اسلام آباد: ورلڈ بینک نے پاکستان میں 3 منصوبوں کے لیے 435 ملین ڈالر فنانسنگ کی منظوری دی ہے، منصوبے سے سستی رہائش کی سہولت میسر آئے گی۔
تفصیلات کے مطابق ورلڈ بینک کے کنٹری ڈائریکٹر نجی بنحسین نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ ورلڈ بینک نے پاکستان میں 3 منصوبوں کے لیے 435 ملین ڈالر فنانسنگ کی منظوری دی ہے۔
ڈائریکٹر کا کہنا تھا کہ کم آمدنی والوں کے لیے ہاؤسنگ فنانس تک رسائی کو وسعت دیں گے، پنجاب میں منصوبے سے سستی رہائش کی سہولت میسر آئے گی۔
خیال رہے کہ 3 ماہ قبل گزشتہ برس دسمبر میں ورلڈ بینک نے پاکستان کے لیے 19 کروڑ 50 لاکھ ڈالر قرض کی منظوری دی تھی۔
مذکورہ رقم توانائی کے شعبوں میں اصلاحات اور بہتری کے لیے خرچ ہوگی جبکہ بجلی انفراسٹرکچر کی تقسیم کے سسٹم میں بہتری کے لیے رقم کا استعمال ہوگا۔
اس سے قبل پاکستان اور عالمی بینک کے درمیان 1.3 بلین ڈالر کے 7 منصوبوں کے لیے معاہدہ طے پایا تھا، منصوبوں کی تکمیل کے لیے عالمی بینک کی 128 ملین ڈالر کی گرانٹ شامل ہیں۔
منصوبوں میں سماجی تحفظ، موسمیاتی تبدیلی، زراعت، خوراک، گورننس اور انسانی وسائل کے ترقیاتی پروگرام شامل ہیں۔