کراچی : سندھ حکومت نے تما م ہیلتھ ورکرز کو متنبہ کیا ہے کہ اگر انہوں نے کورونا ویکسی نیشن نہیں کرائی تو انہیں ملازمت سے برخاست کردیا جائے گا۔
اس حوالے سے سندھ کی وزیر صحت سندھ عذرا پیچوہو نے ہیلتھ ورکرز کو خبردار کردیا، اپنے ایک بیان مین ان کا کہنا ہے کہ مذکورہ ویکسین مین خود بھی لگوائی ہے۔
عذرا پیچوہو کا کہنا تھا کہ کورونا ویکسین کا کوئی سائیڈ افیکٹ نہیں ہے لہٰذا میری تمام ہیلتھ ورکرز سے اپیل ہے کہ وہ جلد از جلد ویکسین لگوالیں۔
انہوں نے بتایا کہ ایک لاکھ 72ہزار ہیلتھ ورکرز رجسٹرڈ ہوئے تھے، جن میں سے 33ہزار سے زائد ورکرز نے اب تک ویکسین نہیں لگوائی۔
ان کا مزید کہنا تھا کہ یہ مکمل طور پر محفوظ ویکسین ہے جس میں کسی شک و شبے کی گنجائش نہیں تاہم اگر جن ورکرز نے ویکسینیشن نہیں کروائی تو انہیں ملازمت سے بر طرف کردیا جائے گا۔
اس حوالے سے اے آر وائی نیوز کے پروگرام باخبر سویرا میں گفتگو کرتے ہوئے ماہر صحت ڈاکٹر سید فیصل محمود نے بتایا کہ خواتین دوران حمل بھی یہ ویکسین لگواسکتی ہیں۔
