کو ریسکیو کیا گیا۔

    صوبائی وزیر کا کہنا تھا کہ وفاقی حکومت کے نمائندے صرف تصاویر بنوانے آئے، انہوں نے صرف ریلیف کی رقم کا اعلان کیا ہے۔

  • ایرو ناٹیکل چارجز کی مد میں سی اے اے کو اربوں روپے کا نقصان

    ایرو ناٹیکل چارجز کی مد میں سی اے اے کو اربوں روپے کا نقصان

    کراچی : عالمی پروازوں کی بندش کے معاملہ پر سول ایوی ایشن اتھارٹی کو ایرو ناٹیکل چارجز کی مد میں اربوں روپے کا نقصان برداشت کرنا پڑرہا ہے۔

    تفصیلات کے مطابق کورونا وائرس کی وجہ سے عالمی پروازوں کی بندش کا سلسلہ جاری ہے، اس حوالے سے ذرائع کا کہنا ہے کہ سول ایوی ایشن اتھارٹی کو ایرو ناٹیکل چارجز کی مد میں یومیہ ڈھائی سو ملین روپے نقصان کا سامنا کرنا پڑا۔

    ایوی ایشن ڈویژن کا کہنا ہے کہ سول ایوی ایشن اتھارٹی کی جانب سے جاری کردہ اعداد شمار کے مطابق مجموعی طور پر سی اے اے کا خسارہ 10ارب 5کروڑ روپے سے زائد تجاوز کرگیا۔

    رواں ماہ یومیہ اندازے کے مطابق 67کروڑ 50لاکھ سے زائد روپے نقصان ہوا، سی اے اے کو نقصان بین الاقوامی پروازوں کی بندش کی وجہ سے ایرو ناٹیکل چارجز کی مد میں ہوا۔

    سینئر جوائنٹ سیکریٹری ایوی ایشن ڈویژن عبدالستار کھوکھر نے اے آر وائی سے گفتگو کرتے ہوئے کہا کہ سی اے اے کو عالمی پروازوں کی بحالی تک مزید ڈھائی ارب روپے سے زائد کا ہر ہفتے نقصان کا سامنا ہے، اوور فلائنگ میں بھی کمی واقع ہوئی ہے۔

    یومیہ ایک ہزار سے زائد پروازیں پاکستان کی فضائی حدود سے گزرتی تھیں جو 22فیصد پر آگئی ہیں، اوور فلائنگ سے گزرنے والی فی کس فلائٹ پر ایک ہزار ڈالر کا نقصان ہورہا ہے، دنیا بھر میں90فیصد جہاز گراؤنڈ ہوگئے ہیں۔

    سول ایوی ایشن اتھارٹی کی جانب سے جاری کردہ اعداد شمار کے مطابق مارچ کے 15دنوں کے دوران کل خسارہ 59 کروڑ 89لاکھ 50 ہزار روپے کا ہوا تھا،16مارچ سے 31مارچ تک سی اے اے کو کل 3ارب ایک کروڑ نوے لاکھ 40ہزار روپے خسارہ ہوا تھا۔

  • پی آئی اے کا خسارہ گیارہ ماہ میں تاریخ کی بلند ترین سطح پر پہنچ گیا

    پی آئی اے کا خسارہ گیارہ ماہ میں تاریخ کی بلند ترین سطح پر پہنچ گیا

    کراچی : پی آئی اے کا خسارہ تاریخ کی بلند ترین سطح پر پہنچ گیا،11ماہ کے دوران قومی ائیرلائن کو 54ارب22کروڑروپے نقصان کا سامنا کرنا پڑا۔

    تفصیلات کے مطابق  باکمال لوگ لاجواب سروس کے دعویدار قومی ادارہ پی آئی اے نئے پاکستان میں بھی اربوں روپے کے خسارے سے دوچار ہے اس کے علاوہ اندرون اور بیرون ملک متاثر ہونے والے پی آئی اے کے فلائٹ شیڈول بھی مسافروں کیلئے درد سر بن گئے۔

    اے آر وائی نیوز نے قومی ایئرلائن کے مالی خسارے کے نتائج حاصل کرلیے۔ نواز لیگ کے دورحکومت میں سیاسی بھرتیوں کے ثمرات قومی ایئرلائن پر پڑںے لگے، پی آئی اے کا حالیہ خسارہ گیارہ ماہ میں تاریخ کی بلند ترین سطح پرپہنچ گیا۔

    گزشتہ گیارہ مہینے میں پی آئی اے کو54ارب22کروڑ روپے مالی خسارہ ہوا، پی آئی اے گزشتہ برس کی نسبت 13ارب روپے سے زائد کے خسارے میں دھنس گئی۔

    مالی رپورٹ کے مطابق11ماہ میں روپے کی قدر11فیصد گرنے سے نقصان ہوا، اس کے علاوہ ایندھن کی قیمتوں میں23فیصد اضافہ بھی خسارے کا سبب ہے۔

    قومی ادارے کی کارکردگی کا اندازہ اس بات سے بخوبی لگایا جاسکتا ہے کہ اس کا فلائٹ شیڈول بھی شدید متاثر ہوا ہے، کبھی لندن، کبھی جدہ تو کبھی سکھر جانے والی پروازوں کیلئے مسافرسرگرداں و پریشان دکھائی دیتے ہیں، اندرون اور بیرون ملک پروازوں کے شیڈول میں روز بروز تاخیر مسافروں کیلئے درد سر بن چکی ہے۔

    کراچی سے لندن جانے والی پی آئی اے کی پرواز پی کے787اچانک منسوخ کردی گئی، ااس حوالے سے ائیرپورٹ ذرائع کا کہنا ہے کہ طیارہ نہ ہونے کی وجہ سے پرواز کی چوبیس گھنٹے کیلئے روانگی میں تاخیر کی گئی ہے جبکہ لندن سے کراچی آنے والی پرواز788 بھی چوبیس گھنٹے کیلئے تاخیر کا شکارہے، مذکورہ پرواز اب جمعرات کو لندن سے کراچی کیلئے روانہ ہوگی۔