اسلام آباد : مشیر اطلاعات فردوس عاشق اعوان نے کہا ہے کہ پاکستان کشمیر سے متعلق اپنے مؤقف سے پیچھے نہیں ہٹے گا، کسی بھی صورتحال میں لچک نہیں دکھائیں گے، وسائل کی غیر منصفانہ تقسیم مسائل کا سبب ہے۔
ان خیالات کا اظہار انہوں نے اسلام آباد میں ہریس کانفرنس سے خطاب کرتے ہوئے کیا۔فردوس عاشق اعوان نے کہا کہ وزیراعظم عمران خان نے مسئلہ کشمیر پر وفاقی کابینہ کو خطے کی صورتحال سے آگاہ کیا۔
مسئلہ کشمیر کے تناظر میں مختلف فوکل گروپ بنادیئے گئے ہیں، پاکستان کشمیر سے متعلق اپنے مؤقف سے پیچھے نہیں ہٹے گا اور نہ ہی کسی بھی صورتحال میں کسی لچک کا مظاہرہ کیا جائے گا۔
وزیراعظم کشمیر پرجواسٹریٹجی بنائیں گے کابینہ ان کا پورا ساتھ دے گی۔ معاون خصوصی برائے اطلاعات نے کہا کہ کراچی کلین اپ پر کابینہ میں تفصیل سے بحث ہوئی ہے۔
ایف ڈبلیو او کی ڈیوٹی لگائی گئی تھی کہ کراچی کیلئے مشترکہ روڈ میپ لائیں وزیر اعظم کو کراچی کے ناقص سیوریج سسٹم اور دیگرامور سےآگاہ کیا گیا ہے۔
ملک میں وسائل کی منصفانہ تقسیم نہ ہونے سےمسائل کا سامنا ہے، کراچی کے نالوں میں اترکر صفائی کرنے والوں کو انعام ملنا چاہیے، گلی محلوں سے کچرا اٹھانے پریوتھ اور مزدوروں کو معاوضہ دیا جائے گا۔
فردوس عاشق اعوان کا مزید کہنا تھا کہ یہ بات شہباز شریف کو یاد دلانا ہوگی کہ سجن جندال سجنوں سے ملنے کہاں آتا تھا، ن لیگ نے ملک دشمنی کارکردگی پر ایوارڈ حاصل کیا ہے۔
ن لیگ کے کسی لیڈر نے آج تک کلبھوشن دہشت گرد کا نام تک نہ لیا، سابقہ وزیراعظم نوازشریف بھی کلبھوشن کا نام لیتے شرماتے تھے، مریم صفدر کے اعلیٰ کارنامے میں پہلے ہی بیان کرچکی ہوں۔
ایک سوال کے جوب میں انہوں نے کہا کہ فواد چوہدری میرے بھائی اور دل کے قریب ہیں، فواد چوہدری کابینہ میں بھی ہلکی پھلکی موسیقی جاری رکھتے ہیں، کابینہ میں ہلکی پھلکی موسیقی سےماحول خوشگوار رہتا ہے، آج اس موسیقی کی زد میں شیخ رشید بھی آگئے۔
