Tag: FIR

نواز شریف اورشہباز شریف کیخلاف بند مقدمات کھول دیئے گئے

اسلام آباد : نیب نے وزیراعظم نواز شریف ، وزیراعلیٰ پنجاب شہاز شریف اور دیگر بااثر شخصیات کیخلاف تعطل کے شکار مقدمات پر تحقیقات کا دوبارہ آغاز کردیا ہے۔

تفصیلات کے مطابق نیب ایک بار پھر بااثر شخصیات کیخلاف سرگرم ہوگئی۔ وزیراعظم نوازشریف اوروزیراعلیٰ پنجاب شہبازشریف کے خلاف ایل ڈی اے پلاٹوں کی تقسیم کے معاملے کی تحقیقات کا دوبارہ آغازکردیا گیا ہے۔

وزیراعظم نوازشریف کے خلاف 12 اورشہبازشریف کے خلاف ایک مقدمہ کی تحقیقات تعطل کا شکارتھیں۔ ملک کی اہم شخصیات کی کرپشن کیخلاف اسد کھرل کی جانب سے سپریم کورٹ میں پٹیشن دائر کی گئی تھی۔

نیب کے دو جون کو سپریم کورٹ میں داخل کرائے گئے جواب میں بتایا گیا ہے کہ شریف برادران سمیت اہم شخصیات کیخلاف مقدمات دوبارہ کھول دیئے گئے ہیں۔

نوازشریف اور شہباز شریف کیخلاف جن مقدمات کی تحقیقات کا دوبارہ آغاز کیا گیا ہے ان مقدمات کو نواز شریف کی جلاوطنی کے بعد بند کردیا گیا تھا۔

جون 13, 2015
دو سیاسی گروپوں میں تصادم، چار افراد جاں بحق،لواحقین کا شدید احتجاج

ایبٹ آباد : دو سیاسی گروپوں کے درمیان تصادم چار افراد جاں بحق ایک شخص زخمی ہوگیا، جاں بحق اور زخمی افراد کو بے نظیر شہید اسپتال منتقل کردیا گیا۔

پولیس نے مقدمہ درج کرکے تفتیش شروع کر دی۔ تفصیلات کے مطابق دو روز قبل نواحی علاقہ نگکی میں پولنگ کے دوران دو سیاسی جماعتوں کے کارکنان کے درمیان جھگڑاہوا۔

جس پر آج ایک سیاسی جماعت کے امیدوار نے اپنے ساتھیوں سمیت فوراہ چوک میں دوسرے گروپ کے کارکنان کی موجودگی پر ہوٹل میں فائرنگ کردی جس کے نتیجے میں دو افراد موقع پر ہی جاں بحق جبکہ تین زخمی ہو گئے۔

زخمی افراد کو بے نظیر شہید اسپتال منتقل کیا گیا جہاں دوسرے دو افراد بھی دم توڑ گئے، نعشوں کا پوسٹ مارٹم جاری ہے جبکہ پولیس نے واقعہ کا مقدمہ بھی تھانہ کینٹ میں درج کر لیا ہے۔

جاں بحق افراد کے لواحقین نے فوراہ چوک پر نعشیں رکھ کر شدید احتجاج کیا، اور ضلعی انتظامیہ اور پولیس سے ملوث ملزمان کو فوری گرفتار کرنے کا مطالبہ کیا۔

احتجاج کے باعث شاہراہ قراقرم ٹریفک کیلئے مکمل بند کر دی گئی، ڈپٹی اسپیکر قومی اسمبلی مرتضیٰ جاوید عباسی جب فوراہ چوک سے گزرنے لگے تو مشتعل مظاہرین نے ان کی گاڑی کا گھیراؤ کر لیا اور حکومت کے خلاف شدید نعرے بازی کی۔

ڈپٹی اسپیکر قومی اسمبلی کو پولیس نے بڑی مشکل سے مظاہرین کے چنگل سے باہر نکالا اور مرتضیٰ جاوید عباسی کے گارڈزہوائی فائرنگ کرتے ہوئے فرار ہوئے۔

مظاہرین نے ملزمان کے ساتھ ڈپٹی اسپیکر قومی اسمبلی کے خلاف مقدمہ درج کرنے کا مطالبہ کیا، ڈی پی ایبٹ آباد شیر اکبر خان خان خود موقع پر پہنچے اور مظاہرین کو مقدمہ درج کرنے کی یقین دھانی کروائی۔

جون 2, 2015
عذیر بلوچ کو بھاگنے نہیں دیں گے، چودھری نثارعلی

راولپنڈی : وفاقی وزیر داخلہ چودھری نثارعلی خان نے کہا ہے کہ لیاری گینگ وار کا مرکزی کردار عزیر بلوچ حکومت کی نظر میں ہے،اسے بھاگنے نہیں دیں گے۔

انہوں نے کہا کہ معظم علی خان اور حماد صدیقی کے بارے میں اہم حقائق قوم کے سامنے جلد لائیں گے،ان کا مزید کہنا تھا کہ ایگزیکٹ کے خلاف مزید ایف آئی آر کٹ سکتی ہیں۔

تفصیلات کے مطابق وزیر اعظم نواز شریف سے ناراضگی دور ہوتے ہی وزیر داخلہ چودھری نثار علی خان ایک بار پھر سرگرم ہو گئے۔

راولپنڈی کے قریب ایک تقریب سے خطاب کرتے ہوئے انہوں نے کہا کہ ایک سال کے دوران کراچی میں امن و امان کی صورتحال بہتر ہو گئی ہے، تاہم ڈیڑھ کروڑ کی آبادی میں حالات بہتر بنانے میں وقت لگے گا۔

تقریب سےقبل غیر رسمی گفتگومیں ان کا کہنا تھا کہ لیاری گینگ وار کا سربراہ عذیر بلوچ ان کی نظر میں ہے اسے بھاگنے نہیں دیں گے۔

چوہدری نثار کا کہنا تھاکہ وہ عذیر بلوچ اور حماد صدیقی کے حوالے سے آئندہ چند دنوں میں اہم معاملات سامنے لائیں گے، ان کا کہنا تھا کہ معظم علی کے معاملے پر پاکستان اور برطانیہ کے درمیان معاملات طے ہوگئے ہیں جن پر جلد پیش رفت ہوگی۔

وزیر داخلہ نے کہا کہ جلعی ڈگریوں کے مسئلہ پر ایگزیکٹ سےمتعلق معلومات کیلئےبرطانیہ اور ایف بی آئی کو مدد کیلئےخط لکھا ہے، جلد متحدہ عرب امارات کوایگزیکٹ سےمتعلق خط لکھاجائےگا۔

چوہدری نثار نے کہا کہ بول کےملازمین کو ہراساں کرنے کی ہدایت نہیں کی گئی، انہوں نے بتایا کہ ایگزیکٹ سےمتعلق شواہد ملنےکےبعد مزید ایف آئی آرز کا اندراج ہوسکتاہے۔

مئی 29, 2015
میرشکیل کےخلاف غداری کامقدمہ درج کرنےکی درخواست دائر

لاہور : جیوجنگ کے مالک میر شکیل کے خلاف غداری کا مقدمہ درج کرنے کے لیے لاہور ہائی کورٹ میں درخواست دائر کر دی گئی۔

درخواست سردار آفتاب ورک ایڈووکیٹ کی جانب سے دائر کی گئی۔ درخواست میں کہا گیا کہ جیو نے حساس ادارے اور اس کے سربراہ کے خلاف جھوٹا پروپیگنڈہ کر کے ملک کے خلاف سازش کی ۔

درخواست میں مزید کہا گیا کہ قومی سلامتی کے ادارے کو بدنام کرنے کی کوشش کی ۔ پیمرا نے اس پر کسی بھی قسم کی کارروائی نہیں کی۔

چیئرمین پیمرا بھی اس پورے معاملے میں قصوروار ہیں۔ عدالت میر شکیل الرحمان کے خلاف غداری کا مقدمہ درج کرنے اور چیئرمین پیمرا کے خلاف سخت کارروائی کا حکم دے ۔ درخواست کی سماعت پانچ جون کوہوگی ۔

مئی 27, 2015
کراچی : فائرنگ کے مختلف واقعات میں5افرادقتل

کراچی: شہر قائد میں فائرنگ کے مختلف واقعات میں باپ بیٹے سمیت پانچ افراد جاں بحق اور ایک زخمی ہوگیا۔

پولیس کے مطابق ملیر 15 کے علاقے میں خیبر ہوٹل کے قریب نامعلوم مسلح افراد نے فائرنگ کردی جس کے نتیجے میں تین افراد جاں بحق ہوگئے، جاں بحق ہونے والے عبدالوہاب اور فرمان باپ بیٹا ہیں جبکہ تیسرا جاں بحق ہونے والا شخص عظمت عبدالوہاب کا بھائی بتایا جاتا ہے۔

لیاقت آباد میں فائرنگ سے پچیس سالہ نوجوان جان سے گیا۔ دوسری جانب میٹھا در کے علاقے میں نامعلوم افراد نے دفتر میں فائرنگ کردی جس کے نتیجے میں پچاس سالہ ملک عباس نامی شخص موقع پر ہی دم توڑ گیا، پولیس کاکہنا ہے کہ واقعے کی تحقیقات کی جارہی ہے ۔

مئی 22, 2015
سانحہ صفورہ کی ایف آئی آر دو روز بعد درج

کراچی: سانحہ صفورہ میں 47 افراد کے جاں بحق اور 13 کے زخمی ہونے کے واقعے کی ایف آئی درج کرلی گئی ہے۔

تفصیلات کے مطابق ایف آئی آرکا اندراج واقعے کے اڑتالیس سے زائد گھنٹے گزرجانے کے بعد کیا گیا۔

ایف آئی آر سچل تھانے میں درج کی گئی اور درج کرنے کے بعد اسے سربمہرکردیا گیا۔ ایف آئی آر سرکار کی مدعیت میں درج کی گئی ہے۔

ایس ایس پی ملیر کا کہنا ہے کہ ایف آئی آر میں درج حساس نوعیت کے مندراج کے باعث اسے سر مبہر کیا گیا ہے۔

ان کا کہنا تھا کہ دہشت گردی کے اس واقعے کے متعلق کچھ ایسے ثبوت ملے ہیں جنہیں فی الحال منظرِعام پر نہیں لایا جاسکتا۔

واضح رہے کہ دوروزقبل صفورہ چورنگی پرموٹرسائیکل سوارچھ نامعلوم افراد نے الاظہر گارڈن کی بس پرفائرنگ کردی تھی، جس کے نتیجے میں اسمعیلی کمیونٹی سے تعلق رکھنے والے 47افراد جاں بحق جبکہ 13 افراد زخمی ہوگئے تھے، زخمیوں کو مختلف اسپتالوں میں منتقل کیا گیا تھا، بس میں خواتین اور بچے بھی سوار تھے۔

مقتولین کی نمازِجنازہ الاظہرگارڈن میں ادا کی گئی جبکہ تدفین سخی حسن میں واقع اسماعیلی قبرستان میں کی گئی۔

واقعے کے بعد سیاسی اور ملٹری قیادت کی جانب سے سندھ انتظامیہ اور قانون نافذ کرنے والے اداروں کو جلداز جلد ملزمان کو کیفرِ کردار تک پہنچانے کی ہدایت کی گئی تھی۔

مئی 15, 2015
سسرالیوں کے ہاتھوں جلنے والی خاتون دوران علاج چل بسی

لاہور : سسرالیوں کے ہاتھوں جلائی گئی جواں سالہ صدف دم توڑ گئی۔ پولیس نے مقدمہ درج کر کے صدف کے شوہر ملک علی کے دو بھائیوں عارف اور بابر کو گرفتار کر لیا۔

مرنے سے پہلے صدف نے شوہر اور سسرالیوں کو ذمہ دار ٹھہرایا تھا۔ تفصیلات کے مطابق معمولی سی گھریلو ناچاقی پر شوہر نے اپنی بیوی کی جان ہی لے لی۔

لاہور میں چند روز قبل سسرالیوں کے مبینہ تشدد کے بعد جلائی جانیوالی صدف دم توڑ گئی۔ صدف موت سے پہلے اپنے ویڈیو بیان میں شوہر اور سسرالیوں کو موت کا ذمہ دار ٹھہرا گئی۔

صدف نے ویڈیو بیان میں بتایا تھا کہ اُس پر بد ترین تشدد کیا گیا تھا, صدف کے اہل خانہ نے پنجاب اسمبلی کے باہرمیت رکھ کر احتجاج کیا۔

صدف کی ماں کا کہنا تھا بیٹی پر شوہر اور سسرالی بے پناہ تشدد کرتے تھے، صدف کے بھائی کا کہنا ہے اس کی مقتول بہن کو انصاف دلایا جائے۔

پولیس نے مقدمہ درج کر کے صدف کے شوہر ملک علی کے دو بھائیوں عارف اور بابر کو گرفتار کر لیا۔ جبکہ صدف کا شوہر فرار ہو گیا ہے۔

مئی 3, 2015
ذوالفقارمرزا کی گرفتاری کیلئے اعلیٰ پولیس افسران بدین پہنچ گئے

بدین : ذوالفقار مرزا کی گرفتاری کیلئے ٹھٹھہ، حیدرآباد،میرپورخاص کے ایس ایس پیز بدین پہنچ گئے۔واٹر کینن،بکتر بند گاڑیاں بھی طلب کرلی گئیں۔

واضح رہے کہ سندھ کے سابق وزیرداخلہ ذوالفقار مرزانے بدین میں تھانے پردھاوا بول دیا تھا۔ مسلح ساتھیوں کےساتھ بازار بھی بند کرادیا۔ پولیس گرفتاری کےلئے چھاپےماررہی ہے،آٹھ ساتھیوں کوحراست میں لے لیا گیا ہے۔

سابق وزیر داخلہ سندھ ذوالفقارعلی مرزا بندوق برداروں کے ہمراہ بدین کی سڑکوں پرگشت کرتے رہے۔ مسلح حامیوں کوساتھ لے کردندناتے ہوئےپولیس تھانےمیں گھس گئے۔

باریش ڈی ایس پی کوڈراتےدھمکاتےرہے، مکا مارکرمیزپررکھا شیشہ بھی توڑ ڈالا سابق وزیرداخلہ سخت طیش میں تھے۔ ایک موقع پرڈی ایس پی عبدالقادرسموں کوبازوسےپکڑ کرگھسیٹااوراس کاموبائل دیوارپردے مارا۔

ذوالفقارمرزا کااصرارتھا کہ ساتھیوں کواغواکرنےکی کوشش کرنے پرپولیس اہلکاروں کےخلاف پرچہ درج کیا جائے۔ اس سےپہلےسابق وزیرداخلہ نےمسلح ساتھیوں کےہمراہ بدین میں مخالفین کی دکانیں بندکرادیں۔

ذوالفقارمرزاکےخلاف تھانےپرحملےاورشہریوں کوحراساں کرنے کے مقدمات درج کرلئےگئے۔ پولیس گرفتاری کےلئے چھاپے ماررہی ہے۔

حیدرآبادسےمزید نفری بھی طلب کرلی گئی۔ آخری اطلاعات کےمطابق ان کےآٹھ ساتھیوں کوگرفتارکرلیا گیا۔

مئی 3, 2015
بدین : ذوالفقارمرزاکے خلاف ساتھیوں سمیت تھانے پرحملےکا مقدمہ درج

بدین : ذوالفقار مرزا کے خلاف بدین پولیس تھانے پر حملے کا مقدمہ درج کر لیا گیا ہے۔پولیس نے دہشت گردی، سرکاری املاک کو نقصان پہنچانے اور ڈی ایس پی کو ہراساں کرنے کے مقدمات درج کر لئے۔

تفصیلات کے مطابق سابق صوبائی وزیر داخلہ اور پیپلز پارٹی کے سابق رہنماء ذوالفقار مرزا اور ان کے اکیس ساتھیوں کے خلاف بدین تھا نے کا گھیراؤ کرنے اور تھانے میں گھس کر ہنگامہ آرائی کرنے پر تاجر رہنما امتیاز میمن کی شکایت پر ایف آئی آر درج کر لی گئی۔

سابق وزیر داخلہ سندھ ذوالفقار مرزا بدین میں ساتھیوں سمیت تھانے پر چڑھ دوڑے۔ پہلے ڈی ایس پی اور اہلکاروں کو دھمکایا، پھر زبردستی دکانیں بند کرا دیں۔

قبل ازیں ماڈل ٹاؤن پولیس نے ذوالفقار مرزا کے ساتھی ندیم مرزا کو کار چوری کے الزام میں پکڑا تو سابق صوبائی وزیر داخلہ آپے سے باہر ہو گئے۔

درجنوں ساتھیوں اور مسلح گارڈز کے ہمراہ پہلے تھانے پہنچے اور بات نہ ماننے پر ڈی ایس پی عبدالقادر سموں کو دھمکاتے رہے۔

تلخ کلامی کی پھر میز کا شیشہ اور ڈی ایس پی کا موبائل بھی توڑ دیا۔ تھانے میں غصہ ٹھنڈا نہ ہوا تو ذوالقفار مرزا نے اسلحہ اور ڈنڈا بردار ساتھیوں سے مل کر زبردستی دکانیں بند کرا دیں۔ ڈی ایس پی عبدالقادر سموں کے مطابق دکانیں بند کرانے کے دوران فائرنگ بھی کی گئی جس میں ایک شخص کے زخمی ہونے کی بھی اطلاع ہے۔

ماڈل ٹاؤن پولیس نے ملزمان کی گرفتاری کے لئے چھاپے مارنا شروع کردیئے ہیں، تاہم موصول ہونے والی اطلاعات کے مطابق اب تک کوئی گرفتاری عمل میں نہیں آئی ہے۔

ذوالفقار مرزا اور ان کے ساتھیوں کیخلاف تھانے کا گھیراؤ اور تھانے میں گھس کر ہنگامہ آرائی کرنے کا الزام ہے۔

مئی 3, 2015
پروفیسروحید الرحمان کے قتل کا مقدمہ درج، فائرآفیسر فائرنگ سے ہلاک

کراچی : پولیس نے دستگیر میں جامعہ کراچی کے اسسٹنٹ پروفیسر ڈاکٹر وحید الرحمان کو دن دہاڑے قتل کا مقدمہ درج کرلیا ہے، لانڈھی جیل سے سول اسپتال منتقل کیے جانے والا زخمی قیدی بھی دوران علاج دم توڑ گیا۔

پرانی سبزی منڈی کے قریب فائرافسر کو قتل کردیا گیا۔ پولیس کے مطابق دستگیر کے علاقے میں آج صبح ڈاکٹر سیدوحیدالرحمان کو اس وقت نشانہ بنایا گیا جب وہ جامعہ کراچی جانے کے لئے اپنے گھر سے نکلے ہی تھے۔

پوسٹ مارٹم رپورٹ کے مطابق ڈاکٹر وحید کو بازو، سر،گردن، کاندھے اور پیٹ میں پانچ گولیاں لگیں جس سے وہ موقع پر ہی دم توڑ گئے۔

واقعے کا مقدمہ پوسف پلازہ تھانے میں ڈاکٹر وحید الرحمان کے رشتے دار کی مدعیت میں درج کرلیا گیا ہے ۔ دوسری جانب پرانی سبزی منڈی کے قریب نامعلوم افراد کی فائر نگ سے کار میں سوار ایک شخص جان کی بازی ہار گیا۔

مقتول کی شناخت غلام فرید کے نام سے ہوئی ہے جو لانڈھی فائر اسٹیشن کا فائر افسر تھا۔ لانڈھی جیل سے سلیم نامی قیدی کو تشویشناک حالت میں سول اسپتال منتقل کیا گیا تھا جو دوران علاج چل بسا۔

اپریل 29, 2015